Amosi 4 - Baibuli I Leb Kumam 2013

¹ Winyunu kop noni wun mon me Samaria, jo kocwe bala doke kame kopito kiber me Basan, wun jo kame iterunu jocan kede jo kame piny oloo kirac, di iwacunu ne cwogu be, “Kelunu kongo ace!”

² Rwot Rubanga otieko kwongere i nyinge kacil kene be, “Kare bino tuno kame kobino kodo kede um wu kede golu di oko peno wu kotero wu tenge. Likame tie ngatamoro kikomu kame bino dong; wun dedede kobino peno wu kede golu bala rec.

³ Kobino peno wu kobeo kede wu ki kakame apama opopoto kiye, di oko uco wu tetu Karamon.”

Jo Isirael likame Pwonyere

⁴ Rwot Rubanga waco be, “Jo Isirael, otunu Betel di ikounu timo dub! Otunu Giligal di ikounu meede ameda kede timo dub! Terunu giayala wu buli odiko, kede acel me tomon me jame wu ingei buli ceng me adek.

⁵ Terunu giamia wu me pwoc me mugati kame arup tie iye. Rabunu kop me giamia kame imiunu me bercuny tetekeny jo winyi; pien manono en kame wun imarunu timo, Okwe wun jo me Isirael!

⁶ “Ango en kame oudo akelo kec i bomban wu, do wun ikounu dagi dwogo buta.

⁷ Ango bin agengo kot cwei i kare kame do cam wu kame bin tie i poti oudo mito kede kot kitek. Ango bin amio kot cwei i bomba acel di eko weko bomba ocelu. Kot oudo cwei i poto acel, di eko weko poto ocelu dong di etuo baba.

⁸ Jo me bomban are arabo adek bin yai di kiko ot i bomba acel pi mato pii, do likame kiko udo pii aromo gi. Akadi kamanono da, wun likame ikounu dwogo buta.

⁹ “Ango bin amio engano wu oner di eko mwato; adudubo poti wu kede olok wu da. Obonyo ocamo yen epigi wu kede yen me olibeti wu. Do wun likame ikounu dwogo buta.

¹⁰ “Ango bin acwao ne wu aumpuli kame cal bala kame bin acwao ne jo Misiri. Aneko awobe wu i yi di ako tero asigiran wu. Amio ngwece me kom jo oto i kimere wu oduny i umu. Do wun likame ikounu dwogo buta.

¹¹ “Ango bin amuducaro jo atot kikom wu bala kame bin atimo i Sodoma kede Gomora. Jo kame bin oko dong kuo kikom wu oudo cal bala yen kame kowariso ki mac. Do wun likame ikounu dwogo buta. Ango Rwot en awaco.

¹² “Pi manono, wun jo Isirael, ango abino timo ne wu kamanono. Aso, pien ango ayaro timo gi noni, iikerenu pi riamo keda, ango Rubanga wu!”

¹³ Nenunu, Rubanga en kocweo mori kede yamo abuko. En emio tam mere ngere but jo; en eloko iceng doko iwor. En eoto i wi mori. Nyinge obedo, Rwot Rubanga Won Twer!