Ageini 30 - Baibuli I Leb Kumam 2013

¹ Kakame Lakeri oneno kede be en likame enywalo ne Yakobo atin moro, nyeko oko make kede amin mere, di eko waco ne Yakobo be, “Miada aud idwe, aso ka li ango ayaro to.”

² Yakobo oko doko ger ne Lakeri di eko waco ne be, “Iparo be ango do adoko Rubanga, ngat kotwoni nywal?”

³ Lakeri oko waco be, “Bilka, nyako ngakonya ine, but kede me wek enywal nada idwe.”

⁴ Aso, en eko mino Yakobo Bilka nyako ngatic mere pi bedo dako mere; Yakobo oko buto kede Bilka.

⁵ Bilka oko yac di eko nywalo ne Yakobo atin awobi.

⁶ Di Lakeri oko waco be, “Rubanga otieko ngolo na kop kiber, doko da etieko winyo dwana eko mina atin awobi”; en eko cako nyinge Dan.

⁷ Bilka doko oko yac di eko nywalo ne Yakobo atin awobi me are.

⁸ Di Lakeri oko waco be, “Aute auta atek kede amina di ako bwone”; omio en eko cako ne nyinge be Naputali.

⁹ Kakame Lea oneno kede be ejiko nywal, en eko kwanyo Silipa nyako ngatic mere di eko mine but Yakobo pi doko dako mere.

¹⁰ Di Silipa nyako ngatic ka Lea oko nywalo ne Yakobo atin awobi.

¹¹ Lea oko waco be, “Atie kede winyo aber!” En eko cako nyinge Gad.

¹² Silipa ngatic ka Lea oko bobo nywalo ne Yakobo atin awobi me are.

¹³ Lea oko waco be, “Atie kede yomcuny! Pien mon bino waco be ango atie kede yomcuny”; omio en eko cako nyinge Aser.

¹⁴ I kare me nyaro engano, Ruben oko ot i poto eko udo yat kame mio mon yac i poto kuno, en eko kelo yat nono ne toto mere Lea. Lakeri oko waco ne Lea be, “Okwe miada yat ka wodi kame mio mon yac.”

¹⁵ Lea oko dwoko be, “Iparo be ebedo gi atitidi me in mano cwara? Imito doko da tero yat ka woda kame mio mon yac?” Lakeri oko waco be, “Ka imia yat ka wodi kame mio mon yac, ibino buto kede Yakobo iwor atin.”

¹⁶ Kakame Yakobo odwogo kede ki poto otieno, Lea oko ot pi siramo en, di eko waco ne be, “Miero ibut keda; pien atieko wili kede yat ka woda kame mio mon yac.” Aso, Yakobo oko buto kede iwor nono.

¹⁷ Rubanga oko winyo koko ka Lea, en eko yac di eko nywalo ne Yakobo awobi me kany.

¹⁸ Lea oko waco be, “Rubanga otieko cula, pien ango amio cwara nyako ngatic na”; omio en eko cako nyinge Isakar.

¹⁹ Lea oko yac bobo di eko nywalo ne Yakobo awobi me kanyape.

²⁰ Lea oko waco be, “Rubanga otieko mina giamia aber; nan do cwara bino wora pien ango atieko nywalo ne awobe kanyape”; omio en eko cako nyinge Sebulun.

²¹ Ingei manono en eko nywalo atin nyako di eko cako nyinge Dina.

²² Rubanga oko yutuno Lakeri, di Rubanga oko mine nywal.

²³ En eko yac di eko nywalo atin awobi, eko waco be, “Rubanga okwanyo lewic na.

²⁴ Akwae emia bobo awobi ace”; omio en eko cako nyinge Yosepu.

Yakobo Obaro i Wi Laban

²⁵ Kakame Lakeri onywalo kede Yosepu, Yakobo oko waco ne Laban be, “Weka do aoti, tetekeny adok turwa i piny wa.

²⁶ Miango idwe kede mon na di iko weka aoti, pien ango atieko timo nin tic pi gin bedo mega. In ingeo kiber tic kame ango abedo timo ni.”

²⁷ Laban oko waco be, “Yei na waco be: ango atieko niang di lubere kede tic me tuco kop me anyim kede komungere be, Rubanga omiango winyo pi in.

²⁸ Waca cul kame in imito di ango ako bino culi.”

²⁹ Yakobo oko dwoko ne be, “In kikomi ingeo epone kame ango atimo ni kede tic, kede epone kame leini ni onyai kede i cinga.

³⁰ Pien oudo in itie kede leini anonok di pwodi likame ango abino kan, do nan do kitieko doko tot twatwal; doko Rwot obedo mini winyo i kabedo dedede kame ango abeo iye. Do awene do kame ango abino gwoko kede jo tura da?”

³¹ Laban oko penye be, “Imito be ami nyo?” Yakobo oko dwoko be, “Ango likame amito cul moro; ango abino meede gwoko leini nin ka in iyei timo kaman:

³² yei nango bebeo i diere me leini nin dedede tin, di ako kwakwanyo romini dedede enyanga kede esisi, kede idwe romini acuo acol dedede, kede da diegi enyanga kede esisi; magonogo en kame bino bedo cul nango.

³³ I kare me anyim in ibino neno ateni nango, ka in ibino pi neno cul kame in imia. Ka in iuda kede diegi kalikame obedo enyanga kede esisi, kede idwe romini acuo kalikame col, magonogo udo akwalo akwala.”

³⁴ Laban oko waco be, “Mano ber! Wek etimere bala kame in iwaco.”

³⁵ Do i ceng nono Laban oko kwanyo ikoroi ekomol kede esisi, kede diegi amon dedede anyanga kede asisi, kede apat dedede kame tie kede kakatar, kede idwe romini acuo acol dedede di eko keto gi i cing awobe mege pi daro gi.

³⁶ En eko yai eoto tenge kakabor kibut Yakobo, kakame romo sapali me ceng adek. Yakobo oko dong kwano leini ka Laban ace apat.

³⁷ Yakobo oko jako ajange me egere me yen adek, eko kikiso kagamogo ki ngei gi tetekeny kibed tie kede kakacol kede kakatar.

³⁸ En eko keto yen kame ekikiso nogo i nyim leini i atuba kame kimato kiye pii. En oudo eketo gi kanono pien leini kwarere kame kibino mato pii.

³⁹ Aso, kame leini oudo okwarere i nyim yen nogo, gin oudo kiko nywalo idwe esisi, enyanga kede ekomol.

⁴⁰ Yakobo oko leko tenge romini kikom diegi di eko pimo nyim gi i kom me ka Laban kobedo esisi kede acol; di en eko poko leini mege kargi ken gi, likame enyalo gi kede me ka Laban.

⁴¹ Tek kame leini akingir oudo tie kwarere, Yakobo oudo pielo jang yen kame ekikiso nogo i atuba me mato pii i nyim gi tetekeny kiyac di yen nogo tie i nyim gi kanono.

⁴² Do oudo likame eketo jang yen nogo i nyim leini agodogodo. Manono oko mino Laban obedo tie kede leini agodogodo di Yakobo oko bedo tie kede leini akom gi yot.

⁴³ Manoni oko mino Yakobo obaro twatwal di eko bedo tie kede leini atot, ipasoi kede apasoi, kede aguraguran kede pundan.