Ageini 21 - Baibuli I Leb Kumam 2013

Nywalo Isaka

¹ Rwot bin oko timo ne Sara gikame oudo etieko cikere iye.

² Sara oko yac di eko nywalo ne Aburaam atin awobi i wi tio mere i kare kame bin Rubanga oudo owaco.

³ Aburaam oko cako nying atin awobi kame Sara bin onywalo ne be Isaka.

⁴ Di bin Isaka oromo ceng kanyauni, Aburaam oko kepe bala kame oudo Rubanga ociko ne.

⁵ Mwaka me dongo ka Aburaam oudo oromo do tol acel i kare kame bin konywalo kede Isaka.

⁶ Sara di oko waco be, “Rubanga omia do anyero. Jo dedede kame bino winyo kop noni bino nyero keda.”

⁷ Di bobo Sara oko waco be, “Ngai kame koto oudo okaruno waco ne Aburaam be Sara ceng moro bino doto atin? Aso di ango atieko nywalo ne atin awobi i wi tio mere.”

⁸ Atin nono oko dongo; di Aburaam oko tedo ebaga adwong i ceng kame oko twone kede dot.

Koriamo Agar kede Isimael

⁹ Ceng moro acel Sara oko neno di wot ka Aburaam ocelu, kame enywalo kede Agar me Misiri, di tie tuko kede wode Isaka,

¹⁰ en di eko waco ne Aburaam be, “Riam dako apasoit ni no ot kede wode tenge; pien wot ka apasoit noni likame bino sikao jamini nin karacel kede woda Isaka.”

¹¹ Kop noni oko ramo cuny Aburaam twatwal pi wode.

¹² Do Rubanga oko waco ne Aburaam be, “Kur ibed kede aramacuny pi wodi, akadi pi apasoit ni; in tim bala kame Sara waco ni, pien in ibino udo ikwae di wok kibut Isaka.

¹³ Do ango abino mino wot ka apasoit nono da doko ateker adwong, pien eda wodi.”

¹⁴ Aburaam di oko dilo odiko sek, eko kwanyo giacama kede pii kame kopiko i isau me lau di eko mino Agar. En eko keto ne atin i ngee di eko tware. Agar oko yai eko ot wiratoi i wi tim me Beereseba.

¹⁵ Kakame pii ca do oko tiek negi kede, en eko keto atin i dud yen mogo.

¹⁶ Di do en eko ot eko bedo piny kakame romo bala mita tol acel, di en eko bedo epimere kede. En eko yamo i cunye be, “Ango likame akaruno kanyakino neno to me atin na.” En eko cako koko di oudo etie bedo kuno.

¹⁷ Rubanga oko winyo atin di tie koko, di malaika ka Rubanga oko lwongo Agar ki malo di penye be, “Agar, peko nyo kame tie ni? Kur ibed kede lworo, pien Rubanga otieko winyo koko me atin i kakame etie iye.

¹⁸ Yai malo, ot itinge di iko make kiber, pien ango abino mino ateker adwong wok kibute.”

¹⁹ Rubanga oko yabo wang Agar di eko neno kulo. En eko ot di eko twomo pii pong isau me lau di eko mino atin omato.

²⁰ Rubanga oko bedo kede atin nono di eko dongo. En bin eko bedo i wi tim di eko doko ngat kipirana i gweno emal.

²¹ En bin ebedo i wi tim me Paran. Toto mere bin oko mono ne dako ki piny me Misiri.

Aburaam Otimo Isikan kede Abimelek

²² I kare nono Abimelek kede Pikol ngatel me isirikalen mege oko waco ne Aburaam be, “Rubanga tie kedi i gi dedede kame in itimo.

²³ Pi mano, ango amito in nataman ikwongere buta i nying Rubanga be in likame ibino timo na tim me angalo arabo ne idwe na amoto ikwae na. Aso, bala kame ango atieko timo nin kede bero, ida ibino timo nango kamanono karacel kede jo me piny noni kame in ibedo iye bala ngakumbor.”

²⁴ Aburaam di oko gamo be, “Ango akwongo kamanono.”

²⁵ Aburaam oko bedo kede ingungur but Abimelek pi kop me kulo kame jotic ka Abimelek oudo omao.

²⁶ Abimelek di oko waco be, “Ango likame angeo ngat kotimo gini; in likame iko waco na, doko ango likame oudo ako winyo kop noni kiton tuno tin.”

²⁷ Aburaam di do oko mino Abimelek romini kede dok, di kiko timo Isikan.

²⁸ Aburaam oko poko tenge akalen me romini kanyaare kikom romini mege.

²⁹ Abimelek di oko penye be, “Pinyo komio in ipoko akalen me romini kanyaare gi kargi ken gi?”

³⁰ Aburaam oko dwoko be, “Kame in igamo akalen me romini kanyaare nogi, manono bino nyuto be ango en kame akunyo kulo noni.”

³¹ Pi mano, oko do lwongo kabedo nono be Beereseba.

³² Kakame gin kitieko timo kede isikan i Beereseba, Abimelek kede Pikol ngatel isirikalen mege oko yai di kiko dok Pilistia.

³³ Aburaam oko pito yat kame kolwongo be tamarik i adul me Beereseba, di eko woro Rwot ki kanono, en Rubanga kame bedo nakanaka.

³⁴ Aburaam di oko bedo Pilistia bala ngakumbor pi kare alac.