Agole 2 - Baibuli I Leb Kumam 2013

Bero kame Wok ki Rieko

¹ Atin na, ka iyei lubo kope na, di iko kano cik na i cunyi bala gikame pire tek,

² di iciko yiti i kom kope me rieko, kede di iketo cunyi niang i kom gi;

³ ka ateteni in ibako dogi pi bedo kede ngec, di ikwao pi bedo kede niang;

⁴ ka in ibedo mone bala nyonyo siliba, di imoe bala gimoro me wel amalo kame kokano,

⁵ manono bino mino iniang dwong me lworo Rwot di iko bedo tie kede ngec i kom Rubanga.

⁶ Pien Rwot en kame mio rieko; kope me doge kelo ngec kede niang.

⁷ En emio kony but jo kame cuny gi cil, en egwoko jo kame bedo abongo raco moro.

⁸ En egwoko jo kame timo gi dedede i yore me ateni but jo icegun, doko da egwoko jo mege kame genere.

⁹ Kame iyei lubo kop na, manono bino mino ingeo gi kopoore, di itimo ne jo gikame poore, kede di itero jo dedede di rom aroma, ibino niang gi dedede aber me atima;

¹⁰ pien cunyi bino pong kede rieko di ngec ko kelo yomcuny i kuo ni.

¹¹ Tam kopoore bino gwoki, doko da niang bino dari,

¹² di kiko laki likame itimo gimoro arac, kede kibut jokame loloko kope,

¹³ gin jo kame weko yongayo me kuo kopoore di kiko donyo lubo yongayo acol me dub.

¹⁴ Gin jo kame lelo pi timo gikarac, doko cuny gi yom pi yote areco;

¹⁵ gin jo kame tie kede iponeso areco, doko da likame kigenere.

¹⁶ Rieko bino laki ki cing dako acar, dako angadote kame ngangalo in kede kope mege amit pi wano cunyi;

¹⁷ dako kame weko cware kame enyomere kede, di wie ko wil kede isikan mere kame etimo i nyim Rubanga.

¹⁸ Pien ka in ioto i ode udo itie lubo yongayo ateri i to; yongayo mere teri i kabedo me jo oto.

¹⁹ Ngat aoto bute likame bobo dwogo; likame bobo edwogo i yongayo me kuo.

²⁰ Pi manono, lubi ekite kuo me jo abeco, dongi adonga lubo yongayo me jo kame timo gi dedede i ateni.

²¹ Pien jo kame cuny gi cil bino bedo i lobo noni, jo kame li kede raco moro bino bedo iye;

²² do kobino kwanyo tenge jo areco ki lobo noni, di oko puputo jodubo kiye bala doi.