Amosi 3 - Baibuli I Leb Kumam 2013

¹ Jo me Isirael winyunu kop noni kame Rwot otieko waco i komu, wun ateker lung kame bin en ekwanyo ki Misiri:

² “Kikom atekerin dedede me wi lobo, wun kenekene en kame ango atieko ngeno wu. Manono en kame mio ango miero ami wu alola pi dub wu dedede.”

Tic me Enabi

³ Benyo, jo are twero upere karacel abongo gin cikere pi riamo?

⁴ Benyo, engu dorano i abum di eli kede le kame emako? Benyo, atin engu ngururo i ode abongo le moro kame en emako me amwoda?

⁵ Benyo, winyo moko i owic kalikame kociko? Benyo, owic gwere di eko ridakin abongo gimoro gwetakino en?

⁶ Benyo, kotwero kuto agwara me yi i bomba di lworo likame ko mako jo? Benyo, peko twero poto i bomba ka Rwot likame ocwae?

⁷ Ateteni Rwot likame timo gimoro di likame en enyuto ne inabin jotic mege mung mere nono.

⁸ Engu otieko dorano, ngai kalikame bino bedo lwor? Rwot Rubanga otieko waco kop mere, ngai kame twero dagi rabo kop mere?

Can kame Koketo i kom Samaria

⁹ Rab kop but jo kame bedo i miere me abakai me Misiri kede Asidod be, “Cokerenu karacel i mori me Samaria di ikounu neno twon atotolun, kede epone kame kotero kede jo kirac.”

¹⁰ Rwot waco be, “Gin likame kingeo akadi timo gikame poore. Gin kipongo i miere gi kame kocelo kitek, jamini kame kiudo i yore me tim me gero kede yak.

¹¹ Aso, jokwor bino luko lobo gi di kiko bwono teko gi, di kiko yako miere gi kame kicelo kitek nogo.”

¹² Rwot waco be, “Bala kame ngakwai romini kame tamo mano oromo ki dog engu mao kede iloton are arabo yit acel kenekene me oromo, lako jo Isirael kame bedo Samaria da bino bedo kamanono. Kuo me jo anok kenekene en kame bino bwot, kede adulion me itandana kede me komini.

¹³ Nataman winyunu kop noni, di ikounu kwenyaro ikwae ka Yakobo, ango Rwot Rubanga me jo yi en awaco.

¹⁴ I ceng kame ango abino mino kede jo Isirael alola pi dub gi, ango abino dudubo alutarin me Betel. Kobino pakaro iswongen me alutari poto piny.

¹⁵ Ango abino reto piny ude me kare me ngico me piny kede me kare me lieto me piny. Ude kame kotubuso kede lak liec bino doko atukito me lobo; ude adongo dedede kobino dudubo.”