Agole 25 - Baibuli I Leb Kumam 2013

Agole Ace ka Sulumani

¹ Mage da en agole ace ka Sulumani kame jotic ka Abaka Esekia me Yuda owandiko.

² Jo woro Rubanga pi mung mere, do abaka jo mio wor piento en engingico di eko mino jo ngeo dwong me gikomungere.

³ Bala kame malo tie kede kakabor, kede dud piny da tut tut kalikame kokaruno tuno i ajikini mere, kamanono da tam me abaka likame kokaruno ngeno.

⁴ Kwany cete tenge ki siliba di ngatet ko bino udo gi me teto jamini kacil.

⁵ Kwany jo areco tenge kibut abaka di apugan mere ko donyo timo gi kopoore.

⁶ Kur imire i nyim abaka, arabo kur icuk bedo dano adwong;

⁷ pien ebedo ber ka oko kobi kabedo amalo, elo ka oko waco ni mino kabedo ni but dano ace adwong kalamo in.

⁸ Kur ibunyo tero kop i ekiko. Pien ibino timo benyo i cen mere ka mujura ace obino di eko mini lewic?

⁹ Ka in itie kede kop moro kede ngakio ni, ot iko yamo kede en wang i wang, doko kur iko woto mung moro oko.

¹⁰ Ka likame iko timo kamanono, ngatamoro kame bino winyo kop ni bino mini lewic, di nyingi ko bino dubere dubere kalikame wacere.

¹¹ Kop kame owaco i esawa kibecokina cal bala saabu kame komwono i kom siliba.

¹² Kop kame ngat kariek bunano kede dano kame yei winyo kop, ber elo mwola kame kotimo kede saabu.

¹³ Ngaor kame genere kweo cuny jo kame oore bala kame pii angic kweo kede kom jo i ceng aliet me kare me kac.

¹⁴ Dano kame wakere pi giamia kame ecikere pi mino di likame eko kwanyo, ecal bala idoun kede yamo kame bino do likame kikelo kot.

¹⁵ Bedo kede dire karuno mino ngapug yei gamo kop nin, doko leb me mwolo karuno mini iloko tam me ngat atek i kom kop moro.

¹⁶ Ka iudo mokic, cam kame romi kenekene, pien ka iko camo kame kalamo, ibino ngoke.

¹⁷ Kur ibed lolo paco ka ngakio ni alola, pien ebino ool kedi eko cako dagi.

¹⁸ Dano kame mio ijura me abe i kom ngawote rac bala akuta me yi, epima arabo tong abit me emal.

¹⁹ Keto gen i kom dano kalikame genere i kare me peko cal bala tamo nyamo cam kede lak kame lit, arabo ot kede tien kongwalo.

²⁰ Wero wer ne dano kame cunye odubere cal bala gonyo egoe ki kom dano di piny ngic arabo suto munyo i bur.

²¹ Ka kec oneko jokwor ni, mi gi cam kicami; doko ka orio oneko gi, mi gi pii kimati.

²² Manono bino mino imio lewic mako gi, doko Rwot bino mini giamia me pwoc.

²³ Bala kame yamo abuko wok ki tetu malo kelo kede kot, akwot da kelo lilo kamanono.

²⁴ Eber ot bedo i dud ot kalamo nywako ot kede dako kame ngalok.

²⁵ Winyo rwonge aber kame wok kibut jo ni kame bedo i piny kabor kedi cal bala pii angic kame dano mato di orio otuo dwane.

²⁶ Dano aber kame yei tam me dano arac cal bala atan kame pii mere orubere kede cwoto arabo pii kame kobwoto iye yugi.

²⁷ Camo mokic atot twatwal likame ber, arabo mito be jo di bedo pwoni nakanaka.

²⁸ Dano kalikame karuno dino wangcuny mere, cal bala bomba kalikame tie kede apama kame gwoke.