Agole 12 - Baibuli I Leb Kumam 2013

¹ Dano kame mito be mie pwony ariee udo emito medo ngec mere, do ngat kalikame mito be bunano en udo eming.

² Rwot cunye yom i kom dano aber, do en engolo kop i wi dano atie kede iik me tim areco.

³ Tim areco likame twero gwoko dano tetekeny kur peko pot i kome, do dano kopoore cungo di etek bala yat kame alias mere odonyo kakatut.

⁴ Dako aber kelo ne cware wor, do dako akelo ne cware lewic cal bala buge atie camo cogere mege.

⁵ Dano kopoore tie kede tam kapoore; do tam kame dano arac mio uci i mac.

⁶ Jo areco yamo kope kame kelo to, do kope kame jo abeco waco lako jo apat.

⁷ Kame koreto jo areco, manono bedo ajikini gi, do jo kopoore miere gi dong cungo di tek.

⁸ Ka dano tie kede tam me rieko jo pwoye, do ngat atie kede tam me mingo jo cao.

⁹ Eber ka in ibedo dano adana moro acane tic pi udo gi me acama, akaka in tingere bedo ngat adwong do di ili kede gi me acama.

¹⁰ Dano atie kede ekite kopoore gwoko leini mege, do jo areco kisa gi rom aroma kede gero.

¹¹ Ngapur atek bedo tie kede cam atot, do jo kame cane timo gimogo akony gi li wi gi likame tio.

¹² Gikame jo areco paro pi udo en timo gikarac, do jo kopoore cungo di kitek.

¹³ Jo areco moko i kope me dub kame wok ki dog gi bala moko i owic, do jo abeco bwot ki peko.

¹⁴ Kop kame wok ki dog dano en amie eudo jamini abeco; tic kame dano tio tie kede cul moro bute.

¹⁵ Jomingo nakanaka tamo be gikame gin kitimo beco, do jo ariek yei winyo tam kame komio gi.

¹⁶ Dano aming ka odoko ger, gero mere bunyo ngere, do dano ariek cunye cao ayet kame koyete kede.

¹⁷ Dano kame yamo kop me ateni mio ngec me gi kotimere kikokome, do mujura me abe yamo kop me angalo.

¹⁸ Kope kame kobolo abola yamo mio awanon me apore atut bala kame epima ocobo, do kop kame leb dano ariek waco kelo cango.

¹⁹ Kope me ateni bedo nakanaka, do kope me abe bedo pi kare atitidi.

²⁰ Jo kame timo iik me timo gikarac likame tie kede tam me ateni, do jo kame mio tam akelo mulem tie kede yomcuny.

²¹ Likame tie gimoro arac kame timere ne jo kopoore, do jo areco opong aponga kede peko.

²² Rwot dagi jo kame dog gi yamo kope me abe, do jo kame genere yomo cunye.

²³ Dano ariek likame yecakin yamo gikame en engeo, do ngat aming nyuto mingo mere kakaler.

²⁴ Jo kame timo tic kitek bedo kede twer, do jo nyapo doko ipasoi.

²⁵ Par dubo tam me dano, do kope abeco mio dano kweicuny.

²⁶ Dano atie kede ekite kopoore mio ngawote tam aber, do ekite kuo me dano arac rwenyo ngawote arwenya.

²⁷ Nganyapo likame udo gikame emito, do dano atek udo abar apire tek.

²⁸ Ekite kopoore en yongayo kame tero dano i kuo, en yongayo kame dano lubo abongo riamo kede to.