Ageini 29 - Baibuli I Leb Kumam 2013

Yakobo Otuno Paco ka Laban

¹ Di Yakobo oko meede kede sapali mere, di eko tuno i lobo kame tie tetu kide.

² En eko ngoole i atan moro i wi itela di esipan adek me romini tie buto i ngete, pien romini oudo mato atan nono. Kidi kame tie i wen atan nono oudo dwong.

³ Ka romini dedede oudo ocokere kanono, jokwat oudo loro kidi nono tenge ki wen pii, di kiko mino romini mato pii, di gin kiko dwoko kidi nono kakare i wen pii.

⁴ Yakobo oko waco negi be, “Imiegu na, wun iwokunu ki tuai?” Gin kiko dwoko be, “Wan owok ki Aran.”

⁵ En eko penyo gi be, “Ingeunu Laban wot ka Nakor?” Gin kiko dwoko be, “Wan ongee.”

⁶ En eko penyo gi be, “Kome yot?” Gin kiko dwoko ne be, “Kome yot, nyare, Lakeri da ine tie bino kede romini mege.”

⁷ En eko waco negi be, “Nenunu, piny pwodi i dier iceng; esawa pwodi likame oromo me coko romini karacel. Miunu romini mat pii di ikounu tero gi kioti kicam lum.”

⁸ Do gin kiko dwoko be, “Wan likame otwero timo manono tuno di romini dedede otieko cokere karacel, di oko loro kidi tenge ki wen pii di do oko mino romini mato pii.”

⁹ Kakame oudo pwodi Yakobo tie yamo kede gi, Lakeri oko tuno kede romini ka papa mere; piento en kame oudo etie kwano gi.

¹⁰ Kakame Yakobo oneno kede Lakeri nyar ka neru mere Laban kede romini ka papa mere, Yakobo oko ot di eko loro kidi tenge ki wen atan, di eko mino romini ka neru mere Laban omato pii.

¹¹ Yakobo oko noto Lakeri di eko kok kitek.

¹² Yakobo oko waco ne Lakeri be en wad kede papa mere; be en ebedo wot ka Rebeka. Lakeri oko ringo eoto yamo ne papa mere.

¹³ Kakame Laban owinyo kede kop i kom Yakobo wot ka amin mere, en eko ringo bute pi riamo kede, di eko gwake eko donyo note, di do eko tere i ode. Yakobo oko tatamo ne gi dedede kotimere,

¹⁴ di Laban oko waco ne be, “Ateteni in kede ango obedo kom kede remo acel.” Yakobo oko bedo kede pi duwe acel.

Yakobo Otimo Tic pi Nyomo Anyira ka Laban

¹⁵ Laban oko waco ne Yakobo be, “In likame ipoore timo nango tic nono, be pien in wad kede ango. Waca, imito be aculi nyo?”

¹⁶ Laban oudo tie kede anyira are, nyako adwong oudo nyinge Lea, do nyako atidi oudo nyinge Lakeri.

¹⁷ Lea oudo neno wange ber, do Lakeri oudo idengelel di ecil.

¹⁸ Yakobo oudo cunye mito Lakeri, omio eko waco be, “Abino timo ni tic pi mwakini kanyaare pi nyomo nyari atidi Lakeri.”

¹⁹ Laban oko waco be, “Eber ka ango amie buti akaka ango mine but icuo moro ace; bed keda.”

²⁰ Aso, Yakobo oko tic pi mwakini kanyaare pi nyomo Lakeri, do mwakini nogo obedo ne bala ceng anonok pi amara kame oudo etie kede but Lakeri.

²¹ Yakobo oko waco ne Laban be, “Mia do dako na aribere kede, pien mwakini kanyaare otiek.”

²² Aso, Laban oko coko jo dedede me adul nono di eko tedo ebaga.

²³ Do otieno Laban oko tero ne Yakobo Lea akaka Lakeri, en eko buto kede.

²⁴ (Laban oko mino Silipa, nyako ngatic mere but nyare Lea pi bedo ngakonye.)

²⁵ Odiko kakame piny oru kede, Yakobo oko poi eudo be Lea inonono. Yakobo oko waco ne Laban be, “Nyo ine kame in itimo nango? Mam oudo ango atimo ni tic pi nyomo Lakeri? Do pinyo komio iko ngala?”

²⁶ Laban oko dwoko be, “Mano obedo gi kalikame kotimo i piny wa ni, me mino nyako atidi cako nyomere ne nyako adwong.

²⁷ Tiek ber sabiti me ebaga me nyomo man, di wan oko bino mini maca da ka in iyei bobo tic pi mwakini kanyaare.”

²⁸ Yakobo oko yei, di eko tieko sabiti me ebaga me nyomo Lea; di Laban oko bobo mine nyare Lakeri pi bedo dako mere.

²⁹ (Laban oko mino Bilka, nyako ngatic mere but nyare Lakeri pi bedo ngakonye.)

³⁰ Aso, Yakobo oko buto kede Lakeri da, doko oudo en emaro Lakeri kalamo Lea. En eko timo ne Laban tic pi mwakini kanyaare ace bobo.

³¹ Di bin Rwot oneno be Yakobo oudo maro Lakeri kalamo Lea, en eko mino Lea nywal, do eko mino Lakeri obedo adonge.

³² Lea oko yac di eko nywalo atin awobi, di eko cako nyinge Ruben; piento en ewaco be, “Pien Rwot otieko neno can na, ateteni cwara nan do bino mara.”

³³ En eko yac bobo eko nywalo awobi, en eko waco be, “Rwot omia atin awobi ni da piento en etieko winyo be likame komara”; en eko cako nyinge Simeon.

³⁴ En bobo eko yac di eko nywalo atin awobi, en eko waco be, “Nan do cwara bino moko i koma, pien atieko nywalo ne awobe adek”; en eko cako nyinge Lebi.

³⁵ En bobo eko yac di eko nywalo atin awobi, di eko waco be, “Nan abino do pako Rwot”; en eko cako nyinge Yuda. En eko do ber weko nywal.