Agole 24 - Baibuli I Leb Kumam 2013

Kop me Tomon kiwie Kanyangon me Rieko

¹ Kur nyeko maki kede jo areco, doko kur itam pi mito timo awotin kede gi;

² pien cuny gin bedo paro kop me gero kenekene, doko kibedo yamo kope amako timo ne jo raco.

Kop me Ot Are me Rieko

³ Dano tio kede rieko pi gero ot, doko niang atut en kame mio ot cungo di etek.

⁴ En etio kede ngec mere pi pongo agolai me ode kede jamini me wel, jamini kabeco kame yomo cunye.

Kop me Ot Are kiwie Acel me Rieko

⁵ Rieko ber kalamo teko, doko da dano kame tie kede ngec ber kalamo dano atek;

⁶ pien rieko karuno konyi i esawa me yi, doko kame itie kede jo atot kame mi tam abeco, in ilo yi.

Kop me Ot Are kiwie Are me Rieko

⁷ Kope me rieko kalamo niang me ngamingo. En likame engamo doge yamo akadi kop acel i kacokere ka jo tie poro kope kame pirgi tek.

Kop me Ot Are kiwie Adek me Rieko

⁸ Ngat kame bedo kede iik me mito timo gikarac kobino lwonge be ngakel peko.

⁹ Gikame ngamingo tamo kenekene en dub, doko cuny jo dedede dag dano kame ngaacae.

Kop me Ot Are kiwie Ongwon me Rieko

¹⁰ Ka in itie kede goro i kare me peko, udo teko ni nonok ateteni.

Kop me Ot Are kiwie Kany me Rieko

¹¹ Kur inen anena jo kame kotie tero i to gi; lak jo kame kotie pere kede gi tero ot neko.

¹² Cengemogo in itwero waco be, “Neningo, wan oudo likame ongeo gimoro iye”; benyo, in iparo be Rubanga ngat kame pimo cuny jo likame romo ngeno? Mam Rubanga ngat kame gwoki ngeo gikame in iparo i cunyi? Iparo be en likame ebino culo dano acelacel di lubere kede gikame en etimo?

Kop me Ot Are kiwie Kanyape me Rieko

¹³ Atin na, cam mokic, pien eber. Doko bala kame mokic kame ton i apien mere winyiwinyi kede i lebi,

¹⁴ mito ingei da be rieko mit kamanono ne kuo nin. Ka in iudo rieko, udo itie kede gen aber me anyim, doko gen ni likame bino poto.

Kop me Ot Are kiwie Kanyaare me Rieko

¹⁵ Kur ibed bala dano arac kame kio paco me dano kopoore pi mito suro; kur ibed kede tim me gero kakame dano kopoore bedo iye.

¹⁶ Pien akadi dano kopoore pot tien kanyaare, en eyai bobo; do dano arac can ka opoto ne, emuducaro en.

Kop me Ot Are kiwie Kanyauni me Rieko

¹⁷ Kur ileli ka can opoto ne ngading ni, doko kur cunyi bed yom kame egete.

¹⁸ Pien Rwot bino neno di cunye likame ko bino bedo yom, di likame eko mino ngading ni nono alola.

Kop me Ot Are kiwie Kanyangon me Rieko

¹⁹ Kur cunyi poti i kom jo areco, doko kur nyeko maki kede gi;

²⁰ pien dano arac likame tie kede kuo aber me anyim; kuo mere me anyim cal bala etala kame koneko.

Kop me ot Adek me Rieko

²¹ Atin na, bed kede lworo but Rwot kede but abaka, kur iribere kede jo kame jemo negi;

²² pien jo kame timo kamanono kokaruno ngoole muducaro gi, doko ngai kame ngeo can kame Rubanga arabo abaka karuno timo?

Kope Ace kame Jorieko Owaco

²³ Mage da obedo kope kame jorieko owaco: Likame poore ngangolkop bed kede apokapoka i kom jo.

²⁴ Ngat kame waco ne dano arac be, “In ili kede raco moro,” jo bino lame, doko atekerin bino dage;

²⁵ do jo kame ngolo kop lo jo areco bino bedo kiber, doko kibino udo winyo.

²⁶ Ngat kame dwoko ni kop me ateni en ngat kame mari.

²⁷ Iik kong poti ni, di iko pito kodere ni, en amio di do iko gero paco.

²⁸ Kur imi ijura i kom ngatamoro abongo tien kop, doko dogi kur wac kop moro me angalo.

²⁹ Kur iwac be, “Ango abino timo ne bala kame eda etimo na; ango da abino nyango pi gikame en etimo na.”

³⁰ Ango ako beno i nget poto me ngat kame nyap, i nget poto olok me ngamingo;

³¹ neningo, ako udo di okuto odongo oromo poto lung, doko doi da oume pukupuk. Apama me engaro kame oudo kocele kede oudo otieko poto piny.

³² Ango ako nene, ako paro kop mere i cunya di ako udo pwonyere.

³³ Nini kong atitidi, nin giri ka imito, Dol cingi giri di iko wei,

³⁴ di can ko bino ni bala kame ngayak bino ne kede dano, doko rem me jamini ko bino maki bala kame ngayi suro kede dano.