Agole 7 - Baibuli I Leb Kumam 2013

¹ Atin na, kur imi wi wil kede kope na, doko kan cik na i cunyi.

² Gwok cik na di iko bino kuo, gwok pwony na bala kame igwoko kede tong wangi.

³ Mak cik na i cingi baba, wandiko gi i cunyi.

⁴ Wac ne rieko be, “In ibedo amina,” doko da lwong niang atut be ngawoti me amara,

⁵ tetekeny gin kigwoki ki kom dako acar, ki kom dako angadote kame ngangalo in kede kope amit.

Dako Angacaro

⁶ Ceng moro acel abolo wanga ki dirisa me oda,

⁷ di ako neno ipongai kame pwodi tie kede niang anok, do twatwal mere ako ngico eponga acel kikom gi kame wie likame tio.

⁸ En oudo etie ot i yongayo, di etie i akarakara me yongayo kame tie i nget ot kame dako moro bedo iye. En eko donyo lubo yongayo kame oto paco ka dako nono

⁹ wang otieno di piny otieko doko col.

¹⁰ Dako nono oko cako bino tetu bute, di oudo engapere bala malaya, di etie kede iik mere i cunye.

¹¹ En oudo ebedo dako ayamo lelelele, dako kalikame gengere, doko da likame emaro bedo i paco;

¹² en oudo tic mere rimo piny esawa dedede i yote kede i atalen kede kabedo dedede mono cuo.

¹³ Dako nono oko gwake di oko donyo noto leme, di eko waco ne awobi nono di wange tek be,

¹⁴ “Atieko tin culo kwongere na, pien amio giayala awanga, nan ringo tie i oda.

¹⁵ Aso nan ango abino pi riamo kedi; oudo atie moni twatwal, do nan ine audi!

¹⁶ Atieko peto kabuto na kede isukan angwarangwara me Misiri;

¹⁷ atieko da kikiro moe angwe kur i kabuto na, moe kame kolwongo be mura, aloe kede sinamon.

¹⁸ Nan do bia ooti ocob mit wa iye tuno odiko; ooti oyom cuny wa kede tim me amara.

¹⁹ Pien cwara nan likame tie i paco, en etieko ot i sapali abor.

²⁰ En emako sente atot eoto kede; en ebino dwogo i kor duwe.”

²¹ Aso dako nono oko wano cunye kede kope mege me esupe; kope mege kame winyo mit oko mino awobi nono oyei.

²² Cucuto di do en eko cako lubo dako nono, bala twon kame kotie tero ot ngolo, bala atil kame tie rwako tiene i obek,

²³ tuno di tong ocobo emany mere. Oudo ecal bala winyo atie ot moko i tol, di oudo likame engeo be ebino culo manono kede kuo mere.

²⁴ Aso, awobe na, nan winyanu; cikunu yitu i kom kope me doga.

²⁵ Kur cunyi yei timo gikame en etimo; kur iparao lubo yote me kuo mere.

²⁶ Piento en etieko wanakino jo atot, jo atutututu otieko poto i cinge.

²⁷ Ode en yongayo kame tero dano kabedo me jo oto, ekelo ne dano to.