Agole 28 - Baibuli I Leb Kumam 2013

¹ Jo areco poi ringo akadi di ngatamoro likame tie wapo gi, do jo kopoore cuny gi nwang bala engu.

² Kame jo me piny moro obedo jojemo, piny nono bedo kede jotel atot atota. Do piny bedo kede anapakin pi kare alac kame ngatel mere obedo dano ariek.

³ Ngapug kame tidilo jocan cal bala kot kame cwei di eko dudubo cam i poti.

⁴ Jo kame dagi lubo iswil pwoyo jo areco, do jo kame lubo iswil bedo jokwor gi.

⁵ Jo areco likame ngeo gimoro i kom tero jo i yore kapoore, do jo kame lubo kop ka Rwot niang iye odocon.

⁶ Eber bedo ngacan di itie kede ateni, elo bedo ngabar di itimo gi kalikame opoore.

⁷ Idwe kame lubo iswil obedo idwe ariek, do idwe kame mako aupa kede jo akony gi li mio jonywal gi lewic.

⁸ Dano kame medo abar mere i yore me medo wel me magoba kame jo poore cule, coko abar nono ne dano ace kame timo mwolo but jocan.

⁹ Ka dano dagi lubo iswil, ilega mere bedo bala gi me kwer but Rubanga.

¹⁰ Ngat kame taparo dano kame ikiteso mege beco i timo gikarac bino poto i bur kame en ekunyo nono. Ngat kame li kede raco moro bino udo jamini abeco.

¹¹ Ngabar nenere kene be en eriek, do ngacan kame wie riek ngeo en kiber.

¹² Kame dano kopoore odonyo i kom me ajakanut, jo lelo twatwal, do ka dano arac en kame odonyo i apugan, jo bedo pwono apwona.

¹³ Ngat kame kano dub mege likame bino udo bero moro, do dano kame tuco dub mege di eko swilaro, Rubanga bino time kisa.

¹⁴ Etie kede winyo ngat kame lworo Rwot i kare lung, do ngat kame ngaepali, kame dagi winyo kop ka Rubanga bino poto i peko.

¹⁵ Ngapug arac kame tero jocan kirac, rac bala engu kame tie idoran arabo edubu kame tie diebo kede le me acama.

¹⁶ Ngapug kame li kede niang ger doko etero jo kirac; do dano kame dagi jamini kame koudo i yore kalikame ber bino bedo kuo pi kare kalac.

¹⁷ Ka dano moro tie kede raco me neko dano ocelu, mito nganek nono ring tenge tuno to mere; kur ngatamoro konye.

¹⁸ Dano kame tie kede iponeso abeco bino bwot, do ngat kame tie kede iponeso areco bino ngole poto.

¹⁹ Ngat kame tek i pur bino bedo kede cam katot, do dano kame dubo kare i timo gimogo kame kony gi li bino bedo ngacan nakanaka.

²⁰ Dano kame genere bino udo winyo adwong, do ngat kame mito baro awakawaka likame bino bwot udo alola.

²¹ Bedo kede apokapoka i kom jo likame ber. Do jo mogo karuno timo dub pi sente moro atitidi.

²² Dano alit kede jame mege mito be ebar awakawaka, doko en likame engeo be can likame bino bwot poto i kome.

²³ Ngat kame bunano dano moro pi gikarac kame dano nono otimo bino udo pwoc kibut dano nono i cen mere, elo ngat kame cuko yamo kiber i kom dano kede doge kenekene.

²⁴ Dano kame kwalo papa mere arabo toto mere di ewaco be, “Manono likame rac,” eda etie ngakuwo.

²⁵ Ngaeranga kelo lok, do dano kame keto gen mere i kom Rwot bino baro.

²⁶ Dano kame keto gen mere i kom tam mere kene obedo ngamingo; do ngat kame lubo kop me jo ariek bino bwot ki peko.

²⁷ Dano kame konyo jocan likame bino bedo kede rem me gimoro, do ngat kalikame ngoloro gi, bino udo ilam atot atota.

²⁸ Ka jo areco odonyo i apugan, jo bedo pwono apwona; do kame apugan gi oko poto, jo kopoore doko tot.