Agole 11 - Baibuli I Leb Kumam 2013

¹ Rwot cunye dagi misani akwalo jo, do cunye yom i kom misani apimo jame kakare.

² Ewaka kelo lewic. Dano ariek bedo ngat amwol.

³ Bedo kuo kede ateni en kame telo jo kame ekite gi cil, do angalo me jo kalikame genere muducaro gi.

⁴ Ka Rubanga onyuto lilo mere, abar likame twero konyo dano, do bedo kede kuo kopoore lako dano ki to.

⁵ Ekite me kuo kopoore me dano ali kede raco moro mie eudo kuo ayoyot, do dano arac poto i peko pi tim mege areco.

⁶ Ekite kuo kopoore lako dano kame ekite mege cil, do ngat kalikame tie kede ateni moko i obek me iik mege.

⁷ Kame dano arac oto, gen kame oudo etie kede da to kede en; jo kalikame paro pi Rubanga geno buo ngor.

⁸ Rwot lako dano kopoore ki peko, di dano arac en kame ko lokere poto iye.

⁹ Kope awok ki dog dano kalikame paro pi Rubanga dubo ngawote, do bedo tie kede ngec en kame lako ngat kame ekite mere opoore.

¹⁰ Kame dano kopoore oudo mulem, jo dedede me bomba cuny gi yom; bobo da kame dano arac oto, jo dedede lelo.

¹¹ Bomba udo dwongo kame jo kame ekite gi cil omie winyo, do kope awok ki dog jo areco rete areta.

¹² Dano kame yamo kope me acae i kom ngawote udo wie likame tio, do dano ariek gire ling alinga.

¹³ Ngat akwoto jo sarakino mung me jo apat, do dano kame genere kano mung me jo.

¹⁴ Ekodet moroni poto ka likame komie tam, do peko moro likame twero poto kakame jo amio tam tot iye.

¹⁵ Cungo ne dano kame mito kopo banya di in likame ingee kelo ni peko, do ka in idagi timo kamanono udo peko ni moro li.

¹⁶ Dako kangakisa jo woro, do dako ali kede iponeso abeco obedo gi me lewic. Dano aluruluru bedo ngacan, do dano awange tek en kame udo abar.

¹⁷ Dano amwol timo ne kome kene bero, do dano ager wanere kene.

¹⁸ Cul kame dano arac udo kony mere li, do dano atimo gi kopoore udo cul me ateni.

¹⁹ Dano kame dong moko timo gikame ber bino kuo, do ngat kame moko amoka timo gikareco bino to.

²⁰ Rwot cunye dagi jo kame tie kede tam areco, do en cunye yom i kom jo kame bedo abongo raco moro.

²¹ Ngeunu kiber be jo areco bino udo alola, do jo kopoore bino bwot.

²² Dako acil do di eli kede tam aber udo cal bala mwola me saabu kame oketo i um epege pi tamakino tubuso en.

²³ Gikame cuny jo kopoore mito kelo bero, do gen me jo areco wango cuny jo.

²⁴ Jo mogo mio gikame kitie kede abongo paro da, do di kiko medo baro ameda; do jo ace nwang kede jamini gi, do can doko ko meede negi ameda.

²⁵ Ngat amio jame mege di cunye ilajara en ebino medo baro, doko da ngat amio jo pii me amata, eda jo bino mine pii me amata.

²⁶ Jo lamo dano kame kano kodere pi daro kede wel amalo, do kikwao ne ngat kame cato mege winyo.

²⁷ Kopwoyo dano acane timo gikame ber, do ngat amo peko ude.

²⁸ Jo kame keto gen gi i abar gi bino bedo bala boke oner, do jo atie kede ekite kopoore bino bedo bala boke alibaliba.

²⁹ Ngat kame lolo wi jo i diakal gi likame bino sikao gimoro, di ngamingo nono ko bino doko epasoit me ngat awie riek.

³⁰ Jo kame ekite gi opoore tie bala yat amio kuo but jo apat, do bedo me gero gero kwanyo kuo me jo.

³¹ Jo kame ekite gi opoore koculo gi i wi lobo kan, pi manono ateteni kobino da mino jo areco kede jodubo alola!