Ageini 33 - Baibuli I Leb Kumam 2013

Yakobo Oriamo kede Esau

¹ Aso, Yakobo oko tingo wange di eko neno di Esau tie bino kede cuo tol ongwon (400). Di do en eko popoko idwe mege ne Lea kede Lakeri kede ne ipasoi are.

² En eko cibo apasoi kede idwe gi anyim, di Lea kede idwe mege oko lubo, di do Lakeri kede Yosepu oko bedo ki cen.

³ Yakobo kikome oko kato anyim di eko ot paka tuno but omin mere; eluro wie piny tien kanyaare kakame oudo etie ot kede bute.

⁴ Do Esau oko ringo bute di oko gwako ngute di kiko donyo koko.

⁵ Kakame Esau otingo kede wange eko neno mon kede idwe, en eko penyo Yakobo be, “Alu ige atie kedi gi?” Yakobo oko dwoko be, “Gin kibedo idwe kame Rubanga omio ngatic ni pi kisa mere.”

⁶ Di do apasoi oko nyiko kunono, gin kede idwe gi, di kiko luro wi gi piny.

⁷ Lea kede idwe mege da oko nyiko kunono, gida kiko luro wi gi piny; me ajikini Yosepu kede Lakeri da oko nyiko kunono, gida kiko luro wi gi piny.

⁸ Esau oko waco be, “Do twon esirit me leini kame ango ariamo kede gi dedede menyo?” Yakobo oko dwoko be, “Me yomo cuny adwong na di eko bino timo na bero.”

⁹ Do Esau oko waco be, “Omina, ango atie kede jamini aroma, in wek gigo dong megi.”

¹⁰ Yakobo oko waco be, “Li, okwe; ka in itieko yei pi timo nango bero poore iyei giamia me cinga, pien ateteni neno wangi rom aroma bala neno wang Rubanga, pien in igama iepone aber twatwal.

¹¹ Okwe gam giamia na kame akelo buti, pien Rubanga otimo na tim me kisa, doko da ango atie kede gi dedede kame amito.” Aso, en eko ngangao omin mere tuno en yei gamo gi.

¹² Esau oko waco be, “Oyai omak yongayo, ango abino ot karacel kede in.”

¹³ Do Yakobo oko waco ne be, “Adwong na, in ingeo be idwe pwodi nep, doko miero apar pi romini kede dok kame doto idwe; ka akolo gi tetek pi ceng acel gin dedede kibino totoun.

¹⁴ Pi mano, adwong na, in tel ne ngatic nin yongayo, di ango ako bino donyo lubi momot di lubere kede kite kame dok kame tie i nyima kede idwe twero ot kede, paka tuno di ango ako bino udi Seir.”

¹⁵ Esau oko waco be, “Kong awek ni jo mogo kame tie keda.” Do Yakobo oko dwoko be, “Adwong na, kara itie lole pinyo?”

¹⁶ Aso, cenge nono Esau oko mako yongayo cako dok Seir.

¹⁷ Do Yakobo oko ot Sukot eko gero ot kuno kede awi ne doke mege, pi mano kolwongo kanono be Sukot.

¹⁸ Kakame oudo etie dwogo kede ki Mesopotamia, Yakobo oko tuno kede mulem i bomba me Sekem i lobo me Kanan, di en eko guro eema mere i nyim bomba.

¹⁹ En eko wilo lobo kame oudo egero iye eema nono pi silingi me siliba tol acel kibut ikwae ka Kamor, en papa me Sekem.

²⁰ En eko gero alutari kuno di eko cako nyinge be El, Rubanga me Isirael.