Biblia Todo Logo
Bìoball air-loidhne

- Sanasan -

Agole 16 - Baibuli I Leb Kumam 2013

1 Dano bedo kede iik mege i cunye, do Rubanga en kame mio gi kicobere.

2 Dano twero neno be tice mege dedede beco i wange, do Rwot ngingico gikame tie i cuny dano.

3 Ket tice ni dedede i cing Rwot, en ebino mino iik ni cobere kakare.

4 Rubanga tie kede iik i kom gi dedede kame en ecweo, iik kame en etie kede i kom jo areco en alola.

5 Rwot cunye dagi jo dedede kame wakere; ngei kiber be akodi jo nogo likame bino bwot udo alola.

6 Rwot sasiro dub me jo awor di kigenere, doko da lworo Rwot mio dano gwokere likame edonyo i tim areco.

7 Kame epone me kuo ka dano moroni yomo cuny Rwot, Rwot mio jokwor me dano nono bedo kede i mulem.

8 Eber bedo kede gi atitidi kame iudo i yore kopoore, akaka bedo kede ud adwong kame iudo i yore arac.

9 Dano bedo kede iik mege, do Rwot en atele cobo gi.

10 Kope kame abaka yamo, en eyamo gi kede twer ka Rubanga; en engolo kop kakare.

11 Rwot mito misani kede latiri kame pimo jame kakare; kide me pimo jame obedo tic mere.

12 Tim areco obedo gikarac kibut abakai, pien tim kopoore en kame mio apugan cungo.

13 Abaka cunye yom winyo kope me ateni, doko da en emaro jo kame yamo kope me ateni.

14 Kame abaka odoko ger, manono twero kelo to; ngatamoro ariek tamo kweno gero me abaka nono.

15 Kame nyim abaka ler, manono mio jo kuo, doko tim mere anyuto amara but dano cal bala idoun me kot adwogo i kare me agege me iporo.

16 Udo rieko ber kalamo udo saabu; doko da yero bedo kede niang ber kalamo yero siliba.

17 Jo abeco lubo gudo kame dapo gikarac; dano agwoko ekite me kuo mere daro kuo mere.

18 Ewaka kelo ne dano peko, doko da tingere mio dano poto.

19 Eber ne dano mwolere di eko bedo ngacan, ekalamo popoko jame kame koyako kede jo awakere.

20 Jo kame winyo kope kame kopwonyo gi iye, gi dedede bedo negi kiber; ket gen ni i kom Rwot di iko bino bedo kede yomcuny.

21 Dano atie kede tam kocato me rieko en dano atie kede niang, doko da kop awinyo mit di epwot wao tam me jo.

22 Rieko obedo atan me kuo but dano ariek, do mingo obedo alola but ngamingo.

23 Dano ariek ber tamo kop kame emito yamo, manono mio kop kame eyamo wao tam me jo.

24 Kope awinyo mit cal bala mokic, ebilere mit i kuo me dano, doko emio kom dano bedo yot.

25 Tie ekite kuo moro kame dano twero neno be ber, do i ajikini mere en ebedo yongayo atero dano i to.

26 Mit me cam mio dano timo tic kitek, kec rurupo en meede tic.

27 Jo areco tic gi timo iik areco, doko da kope awok ki dog gi cal bala mac awango dano.

28 Dano atie kede ikiteso areco kelo ne jo atwomutwomun, doko da ngakwot turo awotin me jo.

29 Ngatim tim me gero ngalao jowote, di eko mino gi kidonyo i tim kalikame ber.

30 Dano amimio wange amoto aumo doge udo tie kede iik moro me timo gikarac.

31 Lwar obedo ocoro me dwongo, dano atie kede ekite me kuo kopoore en kame bedo paka ude.

32 Dano kalikame susunyo ngoi ber kalamo dano atek, doko dano atwero dino gero mere ber kalamo dano atwero mano bomba.

33 Dano uco alulu, do adwokini mere tie i cing Rwot kene.

Baibuli I Leb Kumam © Bible Society of Uganda, 2013.

Bible Society of Uganda
Lean sinn:



Sanasan