Agole 13 - Baibuli I Leb Kumam 2013

¹ Atin ariek winyo pwony kame kopwonye kede, do ngacaipiny likame yei be core.

² Jo abeco udo adwokini kobedo jamini abeco pi kope kame gin kiwaco, do jo kalikame tie kede ateni mit gin obedo tim me gero.

³ Jo kame gwoko dog gi likame yamo kope atatai gwoko kuo gi, do jo kame yamo atatai poto i can.

⁴ Dano anyap cunye twero mito gimoro kede teko dedede, do en likame ebino udo. Do dano atek tic udo gi dedede kame cunye mito.

⁵ Dano atie kede ekite kopoore dagi kope me abe, do tim me dano arac obedo me lewic.

⁶ Ekite kopoore gwoko dano kame ekite mege cil, do dub reto areta dano arac.

⁷ Jo mogo sidiko be kibaro, do kili kom kede gimoro; do jo ace mire be gin jocan, do di kitie kom kede twon abar.

⁸ Dano kobaro tio kede abar mere me lako kuo mere, do ngacan gire bedo abongo lworo moro.

⁹ Jo kopoore cal bala etala arieny kitek, do jo areco cal bala etala arieny midumidu.

¹⁰ Dano atingere di likame ewinyo kop kelo atwomutwomun, do dano kame gamo tam kame komie bedo kede rieko.

¹¹ Abar kame dano udo i yore arac dwogo piny momot momot paka tiek, do abar kame dano cane udo atitidi atitidi nyai.

¹² Ka gikame dano geno likame otimere, cunye bedo kede peko, do ka gikame dano mito ocobere, manono bedo ne bala yat amio kuo.

¹³ Ngat kame cao kop kame koyamo ne kelo can i kome kene, do dano kame lubo gikame kociko ne udo giamia me pwoc.

¹⁴ Pwony me dano ariek obedo gikame mio kuo; en emio dano bwot likame emoko i owic me to.

¹⁵ Tam me rieko mio jo neni kiber, do jo kalikame genere tie i yongayo kame mio can poto negi.

¹⁶ Dano ariek timo gi dedede i yore me rieko, do ngamingo nyuto mingo mere.

¹⁷ Aor arac kelo peko, do ngacungo agenere kelo anapakin.

¹⁸ Can karacel kede lewic mako dano kalikame yei winyo pwony, do dano kame winyo acora en eudo wor.

¹⁹ Etie gi me yomcuny ka dano oudo gikame cunye mito; weko tim areco tie gi arac twatwal kibut ngamingo.

²⁰ Ngat kame upere kede jo ariek eda edoko riek, do ngaupa me jomingo poto i can.

²¹ Peko nakanaka lubo jodubo, do jo kame ekite gi opoore udo bero.

²² Jo abeco weko ne ikwae kede ikwae gi abar pi gin sikao, do jo areco coko abar gi ne jo kame tie kede ekite kopoore.

²³ Poti koukaro twero ceko ne jocan cam atot, do jo kalikame tie kede tim me ateni karuno mano gi.

²⁴ Jo kalikame bitaro idwe gi udo likame kimaro gi, do jo kame maro idwe gi dao gi pi rieno gi.

²⁵ Jo kame tie kede ekite kopoore bedo tie kede cam kame romo gi, do jo areco bedo kec kec.