Agole 21 - Baibuli I Leb Kumam 2013

¹ Gikame abaka tamo tie i cing Rwot bala pii kame mol kame Rwot loko mol mere tetu karamoroni kenekene kame en emito.

² Gi dedede kame dano timo en eneno kene bala opoore, do Rwot pimo cuny dano.

³ Rwot pwoyo dano atimo gikame opoore kede kame timo gi dedede i yore me ateni kalamo ngat kame mio giayala.

⁴ Ewaka kede tingere obedo dub kame telo kuo me ngat arac.

⁵ Iik me dano atek i tic ateteni tere i abar, do jo dedede kame timo jame awakawaka likame bino bedo tie kede jamini kame romo gi.

⁶ Abar kame dano udo i yore me angalo rwenyo awakawaka bala eura me pii aduny, doko ekelo ne dano to.

⁷ Gero me jo areco bino muducaro gi pien gin kidagi timo gikame poore.

⁸ Dano kame tie kede raco lubo yongayo kogomugomun, do dano ali kede raco moro timo gikame poore.

⁹ Eber ot bedo i dud ot kalamo nywako ot kede dako kame ngalok.

¹⁰ Jo areco cuny gi maro gikarac; gin kili kede cuny me kisa but jowot gi.

¹¹ Kame komio ngaacae alola, akadi ngat akwia piny da doko riek; kame kopwonyo ngat ariek, en emedo doko riek.

¹² Rubanga, Ngat kopoore, ngeo gikame timere i ot me ngat arac; en ebino reto ngat arac di eko muducaro en.

¹³ Ka in idagi winyo koko me ngacan, ida ibino koko pi mito kony di likame oko bino winyo koko ni.

¹⁴ Giamia kame komio i mung but ngat kame kowango cunye, kweo cunye; doko cemusana kame komio i mung kweo twon gero.

¹⁵ Kame kongolo kop i ateni, jo kopoore lelo, do jo atimo gikareco cuny gi dubere.

¹⁶ Dano kame parao tenge di eko weko lubo tam aber bino udo be en eoto wei karacel kede jo oto.

¹⁷ Ngat kame maro kuo me yomcuny kenekene, bino bedo ngacan; ngat kame maro amata kede cam amit, likame bino baro.

¹⁸ Peko kame ngat arac paro pi mito timo ne ngat kopoore lokere poto i kom en.

¹⁹ Eber ot bedo i wi tim kalamo bedo kede dako kame ngalok doko di emaro ingungur.

²⁰ Abar dong i ot me dano ariek, do ngamingo dudubo mere adudub.

²¹ Ngat kame lubo ekite kuo kopoore doko di etimo mwolo bino bedo i wi lobo pi kare alac doko da ebino udo wor.

²² Dano acel ariek karuno ot suro bomba kame jo atek i yi tie daro, di eko tuturo apama atek kame gin oudo kiketo gen gi iye.

²³ Ngat kame gwoko doge kede lebe bwot i peko.

²⁴ Ngaewaka, ngat kame tingere, obedo ngaacae, en etimo gi dedede ewaka ewaka.

²⁵ Mit me nganyapo neke, piento en edagi timo tic.

²⁶ Ngat arac bedo ngobelo jamini me jo icegun piny yuluyul, do jo kopoore mio jo jamini kede cuny gi lung.

²⁷ Cuny Rwot dagi giamia kame jo areco tero ne, do akalamo mere ka kitero giamia nogo kede tam arac.

²⁸ Mujura kame ngalo likame ijura mere cobere kiber, do ngat kame ciko yite di eko winyo kop kiber, en ebino ngetakino mino ijura mere kiber.

²⁹ Ngat arac timo jame kede kwarwang, do dano kame ekite mere cil tamo kong kop i kom gikame en etimo.

³⁰ Likame tie rieko me dano moro, arabo niang atut moro, amoto tam moro kame komio, kame karuno konyo ka Rwot odagi.

³¹ Akadi di isirikalen iikere kede asigiran pi ot yi, do Rwot en kame mio gi kibwono jokwor.