Amosi 6 - Baibuli I Leb Kumam 2013

Dudubo Isirael

¹ Ibinunu bedo kede can adwong wun jo kame itienu kede kuo ayoyot i Sion, wun jo kame itienu i moru me Samaria kakame iparunu be gimoro likame karuno mulo wu kiye, wun jo kame ngere twatwal i ateker adwong me Isirael noni, wun jo kame jo bino butu mono kony!

² Wun iwacunu ne jo be, “Otunu ber inenunu bomba me Kalane, di ikounu yai ki kunono ikounu ot i bomba adwong me Kamat, di ikounu lor piny i bomba me Gat, en bomba me jo Pilistia. Benyo, tie moro i kom gi kame kalamo ajakanuto me Isirael kede Yuda? Tie moro kikom gi kame lac kalamo meru?”

³ Okwe wun idagunu yei be ceng me can tie bino, do gikame itimunu tie mino ceng me apugan me gero tie doko iyapiyapi.

⁴ Itienu i can wun jo kame ibutunu i mamakoe kame kotubuso kede lak liece, di icamunu ringo me itobai kede me romini apwodi bwong.

⁵ Wun imarunu teto were anyen bala bin Daudi, di ikounu donyo wero gi di igounu adungu.

⁶ Imatunu bwini pong awale, di isutunu kede moe abeco kalamo, do likame itururunu pi poto me ikwae ka Yosepu.

⁷ Pi manono, wun en ibinunu bedo jo me agege kame kobino tero obukui bala mabus, di yomcuny me jo kame dedar i mamakoe ko bino jik.

⁸ Rwot Rubanga me jo yi okwongere be, “Cunya dagi ewaka me ikwae ka Yakobo; doko da cunya dagi bomban gi kame kocelo; ango abino jalo bomba gi adwong kede gi dedede kame tie iye i cing jokwor.”

⁹ Ka jo tomon odong i ot acel, gin kibino to.

¹⁰ Wad me dano oto, en ngat kame wango kom ngat oto, bino woto liel ooko. En ebino lwongo dano moro apwodi odong tie i ot be, “Benyo, tie pwodi ngatamoro kodong kedi kuno?” Dwan ko bino winyere adwoko be, “Li!” Di wad me ngat oto ko bino waco be, “Lingi! Ogwokere kara kur owac nying Rwot.”

¹¹ Kame Rwot omio cik, ude adongodongo bino ngingidun, di ude atitino ko bino nyinyitun.

¹² Benyo, asigiran twero ringo ki wi moru? Benyo dano twero puro nam kede ecuka? Do wun itiekunu loko ngolo kop me ateni odoko kwir akec, kede anyakini me tice kopoore oko doko bala yat kame kec.

¹³ Wun ilelunu pi mako bomba me Lodebar. Iwakerenu be, “Wan omao Karanaim kede teko wa.”

¹⁴ Rwot Rubanga me jo yi tie waco be, “Wun jo me Isirael, ango abino cwano ne wu ateker me kumbor pi bino bedo i lobo wu. Gin kibino bedo tero wu kirac cako ki Lebo Kamat i bad tetu malo tuno i esamai me Araba i bad tetu piny.”