Agole 9 - Baibuli I Leb Kumam 2013

Rieko Lwongo Jo Bute

¹ Rieko otieko gero ode, en esisipo ne ipirin kanyaare.

² En etieko neko leini me ebaga, etieko nyalo bwini me amata, doko da etieko iiko emesa me cam.

³ En etieko oro anyira jotic mege, gin kitie lwongo jo ki kakokiar me bomba be,

⁴ “Wun jo kame ikwianu piny bianu kan!” Rieko waco ne jo kalikame wi gi tio be,

⁵ “Bianu icamunu cam na kede imatunu bwini kame ango anyalo.

⁶ Wekunu kwina piny bedi, di ikounu bino kuo. Bedunu i ekite kuo kame nyuto niang.”

⁷ Ngat kame tamo rieno ngacaipiny riamo kede ayet; ngat kame bunano ngat arac udo awanon.

⁸ Kame ibunano ngacaipiny, en elokere dagi; do ka ibunano ngat ariek, en ebino mari.

⁹ Ka ipwonyo dano ariek, en ebino medo doko riek; ka ipwonyo dano kame ikiteso mege opoore, ngec mere bino meede.

¹⁰ Lworo Rwot en acakini me rieko. Ka in ingeo Ngat Kacil, udo itie kede niang atut.

¹¹ Pien ango rieko abino medo ni ceng me kuo; abino medo mwakini me kuo ni.

¹² Ka in iriek, rieko nono bino konyi in kikomi; ka in ngacaipiny, in kikomi en kame ibino yeno raco mere.

Lwongo kede Cikere ka Mingo

¹³ Mingo cal bala dako kalelelele, dako akwia piny, doko da di eli kede lewic.

¹⁴ En ebedo i ekeko mere arabo i kabedo idelelei malo me bomba,

¹⁵ di elwongo jo abeo kanono, jo kame tie tiro yote gi atira, di ewaco negi be,

¹⁶ “Wun jo kame kwia piny paraunu kan!” Do en ewaco ne jo kalikame wi gi tio be,

¹⁷ “Pii kame kokwalo akwala winyiwinyi; mugati kame kokwalo ka icamo i mung eyomo cunyi.”

¹⁸ Do gin likame kingeo be to tie kanono; likame kingeo be wele ka dako nono otieko donyo i kabedo me jo oto.