Agole 6 - Baibuli I Leb Kumam 2013

Ikwenyar apat Ace

¹ Atin na, benyo, itieko cungo ne dano kalikame ingeo di icikere pi culo banya mere?

² Benyo, kope me dogi otieko lokere doko bala owic kame maki, arabo cikere ni otieko maki bala obek?

³ Atin na, nan udo in do itie i cing ngat nono, do man en gikame ipoore timo tetekeny ibwoti. Suny yai ioti di iko bako ne dano nono dogi me wek esasiro in.

⁴ Kur iyei nino mako wangi; kur inuri;

⁵ marao kuo ni bala atil kame marao kuo mere ki cing ngadwar leini, arabo bala winyo kame marao kuo mere ki cing ngadwar winy.

⁶ In nganyapo, kong ber oti ineni kite kame cukuno tio kede me wek idok riek.

⁷ Gin kili kede ngatel, ejakait amoto ngapug moro,

⁸ do kicoko cam i kare me iporo; i kare me kac gin kicoko gikame kipitere kede pi kuo.

⁹ In nganyapo iyaro dong buto abuta tuno awene? Kara iyaro cei ki wang nino awene?

¹⁰ Iwaco be kong ber imito bilo nino moro acecek, be kong ber imito buto atitidi;

¹¹ do can bino poto i komi bala ngayak, bala ngayi kotieko iikere kede jame mege me yi.

¹² Dano akony mere li, dano arac, bedo wire di eyamo kope me abe;

¹³ en emimio wange atatai di etimo gianyuta mogo ace kede tiene amoto kede cinge pi umo angalo mere.

¹⁴ Akodi dano nono tam mere likame ber doko etimo iik areco, en nakanaka ekelo atwomutwomun.

¹⁵ Can bino ngoole poto i kom akodi dano nono; i esawa atitidi kenekene en ebino udo awanon kalikame cango.

¹⁶ Tie jame kanyaare kame Rwot dagi, jame kame tie bala gi me kwer bute;

¹⁷ gi nogo ige: neeno me ewaka, leb ayamo kope me abe, cing kame onyo remo me dano ali kede raco moro,

¹⁸ cuny atie kede iik me tim areco, tien kame onyaro ot timo gikarac,

¹⁹ mujura kame mio ijura me abe, kede dano kame kelo atwomutwomun i paco.

Ikwenyar i kom Timo Adote

²⁰ Atin na, gwok cik kame papa ni omii, doko da kur idagi pwony ka toto ni.

²¹ Kan gi i cunyi nakanaka; twei gi i nguti.

²² Kame in itie ot, gin kibino nyuto ni yongayo; kame in itie buto, gin kibino gwoki; doko da kame in icei, gin kibino yamo kedi.

²³ Pien cik tie bala etala, pwony tie bala lero, kope kame bunano dano pi riene obedo yongayo me kuo.

²⁴ Gin kigwoki ki kom mon me cuo, ki kope amit awao cunyi kawok ki dog mon acar.

²⁵ Kur iyei cilo gi wai cunyi, amoto keto tam ni i kom neeno gi me caro.

²⁶ Icuo karuno wilo buto kede malaya kede mugati acel, do ngat amito dako me icuo udo ejalo kuo mere kikokome.

²⁷ Benyo, dano twero keto mac i kore di mac nono likame ko wango igoen mege?

²⁸ Arabo benyo, dano twero nyono itonge me mac di itonge nono likame ko wango tiene?

²⁹ Manono da en gikame timere ne dano kame buto kede dako me icuo wad gi; ngat kame buto kede dako ka ngawote bino beo i alola.

³⁰ Jo likame cao ngakuwo kame kwalo cam pien kec oneke;

³¹ aso di kame komake, en epoore mino cul akalamo gi nono tien kanyaare; miero en ejal jame dedede kame en etie kede.

³² Do icuo kame timo adote udo likame wie tio; ngat atimo kamanono udo etie nekere kene.

³³ En eudo awanon kede lewic, doko lewic mere likame kwanyere ki wie.

³⁴ Pien nyeko mio icuo konyomere bedo kede twon gero kalikame wacere; en eli kede kisa atwal atwala kame eyabo culo raco kame kotimo ne.

³⁵ En likame ebino yei cul moro; en ebino dagi akadi twon giamia karom amene.