Ageini 32 - Baibuli I Leb Kumam 2013

Yakobo Oikere pi Riamo kede Esau

¹ Yakobo oko mako yongayo mere, di imalaikan ka Rwot oko riamo kede en.

² Kakame eneno gi kede, en eko waco be, “Magi en isirikalen ka Rubanga!” Aso, en eko cako nying kanono be Makanaim.

³ Yakobo oko oro jo telo nen anyim ot but omin mere Esau i kabedo kame kolwongo be Seir, i piny me Edom.

⁴ En ewaco negi pi waco ne Esau be, “Ngatic ni Yakobo owaco be, ‘Ango atieko bedo kede Laban bala ngakumbor tuno nan.

⁵ Nan atie kede twonin, pundan, romini, ipasoi kede apasoi. Nan ango atie cwano nin kop, adwong na, kede gen me in bedo kede cuny aber buta.’ ”

⁶ Kakame jo kame ooro odwogo kede but Yakobo, gin kiko waco ne be, “Wan ooto but omini Esau, nan en etie bino pi riamo kedi, etie upere kede cuo tol ongwon.”

⁷ Lworo oko mako Yakobo di kome oko to. En eko poko jo kame oudo etie kede, romini, kede dok kede aguraguran i ikodeta are,

⁸ di oudo eparo be, “Ka Esau obino di eko nekaro ekodet acel, ekodet ocelu bino bwot.”

⁹ Yakobo oko lego be, “Okwe Rubanga ka kwaru na Aburaam kede Rubanga ka papa na Isaka; Okwe in Rwot ngat kame iwaco na be, ‘Doki i piny ni kede but joawade ni, di ango ako bino timo ni bero,’

¹⁰ ango likame apoore pi udo amara kalikame lokere kede genere dedede kame inyuto ne ngatic ni. Bin ango angolo ecilet me Yorodan kede ebela kenekene, do nan adwogo kede ikodeta are gi.

¹¹ Okwe laka ki cing omina, ki cing Esau, pien ango atie kede lworo bute; etwero bino di eko neko wan dedede, mon kede idwe.

¹² Do di in oudo iwaco be, ‘Ateteni abino timo ni bero, di ako mino ikwae ni doko tot bala asinge me dog nam, kalikame twero marere pi tot gi.’ ”

¹³ En eko tieko iwor nono dedede kuno, di eko kwanyo giamia kikom gikame oudo etie kede di eko tero ne omin mere Esau:

¹⁴ ekwanyo diegi amon tol are (200) kede ikoroi ot are (20); romini amon tol are (200) kede imerekekin ot are (20);

¹⁵ aguraguran adoto idwe ot adek (30) kede idwe gi; dok amon ot ongwon (40) kede twonin tomon (10); pundan amon ot are (20) kede acuo tomon (10).

¹⁶ Magi dedede en eketo i cing jotic mege, ekodet acelacel i cing ngatic acel. En ewaco negi be, “Wun telanu yongayo, do wekunu kakatwolo i dierediere me ekodet acelacel.”

¹⁷ En eko waco ne ngatic kotelo anyim be, “Ka omina Esau oriamo kedi di eko penyi be, ‘Ngadwong ni en ngai? Itie ot tuai? Leini kame tie i nyimi go obedo me ka ngai?’

¹⁸ in poore idwoke be, ‘Gin kibedo me ka ngatic nin Yakobo; gin kibedo mic kame en ecwao ne ngadwong mere Esau, doko da en etie cen ngei wa.’ ”

¹⁹ En eko waco kop acel nono ne ngatic me are, kede me adek kede apat mege dedede kame oudo kolo leini be, “Wun ipoorenu waco kop acel nono ne Esau ka iriamunu kede en.

²⁰ Wacenu be, ‘Ebo, ngatic ni Yakobo tie cen ngei wa.’ ” Piento en oudo ebedo paro be, “Giamia kame ango acwao ne bino yomo cunye, di ango ako sobolo bino riamo kede, cengemogo eko bino gama.”

²¹ Aso, en eko cwano giamia otelo nen anyim, do en eko dong cen ebuto i eema.

Yakobo Oute kede Dano i Peniel

²² Iwor nono Yakobo oko yai eko kwanyo mon mege are, apasoi mege are, kede idwe mege tomon kiwie acel di eko ngolo ecilet me Jabok.

²³ En etero gin eko mino gi kingolo pii, di eko cwano jame mege kame oudo etie kede da loka tuca.

²⁴ Yakobo oko dong en kene; icuo moro oko bino di oko ute kede tuno odiko.

²⁵ Kakame icuo nono oneno kede be likame eko sobolo bwono Yakobo, en eko dongo etul ka Yakobo; etul ka Yakobo oko gwete kakame oudo etie ute kede lonono.

²⁶ Icuo nono oko waco be, “Ber ango aoti, pien piny tie ru.” Do Yakobo oko waco be, “Likame ango abino yei ni ot, paka tuno di ilamo na winyo.”

²⁷ Icuo nono oko penye be, “Nyingi ngai?” En eko dwoko be, “Nyinga Yakobo.”

²⁸ Icuo nono oko waco ne be, “Likame bobo kobino lwongi be Yakobo, do kobino lwongi be Isirael, pien in itieko ute kede Rubanga kede jo di iko bwono gi.”

²⁹ Di Yakobo oko kwane be, “Okwe yama nyingi.” Do en eko waco be, “Pinyo komio itie penyo nyinga?” Di do eko lamo ne Yakobo winyo ki kanono.

³⁰ Aso, Yakobo oko waco be, “Ango atieko neno Rubanga wang i wang, do di ako dong kuo,” omio eko cako nying kanono be Peniel.

³¹ Di ceng oko wok kakame Yakobo oudo tie yai kede ki Peniel, di ekomo pi etul mere.

³² Pi manono, tuno tin jo me Isirael likame camo ringo me etul, pien bin kodongo ringo me etul ka Yakobo.