Amosi 7 - Baibuli I Leb Kumam 2013

Gianyuta me Obonyo

¹ Man en gikame Rwot Rubanga onyuto na: Ango anene di etie cweno ekodet me obonyo ingei nyaro ne abaka iner mere me lum me pito dok, di do lum anyen oudo tie cako lot.

² Kakame obonyo nogo otieko camo kede lum dedede me lobo nono, ango ako waco be, “Okwe Rwot Rubanga, ango akwai isasiro jo ni. Ikwae ka Yakobo bino twero kuo benyo? Gin kigoro twatwal!”

³ Rwot oko loko tam mere di eko waco be, “Gikame ineno likame bino timere.”

Gianyuta me Mac

⁴ Man en gianyuta ace bobo kame Rubanga onyuto na: Rwot oudo tie lwongo mac pi cwei, di mac oko cwei di eko tieko wango nam adwong atie piny i dud lobo, di do eko cako wango wi lobo malo.

⁵ Ango ako waco be, “Okwe Rwot Rubanga, ango akwai, jike! Ikwae ka Yakobo bino twero kuo benyo? Gin kigoro twatwal!”

⁶ Rwot oko loko tam mere di eko waco be, “Gikame ineno likame bino timere.”

Gianyuta me Tol atie kede Kidi me rieno Apama Malo

⁷ Man en bobo gianyuta kame Rwot bobo oko nyuto na: Rwot oudo tie cungo i nget apama kame kogero di kotio kede tol kame tie kede kidi me rieno apama malo, di en oudo etie mako i cinge epone me tol atie kede kidi nono.

⁸ En eko penya be, “Amosi, nyo kame itie neno?” Ango ako dwoko be, “Tol atie kede kidi me rieno apama malo.” En eko waco be, “Ango abino tic kede en me nyuto be jo na cal bala apama kogom. Ango likame doko abino loko tam na me mino gi alola.

⁹ Kobino dudubo kabedere kame ikwae ka Isaka wora kiye; kabedere kacil me Isirael bino doko amejeko. Ango abino jiko apugan ka Yeroboam.”

Amosi kede Amasia

¹⁰ Di Amasia, en ngasaseredoti me Betel, oko cwano ne Abaka Yeroboam me Isirael kop be, “Amosi tie timo iik arac i komi i diere me jo me Isirael kanoni. Jo likame doko twero meede kede kanyakino kop mere.

¹¹ Kop kame en etie waco en ine be, ‘Yeroboam bino to i yi, di oko bino mako jo me Isirael ki lobo gi di oko tero gi obukui.’ ”

¹² Amasia oko waco ne Amosi be, “Okwe in nganeno, yai tenge, dok do i lobo me Yuda di iko ot murao kope ni kunono di gin kiculi iye;

¹³ kur doko imeede murao kope ni Betel kan, pien kan en kame abaka woro kiye Rwot, en tempulo adwong me ajakanut wa.”

¹⁴ Amosi oko dwoko ne Amasia be, “Ango oudo likame abedo enabi, do nan da likame ango atie i ekodet moroni me inabin; do ango oudo abedo ngakwat kede ngat kame gwoko yen cukamori.

¹⁵ Do Rwot oko kwanya ki tic na me kwat di eko waco na pi bino murao kop mere but jo mege me Isirael.

¹⁶ Aso nan winy gikame Rwot tie waco. In iwaco na be ajik imurai i kom Isirael, doko da be awek pwonyo kop kame dio ikwae ka Isaka.

¹⁷ Pi manono, Amasia, Rwot tie waco ni kaman: ‘Dako ni bino doko malaya i bomba, di oko bino neneko awobe ni kede anyira ni. Lobo ni kobino popoko ne jo apat, di in kikomi iko bino to i piny me jo kalikame wora. Doko ateteni kobino kwanyo jo me Isirael ki lobo gi di oko tero gi obukui bala mabus.’ ”