Amosi 2 - Baibuli I Leb Kumam 2013

Moab

¹ Rwot waco be, “Jo me Moab obedo timo dub tien atot atota. Ango ateteni abino mino gin alola; likame abino loko tam na, pien gin kiko wango cogere me abaka me Edom paka doko buru.

² Ango abino cwano mac i lobo me Moab, di mac nono ko bino wango kagwokere atek me Keriot. Woo me yi kede koko me agwarai bino winyere di kotie neneko jo Moab.

³ Ango abino neko ngapug me Moab karacel kede jotel dedede me lobo nono.”

Yuda

⁴ Rwot waco be, “Jo me Yuda obedo timo dub tien atot atota. Ango ateteni abino mino gin alola; likame abino loko tam na, pien gin kitieko dagi iswil na, doko likame kigwoko pwony na. Caljwogi kame bin joakwari oko donyo woro otieko mino gida kiparao tenge.

⁵ Aso, ango abino cwano mac Yuda di mac nono ko bino wango kagwokere atek me Yerusalem.”

Kop kame Rubanga Ongolo i kom Jo Isirael

⁶ Rwot waco be, “Jo me Isirael obedo timo dub tien atot atota. Ango ateteni abino mino gin alola; likame abino loko tam na, pien gin kicato jo kame ekite gi opoore, jo kalikame karuno culo banyi gi. Jo kame piny oloo gin kicato i wel me amuka.

⁷ Gin kinyonyono jocan piny i apua, doko jo agoro gin kiremoro tenge ki yote. Awobi kede papa mere ribo nyako acel di gin kiko munao nyinga kacil.

⁸ Gin kibuto i nget alutari i igoen kame jocan osingao. Gin kimato bwini i tempulo nango, bwini kame gin kiwilo kede sente me jo kame gin kitango.

⁹ “Isirael, jo Amor bin tie Kanan i kare kame wun bin idonyunu kede iye. Gin oudo kibocoboco bala yen seda, doko oudo kitek bala yen oak. Do ango bin ako muducaro gin atieko gi pitipit.

¹⁰ Ango bin akwanyo wu ki lobo me Misiri di ako bedo telo wu i wi tim pi mwakini ot ongwon, di ako mino wu lobo me jo Amor oko doko meru.

¹¹ Ango bin ako yero awobe wu mogo pi bedo inabin, ipongai wu mogo bin amio obedo jo kokwerere buta. Benyo, likame etie kamanono, Okwe wun jo me Isirael? Ango Rwot atieko waco.

¹² Do wun ikounu mino jo kotieko kwerere buta omato bwini, di ikounu mino cik but inabin di iwacunu negi be, ‘Likame ibinunu yamo kop ka Rubanga.’

¹³ Aso, ango nataman abino dino wu piny i kabedo wu, bala kame engano kame opongo i gadigadi die kede.

¹⁴ Jo adwir i ringo likame bino bwot; jo atek da teko gi bino doko li, akadi dano atek i yi likame bino karuno lako kuo mere.

¹⁵ Jo agweo emal likame bino karuno cungo yi, doko jo adwir i ringo da likame bino karuno bwot, akadi jo aringo kede asigiran likame bino bwot.

¹⁶ I cenge nono akadi ngayi atek kame cunye nwang bino jalakino gi me yi mere di eko ringo tenge pi lako kuo mere. Ango Rwot en awaco.”