Amosi 5 - Baibuli I Leb Kumam 2013

Lwongo but Jo Isirael pi Swilaro

¹ Winyunu wun jo Isirael, wer me koko noni kame ango ayaro wero wu kede:

² Isirael nyako kalikame pwodi ongeo icuo otieko poto, likame ebino yai malo bobo; kojale etie buto piny, abongo ngatamoro kame kiarao en.

³ Rwot Rubanga waco be, “Ka bomba moro me Isirael bino cwano jo tutumia acel ot yi, jo tol acel kenekene en kame bino dwogo. Ka bomba moro bino cwano jo tol acel, jo tomon kenekene en kame bino dwogo.”

⁴ Rwot waco ne jo Isirael be, “Dwogunu buta di ikounu bino kuo.

⁵ Kur iotunu woro caljwogi Betel, Giligal, arabo Beereseba. Jo me Giligal kobino tero obukui bala mabus, aso Betel bino doko gimoro li.”

⁶ Dokunu but Rwot di ikounu bino bedo kuo. Ka li, en ebino kokomar i kom jo me ot ka Yosepu bala mac. Mac nono bino wango Betel dopodop, abongo ngatamoro kame romo neke.

⁷ Itienu i can, wun jo kame ilokunu ateni di ikounu mine edoko kec bala yat, doko icaunu tim kopoore!

⁸ Rwot en kocweo acerin, acerin kocokere apimere i wi wa malo kede me bad tetu malo. En eloko piny acol cucucuc doko ler, doko en eloko iceng doko iwor. En elwongo pii me nam di eko bwoto gi i wi lobo. En nyinge Rwot.

⁹ En emuducaro jo atek kede kabedere gi kame kocelo kitek.

¹⁰ Wun cunyu dagi jo angolo kop i ateni kede ijurak me ateni.

¹¹ Wun iterunu jocan kirac di igamunu alos kibut gi me esolo tetek. Wun igerunu ude me wel amalo, do likame ibinunu bedo i yi gi. Wun ipitunu olok kame yomo cunyu, do likame ibinunu mato bwini gi.

¹² Ango angeo kite kame dub wu tot kede, doko angeo kite kame kidongodongo kede. Wun iterunu jo kame ikiteso gi beco kirac, igamunu cemusana, doko likame imiunu kongolo kop kakare ne jocan.

¹³ Kare noni do otieko doko rac kitek, omio jo ariek girgi do ling alinga.

¹⁴ Ketunu cunyu timo gikame ber do weko gikame rac, tetekeny ibedunu kuo. Manono bino mino Rwot Rubanga ateteni bino bedo kede wu bala kame wun iwacunu.

¹⁵ Dagunu gikarac di ikounu maro gikame ber, di ikounu neno be ngolo kop me ateni obedo tie i irutei me bomban; cengemogo manono twero mino Rwot, Rubanga me jo yi, bedo kede cuny me kisa i kom jo me ateker noni kame pwodi odong kuo.

¹⁶ Pi mano, Rwot Rubanga me jo yi waco be, “Koko alit bino bedo tie kacokere dedede me bomba, kede i gudi dedede me bomba jo bino koko be, ‘Okwe! Okwe!’ Kobino lwongo jopur pi bino koko jo oto, gin karacel kede jo kame kopango pi koko.

¹⁷ Koko bino bedo tie i poti dedede me olok, pien ango abino mino wu alola. Ango Rwot Rubanga atieko waco.”

¹⁸ Ibinunu neno can benyo wun jo kame iparunu tuno me ceng ka Rwot! Pinyo komio imitunu ceng ka Rwot? En ebedo ceng me colpiny do likame ceng me lero.

¹⁹ I ceng nono wun ibinunu bedo cal bala ngat kame ringo tenge kibut engu di eko riamo kede edubu! Arabo bala ngat kame bwot di eko ringo ture di eko gongere i kor apama di twol ko kane!

²⁰ Ceng ka Rwot bino kelo colpiny do likame lero; ebino bedo ceng me peko abongo lero moro.

²¹ Rwot waco be, “Ango cunya dagi ibagai wu; cokere wu me wora likame yomo cunya.

²² Akadi imianu giayala wu awanga kede me alos, ango likame abino gamo gi, doko giayala wu me nywak, giayala me leini kame ipitunu oko cwe, ango likame abino ngoloro.

²³ Terunu tenge were wu; ango likame amito winyo adungun wu, akadi di were gi mit benyo.

²⁴ Do akaka manono, miunu ngolo kop me ateni mol bala pii, kede tim me poore miero mol bala pii me ecilet kalikame tuo.

²⁵ “Okwe wun jo me Isirael, benyo, bin ikelunu na giayala kede giamia i kare me mwakini ot ongwon kame itiekunu i wi tim?

²⁶ Wun bin iworunu Sakut, caljwogi kame wun ilwongunu be abaka kede Kaiwan, caljwogi kame wun itimunu i cal me acer.

²⁷ Pi mano, ango abino tero wu obukui bala mabus, kakabor kalamo Damasiko,” manoni en kop kame Rwot kame nyinge Rwot me jo yi owaco.