Danieri 5 - Baibuli I Leb Kumam 2013

Ebaga ka Belesasar

¹ Abaka Belesasar oko tedo ebaga ati ne jotel mege tutumian, di eko donyo mato bwini karacel kede gi.

² Kakame bwini odonyo kede i wie, Belesasar oko golo cik be kel ikopon kame kotimo kede saabu kede siliba, kame papa mere Nebukadunesa bin okelo ki tempulo atie Yerusalem, tetekeny en kede jotic mege adongo, kede mon mege, kede mon amake ace kalikame oudo enyomo mat kede gi bwini.

³ Cucuto di oko kelo ikopon nogo di gin kiko donyo mato kede gi bwini.

⁴ Gin kiko mato bwini di kiko donyo pako rubangan kame kocweo kede saabu, siliba, buronsi, ayon, yen kame kopao, kede kide.

⁵ Cucuto cing dano oko neeno di eko cako iwandik i kor apama me ot ka abaka kakame kopuo, i nget gicibo etala. Abaka oudo tie neno kite kame etie iwandik kede.

⁶ Abaka oko cako jul di tam kame etie kede oko mine lworo, di conge oko cako miel teltel.

⁷ En eko lwongere kitek pi ngatamoro kelo ne jotiet, jo Kaludea, kede imuroko. En eko waco ne jorieko me Babilon nogo be, “Ngat kame bino sobolo somo iwandik no di eko gonyo dwong mere kobino ngapo ne igoen akwakwar me angosibib, kede eriko me ngut kame kotimo kede saabu, di eko tero ruom me adek me apugan i ajakanut na.”

⁸ Jo kame mio abaka tam oko ot anyim, do likame tie ngatamoro kikom gi kame oko twero somo iwandik nono amoto gonyo ne abaka dwong mere.

⁹ Abaka Belesasar lworo adwong oko mako di eko medo jul kitek, di jotic mege adongo wi gi oko cungo.

¹⁰ Toto me abaka oko winyo di abaka kede jotic mege adongo tie celano, di en eko donyo i ot kakame oudo gin kitie camo iye ebaga. En eko waco be, “Akwao koto abaka obedo kuo nakanaka! Kur ibed kede par atek, doko da kur ijuli.

¹¹ Tie icuo moro i ajakanut ni kame tie kede tipo me rubangan kacil. Di bin papa ni tie abaka, bin oko udo be en etie kede ngec, niang, kede rieko arom bala rieko me rubangan. Di papa ni abaka oko cibe ebedo ngadwong me jotim tangu, jotiet, jo Kaludea, kede imuroko.

¹² En etie kede twer akalamo, ngec, kede niang me gonyo dwong me lek, kede gonyo dwong me kope komungere, kede me tieko pekini. Aso cwai dano ot lwong ni icuo nono, en Danieri, en ngat kame bin papa ni ocako ne nyinge be Beletesasar, di en eko bino gonyo ni dwong me gi noni.”

Danieri Ogonyo Dwong me Iwandik nono

¹³ Bin oko tero Danieri but abaka. Abaka oko waco ne Danieri be, “Mam in en Danieri, Eyudayat kame tie bedo obukui kan, kame papa na abaka bin okelo kan ki Yuda?

¹⁴ Ango awinyo kop i komi be in itie kede tipo me rubangan, kede be in itie kede ngec, niang, kede rieko amalo.

¹⁵ Aso nan kotieko kelo jorieko kede jotiet i nyima pi somo iwandik noni kede gonyo dwong mere, do likame kiko twero.

¹⁶ Do ango atieko winyo be in isobolo gonyo dwong me kope komungere, kede da tieko peko atie. Aso ka nan in iko sobolo somo iwandik noni kede gonyo dwong mere, kobino ngapo ni igoen akwakwar me angosibib, kede eriko me ngut kame kotimo kede saabu, kede iko bino bedo won ruom me adek i apugan me ajakanut noni.”

¹⁷ Danieri oko dwoko be, “Wek giamia nogo dong megi, arabo imi gi but dano moro apat. Adwong abaka ango abino somo ni gikame kowandiko di ako gonyo ni dwong mere.

¹⁸ “Rubanga Ngamalo Twal bin omio papa ni Nebukadunesa obedo abaka adwong, di eko mine deyo kede angosibib.

¹⁹ Pi dwongo kame komie, omio jo dedede, atekerin dedede, kede jo me leb dedede oudo tie kede lworo bute di kom gi miel amiela. Ngat kame cunye oudo mito neko, en bin etwero neko; ngat kame cunye oudo mito weko bed kuo, en bin eweko bedo kuo; ngat kame en bin emito mino wor, en oudo emio wor; ngat kame en oudo emito dwoko i ruom apiny, en oudo etimo da kamanono.

²⁰ Do kakame cunye oko pong kede ewaka di eko doko ngangute, bin oko kwanye ki kom mere me abaka, di oko kwanyo deyo mere.

²¹ Oko bin riame tenge kikom lwak, di oko mino tam mere odoko cal bala me le. En bin eko donyo bedo kede pundan me obar, di ecamo lum bala twon, di ebuto ooko i koyo abongo gikame galao kome ki toyo. I cen mere en eko do yei be Rubanga Ngamalo Twal tie kede twer i kom ajakanuto dedede me jo, doko en etwero mino gi but jo kame cunye oyero pi pugo gi.

²² “Do in Belesasar wode, likame iko yei mino cunyi mwolere, bed bala in ingeo gikame oudo otimere nono dedede.

²³ In itingere kalamo Rwot kame tie malo. In ikelo ikopon me tempulo mere, di in kede jotic ni adongo, kede mon ni, karacel kede mon ni ace kalikame inyomo, ikounu donyo ikounu donyo tic kede gi me bwini, di do ikounu donyo pako rubangan kame kotimo kede siliba, saabu, buronsi, ayon, yen kame kopao, kede kide, rubangan kalikame neno piny, akadi winyo amoto ngeno kop moroni. Do likame iko mino wor but Rubanga kame kuo nin tie i cinge, kede kame tie kede akarunikin i kom gi dedede kame in itimo.

²⁴ “Aso en eko cwano cing, di cing nono oko wandiko kope nogo.

²⁵ “Gikame ewandiko ine: MENE MENE TEKEL PARSIN.

²⁶ Dwong mere en ine: MENE, Rubanga otieko maro wel me ceng kame ebino jiko kede ajakanut ni abongo koso;

²⁷ TEKEL, in kotieko pimi i misani di oko udi iwekeweke twatwal;

²⁸ PARSIN kotieko poko ajakanut nin, kobino mine but jo Mede kede Pasia.”

²⁹ Cucuto Belesasar oko golo ne jotic mege cik pi ngapo ne Danieri egoe akwakwar me angosibib di oko liero i ngute eriko kame kotimo kede saabu. En eko mine ebedo dano me ruom me adek i apugan me ajakanut mere.

³⁰ Iwor me cenge nono bin oko neko Belesasar, en abaka me jo Kaludea;

³¹ di Darias, dano me Mede kame mwaka me dongo mere oudo tie ot kanyape kiwie are oko gamo apugan.