Ageini 28 - Baibuli I Leb Kumam 2013

¹ Isaka oko lwongo Yakobo di eko kwano ne yongayo aber, di ewaco ne be, “In likame ibino nyomo dako me Kanan.

² Ot Mesopotamia i paco ka Betuel, en papa me toto ni, di iko nyomo nyako acel kikom anyira ka neru ni Laban.

³ Akwao Rubanga Won Twer emi winyo iko nywal iko nyai, tetekeny idokunu twon jo atot.

⁴ Akwae emi gikame ecikere pi mino Aburaam, in karacel kede ikwae ni, tetekeny lobo kame nan in ibedo iye bala ngakumbor dok meru, en lobo kame bin Rubanga omio Aburaam.”

⁵ Kikano Isaka oko cwano Yakobo, di Yakobo oko ot paka Mesopotamia but Laban wot ka Betuel, dano me Aram; Laban oudo obedo omin me toto me Yakobo kede Esau.

Esau bobo Onyomo Dako Ace

⁶ Esau oko ngeno be Isaka omio Yakobo winyo di eko cwane ot mono dako i Mesopotamia. Oudo engeo da be kakame Isaka omio kede Yakobo winyo, en ewaco ne da be kur enyom dako me Kanan.

⁷ En eko niang da be Yakobo oko yei winyo kop ka papa mere kede toto mere, eko yai eoto Mesopotamia.

⁸ Aso, kakame Esau oneno kede be mon me Kanan likame oyomo cuny papa mere Isaka,

⁹ en eko ot but Isimael wot ka Aburaam di eko nyomo nyare kame nyinge Makalat, amin me Nebaiot; Makalat oko doko dako mere medo i kom mon kame oudo etie kede sek.

Lek ka Yakobo i Betel

¹⁰ Yakobo oko yai ki Beereseba eko ot tetu Aran.

¹¹ En eko tuno kabedo moro di eko buto iye, pien ceng oudo odonyo. En ekwanyo kidi ki kanono eko buto piny eteno iye wie.

¹² En eko leko be oudo tie madala kame kosipo i wi lobo, kame wie oudo tuno malo, di imalaikan ka Rubanga oudo tie dere kiyito kede malo kede di kiwok kede piny.

¹³ Rwot oko cungo i ngete di oko waco ne be, “Ango en Rubanga ka kwaru ni Aburaam kede Rubanga ka Isaka; lobo kame nataman itie buto iye noni ango abino mino buti karacel kede ikwae ni.

¹⁴ Ikwae ni bino bedo tot bala asinge kame tie i wi lobo. Gin kibino nyai kiko sarakin dok tetu tim, tetu kide, tetu malo kede tetu piny; doko jo dedede me wi lobo bino udo winyo pi in kede pi ikwae ni.

¹⁵ Ngei kiber be ango abino bedo tie kedi, doko abino gwoki i kabedo dedede kame in ioto iye, di ako bino dwoki i lobo noni. Ango likame abino weki tuno di atieko timo gikame acikere pi timo ni.”

¹⁶ Yakobo oko cei ki wang nino di eko waco be, “Ateteni Rwot tie kane, ango oudo likame angeo!”

¹⁷ Lworo oko make di eko waco be, “Kan tin obedo kabedo me lworo benyo! Manoni en ot ka Rubanga, doko en erute me malo.”

¹⁸ Odiko sek di piny oru, Yakobo oko yai eko kwanyo kidi kame oudo eteno iye wie di eko sipe malo, di eko onyo mo i wie.

¹⁹ En eko lwongo kabedo nono be Betel; do i agege nying bomba kame oudo tie kanono en Lus.

²⁰ Di Yakobo oko kwongere but Rubanga be, “Ka ibedo tie keda, di iko gwoka i sapali kame nataman atie ot iye, di iko mina mugati me acama kede egoe me angapa,

²¹ tetekeny ako dok tuno i ot ka papa na kede mulem, abino mini ibedo Rubanga na.

²² Kidi me iyutun kame ango atieko sipo bino bedo kakame kowori kiye; doko ateteni abino mini acel me tomon me gi dedede kame imia.”