Danieri 2 - Baibuli I Leb Kumam 2013

Lek ka Nebukadunesa

¹ I mwaka me are me apugan ka Nebukadunesa bala abaka, en eko leko lek akelo lworo i cunye, omio likame eko donyo nino.

² Aso en eko mino cik me lwongo jotim tangu, jotiet, jojwogi, kede jo Kaludea, pi gin bino gonyo ne dwong me lek mege. Kakame gin kibino kede di kiko cungo i nyim abaka,

³ en eko waco negi be, “Ango aleko, do cunya tie rama pi mito ngeno dwong mere.”

⁴ Jo Kaludea oko waco ne abaka (kede leb Aramaik) be, “Okwe abaka bed kuo nakanaka! Wac ne wa lek ni di wan oko gonyo ni dwong mere.”

⁵ Abaka oko waco ne jo Kaludea be, “Ango nan atieko moko be, ka likame iwaconanu lek na kede dwong mere, kobino nyinyilo wu i adulion, di oko bino rereto ude wu.

⁶ Do ka iwacunu na lek nono kede dwong mere, ibinunu udo cul me giamia kibuta, kede wor adwong. Aso, nan wacanu lek nono kede dwong mere.”

⁷ Gin kiko waco ne abaka be, “Adwong, in wac ne wa lek ni di wan oko gonyo ni dwong mere.”

⁸ Abaka oko dwoko be, “Ango angeo kiber be wun itienu kede rieko me mino esawa ot, pien itiekunu neno be ango atieko moko tam na

⁹ pi mino wun dedede alola acel nono, ka likame iwacunu na lek nono. Wun itiekunu winyere pi waco nango kop me angalo, pien wun igenunu be ingei kare moro ango abino loko tam na. Pi manono wacunu nango lek nono di ango ako bino ngeno be wun itwerunu gonyo na dwong mere.”

¹⁰ Jo Kaludea nogo oko dwoko ne abaka be, “Likame tie ngatamoro i wi lobo kan kame twero waco nin gikame itie mito. Ateteni, pwodi likame tie abaka moro akadi di edwong amoto di etek benyo, kotieko penyo kop kacal kamano kibut jotim tangu, amoto kibut jotiet, arabo kibut jo Kaludea.

¹¹ Gikame in adwong itie penyo tek adikinicel, doko da likame tie ngatamoro kame twero tuco ni, kwanyo kenekene rubangan; aso gin likame kibedo kede wan jo.”

¹² Manono oko mino abaka odoko ger di eko golo cik be poore nek jorieko dedede kame mie tam i Babilon.

¹³ Oko woto cik nono, di do oko cako mono Danieri kede jowote pi neko gi.

Rubanga Onyuto ne Danieri Dwong me Lek nono

¹⁴ Di Danieri oko ot but Ariok, ngadwong me jonek kame abaka oudo ogolo ne cik me neko jorieko me Babilon. En eko yamo kede rieko bute,

¹⁵ eko penyo Ariok pinyo komio abaka ogolo cik agwai kamano. Ariok oko tatamo ne Danieri tien kop nono.

¹⁶ Cucuto Danieri oko ot kwano abaka pi kong mine kare moro di en eko bino gonyo ne abaka dwong me lek mere nono.

¹⁷ Danieri oko ot paco di eko waco ne jowote, Kanania, Misael, kede Asaria gikame otimere,

¹⁸ di eko waco negi pi kwano kisa kibut Rubanga me malo tetekeny enyut negi dwong me gikomungere nono, me wek gin karacel kede jorieko ace me Babilon kur konek gi.

¹⁹ Iwor me ceng nono Rubanga oko mino Danieri gianyuta me gikame omungere nono, di Danieri oko pako Rubanga me malo be,

²⁰ “Rubanga riek, doko etie kede twer! Pak bed i nyinge nakanaka.

²¹ En etie kede loc i kom gikame timere kede i kom kare; en eketo, doko en ekwanyo abakai; en kame emio rieko kede niang.

²² En enyuto gikame tut di omungere, en engeo gikame tie kakacol, piento en ebedo lero.

²³ Ango apwoi di apaki, in Rubanga ka joakwari na. Pien in imia rieko kede twer, di nan iko nyuto na gikame wan oudo okwai; inyuto ne wa gikame abaka ogolo cik pire.”

Danieri Owaco ne Abaka Lek mere kede Dwong mere

²⁴ Aso Danieri oko ot but Ariok, ngat kame abaka oudo otieko mino cik pi neko jorieko me Babilon, di eko waco ne be, “Kur inek gi. Terango but abaka di ango ako bino gonyo ne dwong me lek mere.”

²⁵ Ariok oko susunyo tero Danieri i nyim abaka di eko waco ne be, “Ango atieko udo kikom Iyudayan kame komako di oko kelo kan, dano kame twero gonyo nin dwong me lek nin.”

²⁶ Abaka oko penyo Danieri (bin kolwonge da be Beletesasar) be, “Itwero waco nango lek kame ango aleko kede dwong mere?”

²⁷ Danieri oko dwoko be, “Adwong, likame tie ngarieko moro, amoto ngatiet, amoto ngatim tangu, amoto emuron moro kame twero waco nin gikame itie penyo.

²⁸ Do tie Rubanga atie malo, kame tuco gikame omungere. En etieko tuco nin, abaka, gikame waru bino timere. Aso lek kede gianyuta kame in ineno di oudo itie nino tie kaman:

²⁹ Adwong, kakame in oudo itie nino kede, in iko leko kop me kare me anyim, di Rubanga ngat kame nyuto gikame omungere oko nyuto ni gikame bino timere.

³⁰ Aso, nan konyuto nango gikame omungere noni, likame be pien ango ariek kalamo jo icegun, do tetekeny in Adwong ingei dwong mere di iko niang i kom tam koudo obino i wii.

³¹ “Adwong, i gianyuta nono in ineno di twon cal kame kocweo tie cungo i nyimi. Oudo edwong twatwal di emeny amenya. Cal mere oudo kelo lworo.

³² Wie oudo kotimo kede saabu kame kojililo kiber; kore kede bade oudo kotimo kede siliba; piere kede etul mege oudo kotimo kede buronsi;

³³ iloton mege oudo kotimo kede ayon, kede tiene piny oudo kotimo kagamogo kede ayon kede kagamogo kede elupe.

³⁴ Kakame in oudo itie nene kede, oko muko kidi, likame cing dano en komuke, di kidi nono oko dipo tien cal nono kame oudo kotimo kede ayon kede elupe, di eko ngingido tiene ngidingid.

³⁵ Di ayon, elupe, buronsi, siliba, kede saabu oko nyinyitun di kiko doko bala apua me diakal me canyo i kare me oro; di yamo oko buko gi otero gi tenge, abongo yonge moro dong. Do kidi kodipo cal nono oko dongo eko doko twon moru di eko umo wi lobo lung.

³⁶ “Adwong, manoni en lek kame in oudo ileko, nan amito gonyo ni dwong mere.

³⁷ Adwong abaka, in ibedo abaka kame kalamo abakai dedede. Rubanga me malo omii ajakanut, twer, kede deyo.

³⁸ En emii pugo jo dedede me wi lobo, leini kede winy. In en wi cal kame oudo kotimo kede saabu.

³⁹ Ingei apugan nin, bino bobo wokun ajakanut ace, do likame ebino bedo tek bala meri; di ingei manono ko bino wokun ajakanut me adek, en me buronsi, kame bino da pugo wi lobo lung.

⁴⁰ Di ajakanut me ongwon ko bino bedo tie, kame tek bala ayon, kame tuturo kede kame bebelo jamini dedede, en ebino tuturo ajakanuto dedede me agege.

⁴¹ Oudo in ineno da be, tiene piny kede lwete oudo kagamogo kotimo kede elupe kede kagamogo kotimo kede ayon. Manoni nyuto be en ebino bedo ajakanut kopokere; do ebino bedo tie kede teko moro bala me ayon, bala kame ineno kede ayon kame konyalo kede elupe.

⁴² Lwete kobedo ayon kede elupe nyuto be ajakanut nono bino bedo tek, do ebino da bedo kede goro.

⁴³ Bala kame ineno kede be konyalo ayon kede elupe, manoni nyuto be jotel kame cuny gi opopokun me ajakanut nono bino tamo kelo aribakin i yore me gin ribo nyomere, do manono likame bino twerere, bala kame ayon likame nyalere kede elupe di kiko moko.

⁴⁴ I kare me apugan nogo Rubanga me malo bino cibo ajakanut kalikame kobino jiko, doko da likame jo apat bino puge. En ebino tuturo ajakanuto nogo, di en eko bedo tie nakanaka.

⁴⁵ In ineno kite kame kidi omukere kede ki moru abongo cing ngatamoro mule, di eko ot dipo paka nyinyito ayon, buronsi, elupe, kede siliba, kede saabu. Adwong, i ilek ni Rubanga adwong otieko waco ni gikame bino timere, doko da kite kame ango agonye kede tie kakare.”

Komio Danieri kede Jowote Ruom Amalo

⁴⁶ Di Abaka Nebukadunesa oko riebere piny di eko mino Danieri wor. Di eko mino cik be poore mi giamia me alos kede me odok angwe kur but Danieri pi mine wor.

⁴⁷ Abaka owaco be, “Ateteni Rubanga nin dwong kalamo rubangan dedede, en etie Rwot me abakai, doko enyuto gikame omungere, pien in iko twero gonyo nango mung noni.”

⁴⁸ Di eko mino Danieri tic me ruom amalo, di eko mine giamia abeco, di eko cibe ebedo ngapug me adul me Babilon kede ngadwong me jorieko koudo mio abaka tam koudo tie Babilon.

⁴⁹ Di lubere kede kwac ka Danieri, abaka oko cibo Sadurak, Mesak, kede Abedenego i wang tice adongo i adul me Babilon; do Danieri oko dong i tuale me abaka.