Amosi 1 - Baibuli I Leb Kumam 2013

¹ Magonogi en kop ka Amosi ngat acel kikom jokwai romini me bomba me Tekoa. Rubanga bin onyuto ne kop amako Isirael, mwakini are di pwodi piny likame oyangere. I kare nono Usia en kame oudo tie abaka me Yuda di Yeroboam wot ka Yowasi en kame oudo tie abaka me Isirael.

² Amosi owaco be, “Dwan Rwot dorano ki moru me Sion; dwane dorano ki Yerusalem. Di elet me jokwai romini ko ner, di lum me wi moru me Kamel ko tuo.”

Kop kame Rubanga Ongolo i kom Jokio me Isirael Siria

³ Rwot waco be, “Jo me Damasiko obedo timo dub tien atot atota. Ango ateteni abino mino gin alola; likame abino loko tam na. Gin kimio jo me Gilead oneno can alit.

⁴ Pi manono, ango abino cwano mac wango paco ka Abaka Kasael, doko abino wango kagwokere atek kame Abaka Benekadad ogero.

⁵ Ango abino tuturo irutei me Damasiko di ako muducaro jo me Aditot me Aben kede ngapug me Beteden. Jo me Siria kobino tero i lobo me Kir bala mabus.”

Pilistia

⁶ Rwot waco be, “Jo me Gasa obedo timo dub tien atot atota. Ango ateteni abino mino gin alola; likame abino loko tam na. Gin kimako ateker lung di kiko tero gi kioto cato gi bala ipasoi but jo Edom.

⁷ Pi manono, ango abino cwano mac i kom apama me cel me Gasa di mac nono ko bino wango kagwokere mege atek.

⁸ Ango abino muducaro jo kame bedo Asidod di ako neko abaka me Asikelon. Ango abino mino jo me bomba me Ekuron alola, di jo dedede me Pilistia kame pwodi odong ko bino to.”

Taya

⁹ Rwot waco be, “Jo me Taya obedo timo dub tien atot atota. Ango ateteni abino mino gin alola; likame abino loko tam na. Gin kimako ateker lung di kiko tero gi ne jo Edom. Gin kituro cikere gi me imiegu kame oudo kitimo.

¹⁰ Pi manono, ango abino cwano mac i kom apama me Taya di mac nono ko bino wango kagwokere mege atek.”

Edom

¹¹ Rwot waco be, “Jo me Edom obedo timo dub tien atot atota. Ango ateteni abino mino gin alola; likame abino loko tam na. Gin kilubo imiegu gi, jo Isirael, di kiko neneko gi abongo kisa. Lilo gin oudo likame tiek, doko gin oudo kimito be ebed kamanono nakanaka.

¹² Aso, ango abino cwano mac i bomba me Teman di mac nono ko bino wango kagwokere atek me Bosira.”

Amon

¹³ Rwot waco be, “Jo me Amon obedo timo dub tien atot atota. Ango ateteni abino mino gin alola; likame abino loko tam na, pien i Gilead gin kibabaro yi mon koyac i kare me yi pi mito nyano ikor me lobo gi.

¹⁴ Aso, ango abino cwano mac i kom apama me bomba me Raba di mac nono ko bino wango kagwokere mege atek. Gono duru bino bedo tie i ceng me yi, doko yi nono bino bedo gwai bala yamo me kot ager.

¹⁵ Abaka gi kede jotic mege kobino tero gi obukui bala mabus.”