Ageini 35 - Baibuli I Leb Kumam 2013

Rubanga Omio Yakobo Winyo i Betel

¹ Rubanga oko waco ne Yakobo be, “Yai di iko ot paka Betel di iko donyo bedo kuno. Geri alutari kuno ne Rubanga konyutere buti i kare kame iringo kede kibut omini Esau.”

² Yakobo oko waco ne jo me ode karacel kede jo dedede kame oudo tie kede be, “Ucunu tenge rubangan mogo me kumbor kame nan tie i diere wu, ikounu lonyere di ikounu loko igoen wu.

³ Di do okounu yai ot Betel, kakame ango abino gero iye alutari ne Rubanga kame bin ogamo koko na i kare kame oudo atie kede i peko, doko ebedo tie keda i kabedo dedede kame ango abedo ot iye.”

⁴ Aso, gin kiko mino Yakobo rubangan dedede me kumbor, kede mwolere kame oudo tie i yit gi; Yakobo oko kano gi i dud ejinga kame oudo iyapi kede Sekem.

⁵ Kakame oudo gin kitie ot kede, Rubanga oko mino jo me bomban dedede kame iyapi kede gi lworo, omio likame ngatamoro oko wapo gi.

⁶ Yakobo kede jo dedede kame oudo tie kede en oko tuno Lus, kakame nataman kolwongo be Betel i lobo me Kanan.

⁷ En eko gero alutari kuno di eko lwongo kanono be El Betel, pien kanono en kame oudo Rubanga onyutere ne kiye i kare kame eringo kede kibut omin mere.

⁸ Di Debora, ngat kame bin gwoko Rebeka, oko to di oko yike i dud ejinga kame tie i aditot piny me Betel, oko lwongo yat nono be, Allon Bacut.

⁹ Rubanga bobo oko nyutere but Yakobo kakame ebino kede ki Mesopotamia, di eko mine winyo.

¹⁰ Rubanga owaco ne be, “Nyingin Yakobo; likame bobo kobino lwongi be Yakobo, do kobino lwongi be Isirael.” Nyinge oko do doko Isirael.

¹¹ Rubanga owaco ne be, “Ango Rubanga Won Twer, nywali iko nyai; ateker kede atekerin bino wok kibuti, kede abakai bino wok kibuti.

¹² Abino mini lobo kame oudo amio Aburaam kede Isaka, doko abino mino lobo nono but ikwae ni.”

¹³ Di Rubanga oko yai oweko Yakobo kakame eyamo kede kiye.

¹⁴ Yakobo oko sipo kidi kakame Rubanga oyamo kede kiye; eko onyo iye bwini bala giayala kede mo.

¹⁵ Aso, Yakobo oko lwongo kabedo kame Rubanga oyamo kede kiye nono be Betel.

To ka Lakeri

¹⁶ Yakobo kede jo me paco mere oko yai ki Betel. Kakame oudo pwodi kitie kede kakabobor kede Epurat, kare me nywal ka Lakeri oko tuno; nywal mere oko bedo tek.

¹⁷ Kakame oudo aramo me nywal ocere ne kede, ngat kame oudo tie cole oko waco ne be, “Lakeri, kur ibed kede lworo, iudo bobo atin awobi.”

¹⁸ Kakame oudo cunye tie cot kede (pien eko to), en eko cako nying atin nono be Benoni, do papa mere oko cako ne be Benjamin.

¹⁹ Aso, Lakeri oko to, di oko yike i nget yongayo me Epurat (en Betelem),

²⁰ di Yakobo oko sipo kidi i wi ates mere. Kidi me ates ka Lakeri nono tie cungo tuno tin.

²¹ Isirael oko meede kede ot mere di eko guro eema mere i ngei gedo abor me Eder.

Awobe ka Yakobo

²² Kakame Yakobo oudo tie bedo kede i lobo nono, Ruben oko buto kede Bilka, kame oudo obedo ngat acel kikom mon ka papa mere; Yakobo oko winyo kop nono. Yakobo oudo tie kede awobe tomon kiwie are.

²³ Awobe ka Lea gin ige: Ruben (kao ka Yakobo), Simeon, Lebi, Yuda, Isakar kede Sebulun.

²⁴ Awobe ka Lakeri gin ige: Yosepu kede Benjamin.

²⁵ Awobe ka Bilka, ngat koudo obedo apasoit ka Lakeri gin ige: Dan kede Naputali.

²⁶ Awobe ka Silipa, ngat koudo obedo apasoit ka Lea gin ige: Gad kede Aser. Magi oudo obedo awobe ka Yakobo kame enywalo di etie Mesopotamia.

To ka Isaka

²⁷ Yakobo oko dok but papa mere Isaka kakame kolwongo be Mamure, i nget Keburon. Kanoni en kame Aburaam kede Isaka oudo obedo iye bala jokumbor.

²⁸ Isaka oko bedo paka mwaka me dongo mere romo tol acel kede ot kanyauni (180)

²⁹ di eko to di oudo eti twatwal; awobe mege, Esau kede Yakobo oko yike.