Agole 18 - Baibuli I Leb Kumam 2013

¹ Dano apokere bedo kene udo paro pire kenekene; en epiemo kede kope dedede abeco kame jo waco.

² Ngamingo likame paro pi udo niang; do en emito kenekene waco kop kame tie i cunye.

³ Tim arac kelo acae kede lewic.

⁴ Kop me rieko kame dog dano waco cal bala pii atut, en atan me pii amol nakanaka.

⁵ Gango tam me dano kame kop lo likame ber. Doko da dagi ngolo kop me ateni ne dano kalikame tie kede raco moro likame ber.

⁶ Yamo me ngamingo kelo lok, doko da kop kame wok ki doge mio kobunge.

⁷ Kop kame wok ki dog ngamingo kelo ne peko, doko yamo mere cal bala obek kame lokere make.

⁸ Kope kame ngakwot waco cal bala dek amit, kame dano mwonyo di eko donyo i yie.

⁹ Dano anyap rac rom aroma kede dano kame dudubo jamini adudub.

¹⁰ Rwot cal bala gedo abor malo di etek, dano kopoore ringo iye di eko bwot.

¹¹ Ngabar geno abar mere pi gwoke, doko i tam mere, abar mere cal bala bomba kame kocelo kede apama atek abor malo.

¹² Dano wakere di pwodi can likame opoto ne, do mwolere en ayabo yongayo me udo wor.

¹³ Ka dano dwoko kop di pwodi likame etieko winyo kop nono dedede, udo enyuto mingo mere doko ekelo lewic i kome.

¹⁴ Cuny kame dano tie kede pi mito bedo kuo karuno konye i kare me tuwo, do ka cunyi okwanyere, ngai kame karuno konyi?

¹⁵ Dano atie kede niang twero bedo kede ngec, doko dano ariek ciko yite winyo kop amedo ne ngec.

¹⁶ Giamia yabo ni yongayo. Emi ikaruno tuno but jo apirgi tek.

¹⁷ Ngat kame geo pido i nyim ekiko i winyo kop mere ineno bala tie kakare, tuno kede kakame dano kame en etie pido cako pepenyo en kede.

¹⁸ Uco alulu en kame tieko piem, ka jo atek are tie piem i kom kop moro.

¹⁹ Dano kame in itimo ne raco dok bute tek kalamo donyo i bomba kame kocelo kede apama atek, doko lok cal bala alorito me cego erute me paco kame kocelo.

²⁰ Kop kame wok ki dog dano adwokini mere lokere dok bute di ko rome, doko kop kame lebe waco timo gimoro i kuo mere.

²¹ Kope kame leb dano waco karuno kelo ne kuo arabo to; jo kame maro duro kop bilo adwokini me kop kame gin kiwaco nogo.

²² Ngat kame udo dako udo eudo gikame ber, doko udo Rwot otimo ne bero.

²³ Kame ngacan tie yamo, en eyamo kede mwolo di engangao angangai, do ngabar dwoko kop gero gero.

²⁴ Tie awotino mogo kalikame tie me ateni, do adieruni me ateni moko i komi kalamo omini.