Agole 20 - Baibuli I Leb Kumam 2013

¹ Mato bwini mio dano doko nganywar, kongo mio dano doko ngalok. Ngat kame mato kongo di eko mer likame riek.

² Gero me abaka mio jo lworo bala dorano me engu; ngat kame wango cuny abaka udo likame en eparo pi kuo mere.

³ Dagi donyo i lok tie gi me wor, do jomingo dedede maro lok.

⁴ Nganyapo likame puro poto mere i kare me ikwar; kare me kac tuno udo en eli kede gimoro.

⁵ Kope kame tie i cuny dano cal bala pii kame tie i atan atut, do ngat kame tie kede rieko karuno ngeno gi.

⁶ Jo atot waco ken gi be gin kigenere, do ngai kame karuno udo dano kame en ekaruno geno?

⁷ Ngat kopoore bedo kede iponeso abeco; idwe mege tie kede winyo.

⁸ Kame abaka obedo i kom mere me ngolo kop, wange yeko gikareco dedede.

⁹ Benyo, tie ngat kame karuno waco be, “Ango atieko mino cunya odoko cil; ango do ali kede dub moro”?

¹⁰ Rwot cunye dagi jo asero jo kede gipimo jamini kalikame tie kakare.

¹¹ Akadi atin da kongeo kede gikame en etimo; kokaruno ngeno ka en atin aber kame timo gikame opoore.

¹² Yit kame dano winyo kede kop kede wang kame dano neno kede piny Rwot en kocweo gin dedede.

¹³ Kur imaro nino esawa dedede, pien ebino mini idoko ngacan; yab wangi iko timo tic, di iko bino bedo tie kede cam atot.

¹⁴ Ngawil waco be, “Wel rac, wel rac,” do en eoto tenge di eko donyo wakere di epwore kene.

¹⁵ Dano kame yamo kop kame etie kede ngec iye, udo etie kede gikame ber kalamo saabu kede kide me wel.

¹⁶ Dano kame cungo ne ngakumbor i banya poore gam jame mege bala gikame esingao pi banya nono.

¹⁷ Gikame dano udo i yore me angalo mit ne, do i cen mere elokere eko doko cal ne bala engaro kame kopongo i doge.

¹⁸ Mono tam kibut jo en kame mio iik ni cobere; kame itie i yi, lub tam me rieko kame komii.

¹⁹ Ngakwot likame kano mung; pi mano, kur inai bedo kede ngat kame ngayamo.

²⁰ Ka in ilamo papa ni arabo toto ni, kuo ni bino jik bala etala kame midicar i kakacol cucucuc.

²¹ Abar kame dano udo awakawaka i agege, winyo li iye i atiekini.

²² Kur iwac be, “Ango abino nyango rac kame kotimo na”; gen Rwot, di en eko bino konyi.

²³ Cuny Rwot dagi jo asero jo kede kide me pimo jame kalikame tie kakare, doko da misani kalikame tie kakare likame ber.

²⁴ Kuo wa Rwot en kame telo; benyo benyo kame dano karuno ngeno kede yongayo me kuo mere?

²⁵ Ecal bala winyo kame donyo i owic, ka dano susunyo cikere pi mino gimoro but Rubanga, di i cen mere eko yutuno di do etieko kwongere.

²⁶ Abaka kame riek yeko jo areco tenge di eko mino gi alola abongo kisa.

²⁷ Ngec me cuny dano cal bala etala ka Rwot; en emenyo kuo me dano lung.

²⁸ Bedo kede cuny me amara kede bedo dano agenere en kame gwoko abaka, doko bedo dano kopoore en kame mio apugan mere cungo.

²⁹ Gi me ewaka me dano apwodi titidi en teko mere, do cilo me dano oti en lwar.

³⁰ Abap kame mio dano lito kwanyo rac mere tenge; tojo dano loko kuo mere doko ber.