Ageini 11 - Baibuli I Leb Kumam 2013

Gedo Abor me Babilon

¹ Bin sek jo me wi lobo lung oudo yamo leb acel di kitio kede kope acacal.

² I kare kame gin bin kidak kede yai ki tetu kide, gin bin kiko tuno i elet i lobo me Sinar di kiko bedo iye.

³ Gin bin kiko yamo ken gi ken gi be, “Bianu otimunu matapalin di okounu wango gi kiber.” Di do gin kiko bedo tie kede matapalin akaka kide, kede emina akaka elupe me mwon.

⁴ Gin kiko do waco be, “Bianu ogerunu bomba kame mako wa, kede gedo abor malo di wie tuno i edou, me wek nying wa bed iruo; ka likame otimunu kamanono, oyarunu asasarun i wi lobo lung.”

⁵ Rwot oko bino piny pi neno bomba kede gedo abor malo kame jo oudo ogero.

⁶ Di Rwot oko waco be, “Neningo, gin kibedo jo acel, doko gin dedede kiyamo leb acel; man pwodi obedo acakini me gikame gin kibino timo; likame tie gimoro kame gin kibino mito timo kame bino bwono gi.”

⁷ Manono oko mino Rwot owaco be, “Bianu ootunu piny di okounu totolo leb gi tetekeny kur kikaruno niang yamo me jo icegun.”

⁸ Aso, Rwot oko sasaro gi ki kuno di kiko sarakin i wi lobo lung di kiko weko gero bomba.

⁹ Pi mano, oko do bin lwongo bomba nono be Babilon, pien kuno en kame bin Rwot ototolo kiye leb jo me piny lung, doko kunono en kame bin Rwot oko sarakino kiye jo i wi lobo lung.

Ikwae ka Sem

¹⁰ Magi en ikwae ka Sem. Kakame Sem oromo kede mwakini tol acel (100), di do alele oudo otiek odoko mwakini are cen, en eko nywalo Arupakasad.

¹¹ Ingei nywalo Arupakasad, Sem oko bedo otieko mwakini tol kany (500); di eko bobo nywalo idwe ace awobe kede anyira.

¹² Kakame Arupakasad odoko kede mwakini ot adek kiwie kany (35), en di eko nywalo Sela.

¹³ Ingei nywalo Sela, Arupakasad oko bedo etieko mwakini tol ongwon kede adek (403), di eko bobo nywalo idwe ace awobe kede anyira.

¹⁴ Kakame Sela oromo kede mwakini ot adek (30), en eko nywalo Eber,

¹⁵ di Sela oko bedo etieko mwakini tol ongwon kede adek (403) ingei en nywalo Eber, di eko bobo nywalo idwe ace awobe kede anyira.

¹⁶ Kakame Eber oromo kede mwakini ot adek kiwie ongwon (34), en eko nywalo Peleg;

¹⁷ di Eber oko bedo etieko mwakini tol ongwon kede ot adek (430) ingei en nywalo Peleg, di eko bobo nywalo idwe ace awobe kede anyira.

¹⁸ Kakame bin Peleg oromo kede mwakini ot adek (30), en eko nywalo Reu;

¹⁹ di Peleg oko bedo etieko mwakini tol are kede kanyangon (209) ingei en nywalo Reu, di eko bobo nywalo idwe ace awobe kede anyira.

²⁰ Kakame Reu oromo kede mwakini ot adek kiwie are (32), en di eko nywalo Serug.

²¹ Reu oko bedo etieko mwakini tol are kede kanyaare (207) ingei en nywalo Serug, di eko bobo nywalo idwe ace awobe kede anyira.

²² Kakame Serug oromo kede mwakini ot adek (30), en di eko nywalo Nakor.

²³ Serug oko bedo etieko mwakini tol are (200) ingei en nywalo Nakor, di eko bobo nywalo idwe ace awobe kede anyira.

²⁴ Kakame Nakor oromo kede mwakini ot are kiwie kanyangon (29), en eko nywalo Tera.

²⁵ Nakor oko bedo etieko mwakini tol acel kede tomon kiwie kanyangon (119) ingei en nywalo Tera, di eko bobo nywalo idwe ace awobe kede anyira.

²⁶ Kakame Tera oromo kede mwakini ot kanyaare (70), en eko nywalo Aburam, Nakor kede Aran.

Ikwae ka Tera

²⁷ Mage en ikwae ka Tera. Tera bin en Papa me Aburam, Nakor kede Aran; Aran oko nywalo Lot.

²⁸ Aran bin oko to i kabedo kame kolwongo be Ur, kame tie i piny me Babilon. En eto di Tera papa mere pwodi tie kuo.

²⁹ Aburam kede Nakor bin oko nyomo mon. Nying dako ka Aburam oudo Sarai, do nying dako ka Nakor oudo obedo Milika nyar ka Aran, ngat kame oudo da obedo papa me Isika.

³⁰ Sarai bin obedo Adonge; en oudo likame enywalo atin moro.

³¹ Tera bin oko tero wode Aburam kede akware Lot wot ka Aran, kede Sarai dako ka wode Aburam. Gin bin kiko yai karacel ki kabedo kame kolwongo be Ur kame oudo tie i piny me Babilon, pi ot i piny me Kanan. Do kakame gin bin kiko tuno kede kabedo kame kolwongo be Aran, kiko donyo bedo kuno.

³² Tera bin oko bedo kuo pi mwakini tol are kede kany (205), di do eko to Aran.