Ageini 40 - Baibuli I Leb Kumam 2013

Yosepu Ogonyo Dwong me Lek me Mabus Are

¹ Ceng moro acel, ngaik bwini me abaka me Misiri kede ngated mugati mere oko wango cuny abaka.

² Parao bin cunye oko wang kede jotic mege are nogi,

³ di eko keto gi i otkol kame tie i ot me ngatel me isirikalen jodar paco me Parao, kakame oudo kotweo Yosepu iye.

⁴ Ngatel me isirikalen bin oko mino Yosepu tic me gwoko gi, di gin kiko bedo i otkol tieko kare moro.

⁵ Iwor moro acel, gin cuo are nogo, ngaik bwini kede ngated mugati me abaka me Misiri oko lek. Lek me ngat acelacel oudo pat, doko dwong gi da pat.

⁶ Kakame Yosepu bin oko bino kede but gi odiko, en eko neno be gin oudo kitie kede par.

⁷ Di en eko penyo jodongo me jotic ka Parao nogo, jo kame bin kotweo karacel kede en i ot me ngadwong mere be, “Pinyo bo komio wun tin itienu iturur kamano?”

⁸ Gin di kiko gamo be, “Wan tin oleko, do likame tie ngatamoro kame romo gonyo ne wa dwong me lek nogo.” Yosepu oko waco negi be, “Mam Rubanga en kame mio jo twer me gonyo dwong me lek? Tatamunu nango lek nogo.”

⁹ Di ngaik bwini me abaka oko tatamo ne Yosepu lek mere. En ewaco be, “Ango aleko be oudo olok tie i nyima;

¹⁰ olok nono oudo tie kede jange adek. Di pwodi en elibo aliba, oyotoyot di ature mege wok, di anyakini mege da cek.

¹¹ Ango oudo amako ikopo ka Parao i cinga; di ako kwanyo anyakini me olok ako bino gi i ikopo ka Parao nono, di ako keto ikopo nono i cing Parao.”

¹² Yosepu oko waco ne be, “Dwong mere ine: ajange adek en ceng adek;

¹³ Ingei ceng adek Parao bino woti ki otkol di eko dwoki i tic ni, di in iko bino keto i kopo ka Parao i cinge, bala kame lem in itimo di in oudo ibedo ngaik bwini mere.

¹⁴ Do iyutuno ango da i kare kame itie kede kiber. Akwai itim na bero, iwac peko na but Parao, di iko konya awok ki kan.

¹⁵ Pien i ateni ango bin kokwala akwala i lobo me Iburanian, doko ki kan da likame tie gimoro kame ango atimo kame mio koto kopoore keta i otkol.”

¹⁶ Kakame bin ngated mugati me abaka oneno kede be dwong me lek me ngaik bwini me abaka oudo ber, en eko waco ne Yosepu be, “Ango da aleko be oudo atie yeno aditai adek me mugati.

¹⁷ Adita me malo oudo tie iye mugati me epone dedede kame koiko ne Parao, do winy oudo tie camo gi ki adita kame oudo tie i wia.”

¹⁸ Di Yosepu oko gamo be, “Dwong mere ine: aditai adek gin en ceng adek;

¹⁹ ingei ceng adek Parao bino woti ki otkol di eko mino kongolo wi tenge di oko liero komi i epir di winy ko bino camo ringo komi.”

²⁰ Ceng me adek mere oudo obedo ceng kame konywalo iye Parao. En eko tedo ebaga ne jotic mege dedede, di eko woto ngaik bwini mere kede ngated mugati mere ki otkol, di eko kelo gi i nyim jotic mege.

²¹ En eko dwoko ngaik bwini mere i wang tic mere, di en eko keto i kopo i cing Parao.

²² Do ngated mugati mere en eko mino koliero i epir bala kame Yosepu oudo owaco.

²³ Do ngaik bwini me abaka likame bin oko yutuno Yosepu, wie oko wil i kome atwal.