Agole 23 - Baibuli I Leb Kumam 2013

Kop me Kanyape me Rieko

¹ Kame in itie cam kede ngadwong, mito iniang be ngai inonono kame tie i nyimi,

² di iko bedo kede dire akadi di in itie kede eranga me cam.

³ Kur ibed kede eranga i kom cam amit kame en etoko ni, pien cengemogo udo etie tamo cunyi.

Kop me Kanyaare me Rieko

⁴ Kur itiek teko ni pi mito baro; bed dano ariek di iko weko tam nono.

⁵ Pien kakame wangi giparo en kede, abar karuno yai kibuti ineno bala etie kede bwome di eko por tenge bala ekokom.

Kop me Kanyauni me Rieko

⁶ Kur iyei ot camo cam me ngat kame ngaworo; kur ibed kede mit i kom cam amit kame en etoko.

⁷ Pien dano kame cal kamanono waco ni be, “Cami doko mat da!” Do kop me cunye udo pat.

⁸ Ibino ngoko gikame oudo icamo, di kope dedede amit kame oudo in ipwoye kede ko bino bedo me nono.

Kop me Kanyangon me Rieko

⁹ Kur idub kare ni yamo kede ngamingo, piento en ebino cano kope ni me rieko nogo acaa.

Kop me Tomon me Rieko

¹⁰ Kur inyik gikame nyuto ikor kasek arabo imai poti me idwe kic,

¹¹ pien Rwot ngat kame gwoko gi tek, en ebino pido kede in pirgi.

Kop me Tomon kiwie Acel me Rieko

¹² Ket cunyi mito pwonyere, di iko ciko yiti winyo kope kame kopwonyo.

Kop me Tomon kiwie are me Rieko

¹³ Kur iwek pwonyo idwe ni iponeso abeco; ka idao gi kede ebela, likame ebino neko gi.

¹⁴ Ateteni ka in idao gi, ibino lako kuo gi.

Kop me Tomon kiwie Adek me Rieko

¹⁵ Atin na, ka in idoko riek, ango da cunya bino bedo yom.

¹⁶ Ango abino bedo kede kilel adwong kame awinyo di in iyamo kope me ateni.

Kop me Tomon kiwie Ongwon me Rieko

¹⁷ Kur nyeko maki kede jodubo, do ket cunyi lworo Rwot.

¹⁸ Pien ateteni kare kaber tie anyim, doko gen ni likame bino poto.

Kop me Tomon kiwie Kany me Rieko

¹⁹ Winyi, atin na, iko doko riek, di iko bedo kede tam i kom epone me kuo ni.

²⁰ Kur ibedo kede jo kame mato kongo kitek, arabo jo kowor camo ringo;

²¹ pien joamera kede jocam bino doko jocan, doko bedo me nino esawa dedede bino mino gi kingapo idukun.

Kop me Tomon kiwie Kanyape me Rieko

²² Winy papa ni ngat konywali, doko kur icai toto ni kame etieko ti.

²³ Ti kede sente pi udo ateni, rieko, pwonyere kede niang atut, di likame iko uco gi.

²⁴ Papa me dano kopoore bedo kede kilel kadwong; ngat kame nywalo awobi kame riek bedo kede yomcuny.

²⁵ Mi papa ni kede toto ni bed kede yomcuny; mi toto ni ngat konywali leli.

Kop me Tomon kiwie Kanyaare me Rieko

²⁶ Atin na, winy kop na, di iko lubo epone me kuo na.

²⁷ Pien malaya cal bala bur atut; dako kame ngadote cal bala kulo adiding kame dano moko iye.

²⁸ En ebedo dari bala joyak di eko medo wel me cuo kalikame genere.

Kop me Tomon kiwie Kanyauni me Rieko

^29-30 Nyut nango ngat kame mato kongo tuno i isawan kokato, ngat kame bedo mito mato kongo me epone apapat, di ango ako bino nyuto ni dano kame tie i peko, dano kame bedo tururo aturur, di emaro lok kede ingungur. En aporeso tie i kome me nono nono, doko wange obokere bubu.

³¹ Kur inen kongo cil i yi ikopo di iko mine ewai tam ni, akadi di eliuliu benyo, akadi di imate eko donyo i dwani iwinye eber abera.

³² I cen mere en ebino mino iwinyo bala twol en okai; iwinyo lito bala dano kame ipom en otongo.

³³ Wangi bino cako neno gimogo apapat, doko cunyi ko donyo paro kope mogo akony gi li.

³⁴ Ibino neno bala itie nino i yi yee kame yamo tie puno i dier nam; ineno bala apien tie wire kedi.

³⁵ In ibino waco be, “Miero di kojuta, do likame oko mina awanon; kobunga do likame ango atie winyo lito moro. Kongo bino tiek ki wia esawa adi? Ango atie mito kongo ace.”