Agole 14 - Baibuli I Leb Kumam 2013

¹ Mon ariek dongo miere gi, do mon aming turo miere gi pi mingo gi.

² Dano kame ekite me kuo mere ber lworo Rwot, do ngat kame ikiteso mege reco cao Rwot acaa.

³ Yamo me joewaka tie bala ebela kame bungo gi pi ewaka gi, do kope kame jo ariek yamo gwoko gi.

⁴ Kakame ecuka li kiye cam da bedo li kiye; ecuka en kame kelo amio.

⁵ Mujura agenere likame yamo kop me abe, do mujura me abe yamo kope kalikame tie me ateni.

⁶ Ngaacae cane nono pi doko riek, do udo ngec obedo gikame yot ayota ne dano atie kede niang.

⁷ Yai tenge kibut ngat aming, pien likame en etwero mini ingeo gimoro.

⁸ Rieko mio jo ariek ngeo gikame kipoore timo, do mingo rwenyo jomingo arwenya.

⁹ Jomingo likame paro kame kitimo dub, do Rubanga cunye yom i kom dano kame ekite mege cil.

¹⁰ Dano acelacel ngeo wangcuny amoto yomcuny kame etie kede, likame dano apat twero nywako kede.

¹¹ Ot me dano arac kotuturo, do ot me dano kame ekite mege cil dong cungo di etek.

¹² Tie ikiteso mogo kame dano twero neno be ber, do di i ajikini mere etero dano i to.

¹³ Akadi ka dano tie nyero, do cengemogo udo likame cunye yom; doko da ka yomcuny kame dano tie kede otiek, cwercuny en ako lubo do.

¹⁴ Jo areco udo epera kame poore kede ekite me kuo gi, doko da jo abeco udo giamia kame poore kede tice gi.

¹⁵ Jo akwia piny yei kope dedede, do jo ariek tamo ber di pwodi likame eyei gimoro.

¹⁶ Jo ariek gwokere likame kiyei donyo i gikarac, do jo areco motar amotar timo gimoro di likame kipenyo wi gi.

¹⁷ Dano acunye rerep timo tim me mingo, doko da dano atimo iik mege i mung likame jo mito.

¹⁸ Jo akwia piny gin kiudo mingo bedo iner gi, do jo ariek epera gi obedo ngec.

¹⁹ Jo atie kede tim areco luro wi gi i nyim jo abeco; jo areco kuro kony ki erute me jo kopoore.

²⁰ Jo dedede dagi jocan, akadi paka jokio gi da dagi gi, do jo kame maro jo kobaro tot.

²¹ Jo kame cao jowot gi obedo jodubo, do kitie kede yomcuny jo kame tie kede mwolo but jocan.

²² Jo kame tie kede iik areco udo kirwenyo yongayo; jo mio wor but jo kame tie kede iik abeco, doko jo geno gi.

²³ Tice dedede kame dano cane iye tie kede ameda, do yamo ayama kenekene kelo can.

²⁴ Jo ariek epera gi en abar, do jomingo kotubuso gi kede mingo.

²⁵ Mujura ayamo kop me ateni lako kuo me jo, do mujura ayamo kop me abe duporo dano.

²⁶ Woro Rwot mio dano bedo kede gen adwong, doko idwe mege udo tie kede karingo ot gwokere.

²⁷ Lworo Rwot en obedo atan me kuo, manono mio dano bwot i owic me to.

²⁸ Dwongo me abaka cungo i wi rom me jo kame en epugo; abongo gin kony mere udo li.

²⁹ Dano kalikame susunyo doko ger tie kede niang atut, do dano kame cunye rerep nyuto mingo mere.

³⁰ Kweicuny mio kom dano bedo yot, do wangcuny cal bala tuo acamo cogo me dano.

³¹ Jo kame bedo kede adiadia but jocan udo kicao Rubanga ngat kocweo gi, do jo kame tie kede mwolo but jo kame piny oloo nyuto wor but Rubanga.

³² Jo areco kelo can i kom gi ken gi pi tim gi areco, do iponeso abeco gwoko dano kopoore.

³³ Rieko bedo i cuny jo atie kede niang bala ture, do likame en engere i cuny jomingo.

³⁴ Tim kopoore mio atekerin dwongo, do dub kelo ne ateker moroni lewic.

³⁵ Ngatic kame timo jame dedede kede rieko yomo cuny abaka, do en eger ne dano kame timo tim me lewic.