Agole 3 - Baibuli I Leb Kumam 2013

Acora but Jo Atino

¹ Atin na kur imi wii wil kede pwony na, do kan cik na i cunyi.

² Pwony na bino mini kuo alac kede mulem.

³ Bed dano awor kede agenere nakanaka; kom twei gi i nguti; wandiko gi i cunyi.

⁴ Ka itimo kamanoni, ibino udo nying aber kibut Rubanga kede kibut jo.

⁵ Gen Rwot kede cunyi dedede. Kur igengere i kom rieko kame in itie kede.

⁶ Mi Rubanga teli i gi dedede kame in itimo, di en eko bino rieno ni yongayo kame in ilubo.

⁷ Kur in do inenere keni be iriek; kenekene bed kede lworo but Rwot di iko weko timo gikarac.

⁸ Ka in itimo kamanono, ebino bedo ni bala yat kame cango komi kede kame kweo aramo ni.

⁹ Mi Rwot gi dedede kame in itie kede pi mine wor, di imie dul me agege me anyakini kame in ipuro.

¹⁰ Manono bino mino dere ni pong kede cam, doko iko bedo tie kede bwini atot kalamo.

¹¹ Atin na, kur icai pwony kame Rwot mii pi rieni, doko da kur iol kede kop kabunano in kame en ewaco ni,

¹² pien Rwot bunano ngat kame en emaro, bala kame papa me atin bunano kede wode kame cunye tie i kome.

¹³ Etie kede yomcuny ngat kame doko riek, kede da ngat kame udo niang,

¹⁴ pien ud kame wok ki yi gi tot kalamo kame wok ki siliba; abar kame tie i yi gi kalamo abar kame tie i saabu.

¹⁵ Rieko obedo gikame pire tek kalamo kide me wel, likame tie gimoro kame in imito kame kotwero poro kede.

¹⁶ I cinge tetu cam tie iye kuo alac; i cinge tetu ngodal tie iye abar kede wor.

¹⁷ En eteli bedo kede kuo me yomcuny, doko mulem tie i yote mege dedede kame en eteli iye.

¹⁸ Rieko tie bala yat kame mio kuo but jo kame lide baba i kome; jo kame moko i kome tie kede yomcuny.

¹⁹ Rwot ocweo piny kede rieko mere; en ecibo malo kede niang mere;

²⁰ kede ngec mere en emio pie atie piny i lobo otutucun, di idoun da ko cwei kot.

²¹ Atin na, kur iwek rieko kede tam kopoore rweny kibuti,

²² pien gin kibino mini kuo alac, di ecil bala gikame tubuso ngut dano.

²³ Manono bino mino kuo ni bedo mulem abongo tieni cetar.

²⁴ Ka ibedo piny wei, lworo likame bino maki; ka ibuto, ibino nino lejeleje.

²⁵ Likame ibino bedo kede lworo pi can mogo angoole angola, bala kame ngoole poto i kom jo areco bala yamo me kot;

²⁶ pien Rwot en kame bino bedo gen nin, en ebino gwoki likame obek mako tieni.

²⁷ I esawa kame ikaruno timo kede bero, kur idagi timo bero ne jo kame ipoore timo negi.

²⁸ Kur iwac ne ngawoti be, “Oti iko dwogo adwoga, diki abino mini,” do di esawa nono udo in itie kede gikame en emito.

²⁹ Kur ibed kede iik moro arac i kom ngakio ni kame bedo di oketo gen mere buti.

³⁰ Kur ilok kede jo atatai abongo tien kop, di likame tie raco moro kame kitimo ni.

³¹ Kur ingobelo jame me jo atie kede tim me gero, doko da kur iyei lubo ekite me kuo gi,

³² pien jo kotieko bilor tie bala gi me kwer i nyim Rwot; do en egeno jo ekite gi cil.

³³ Rwot kelo ilam i paco me dano arac, do en emio winyo i kabedo me dano kopoore.

³⁴ En enywaro jo kame tie kede anywar, do etie kede kisa but jo amwol.

³⁵ Jo ariek bino bedo jo kame koworo, do jomingo lewic bino mako gi.