Ageini 12 - Baibuli I Leb Kumam 2013

Rubanga Olwongo Aburam

¹ Rwot di oko waco ne Aburam be, “Yai iwek pinyu kiton joawade ni kede ot ka papa ni da, di iko ot i piny kame ango abino nyuto ni.

² Ango abino mino ateker adwong wok kibuti, doko ango abino mini winyo di ako mino nyingi bedo iruo, tetekeny in ibino bedo ngat kame kelo ne jo winyo.

³ Jo kame lamo ni winyo ango abino mino gi winyo, kede ngat kame lami kirac ango da abino lame kirac; doko atekerin dedede me wi lobo kobino mino winyo pi in.”

⁴ Aburam oko yai bala kame Rwot oudo owaco ne; di Lot oko ot karacel kede en. Mwakini me dongo ka Aburam oudo tie ot kanyaare kiwie kany (75) i kare kame en bin eyai kede ki Aran.

⁵ Aburam bin oko tero dako mere Sarai kede Lot wot ka omin mere, kede jamini dedede kame gin bin kitie kede, karacel kede jo kame gin bin kibedo kede Aran; di gin kiko yai pi ot i piny me Kanan. Kakame gin bin kituno kede i piny me Kanan,

⁶ Aburam oko beo i lobo nono di eko kato akata paka Sekem, tuno i ejinga me More. I kare nono jo me Kanan oudo pwodi tie bedo i lobo nono.

⁷ Di do Rwot oko nyutere but Aburam, di eko waco ne be, “Ango abino mino lobo noni but ikwae ni.” Aburam bin oko gero alutari kunono, me woro Rwot ngat kame oudo onyutere bute.

⁸ Di en eko yai ki kuno eko meede kede ot kiton tuno i piny kame obedo mori mori, kame oudo tie tetu kide me Betel. En bin eko guro eema mere kanono, i dierediere me Betel kame oudo tie tetu tim, kede Ai kame oudo tie tetu kide. Kanono da en kame bin en eko gero iye alutari me woro Rwot di en eko wore.

⁹ Aburam di oko meede kede ot tetu Negeb di ekokobo akokob ki kabedere.

Aburam i Misiri

¹⁰ I kare nono kec oudo oko poto i piny me Kanan. Manono oko bin mino Aburam oko yai eoto Misiri bedo iye bala ngakumbor, pien kec nono oudo bin ger adikinicel.

¹¹ Kakame bin en eyapuno donyo kede Misiri, eko waco ne dako mere Sarai be, “Ango angeo be in ibedo dako acil adikinicel;

¹² kame jo me Misiri oneni, gin kibino waco be, ‘Man dako mere’; di do gin kiko bino neka, do gin kibino weki likame kineki.

¹³ Pi mano, wace gi be in ibedo amina, tetekeny kitera kiber pi in, doko kibino weko kuo na pi in.”

¹⁴ Kakame bin Aburam odonyo kede Misiri, jo me Misiri ateteni oko neno be dako mere oudo cil twatwal.

¹⁵ Kakame bin jotic adongo ka Parao onene kede, gin kiko surao en but Parao, di oko tere i ot ka Parao.

¹⁶ Parao bin oko tero Aburam kiber pire; emie romini, dok, punda, ipasoi amon kede acuo, kede aguraguran.

¹⁷ Do Rwot oko tidilo Parao karacel kede jo me ode; en ecwao negi aumpuli arac twatwal pi Sarai dako ka Aburam.

¹⁸ Manono oko mino Parao oko lwongo Aburam di eko waco ne be, “Nyo ine kame in itimo na? Pinyo komio in likame iko waco na be en ebedo dako nin?

¹⁹ Pinyo komio in bin iwaco be, ‘En ebedo amina,’ omio ango ako tere bedo dako na? Aso, dako ni ino, tere iyai iotunu.”

²⁰ Parao di oko mino jotic mege cik, di gin kiko nyamaro Aburam i yongayo, en karacel kede dako mere kede jamini dedede kame bin en etie kede.