Agai 2 - Baibuli I Leb Kumam 2013

Tempulo Anyen bino Bedo Cil Twatwal

¹ I mwaka nono i duwe me kanyaare i buto duwe ot are kiwie acel, Rwot oko mino enabi Agai kop kame miero eot di eko waco.

² En ewaco ne Agai be epeny Serubabel, ngapug me Yuda, kede Yosua, Ngatel me Josaseredoti, kede jo dedede be,

³ “Benyo, tie ngatamoro kikomu kame pwodi yutuno kite kame tempulo oudo cil kede? Nataman ecal benyo? Mam eneeno bala gimoro kame kony mere li?

⁴ Akadi kamanono da, nataman bedunu kede nwangcuny. Timunu tic, pien ango atie kede wu,

⁵ bala kame bin acikere kede but joakwari wu i kare kame kiyai kede ki Misiri. Kur ibedunu kede lworo moro. Ango atie kede wu.

⁶ “Odong kare anonok di ango bobo ako bino yayango malo kede piny, lobo kede nam.

⁷ Ango abino yayango atekerin dedede, di oko bino kelo jamini gi me wel kan, di ango ako bino mino tempulo pong kede deyo na.

⁸ Siliba kede saabu dedede obedo mera.

⁹ Tempulo kanyen bino bedo cil kalamo tempulo kacon. Ango abino kelo mulem kabedo noni. Ango Rwot me jo yi en awaco.”

Agai Okwao Josaseredoti pi Mine Tam

¹⁰ I buto duwe ot are kiwie ongwon me duwe me kanyangon, i mwaka me are me apugan ka Darias, Rwot bobo oko yamo kede Agai.

¹¹ En ewaco ne be, “Peny tam me josaseredoti i kom kop noni be:

¹² Ka ngatamoro oko kwanyo angol me ringo kame koyalo but Rwot di en eko bone i lak ekanso mere, ka en eko mino ekanso mere omulo mugati, cam kame kotedo, bwini, mo me olibeti, arabo giacama moroni kenekene, benyo, gi nono da bino doko gikacil?” Josaseredoti oko gamo be, “Li.”

¹³ Di Agai bobo oko penyere be, “Ka ngatamoro oko pwokere pien emulo kom dano oto, ka en eko mulo jamini nogi, benyo, gida kidoko jamini kopwokere?” Josaseredoti oko gamo be, “Ebo, gin kidoko jamini kopwokere.”

¹⁴ Di Agai oko waco be, “Rwot waco be etie kamanono kede jo me ateker noni, kiton tice dedede kame gin kitimo, akadi jamini kame gin kimio bala giayala, gin dedede kipwokere.”

Rwot Ocikere pi Mino Jo mege Winyo

¹⁵ Rwot waco be, “Kong tamunu i kom gikame bino timere cako nataman ot kede anyim. Di pwodi wun oudo likame icakunu gero tempulo,

¹⁶ kuo wu oudo tie benyo? Wun oudo igenunu udo kilo tol are (200) ki atukit me engano, do ikounu lokere udo kilo tol acel (100) kenekene. Ka dano oudo geno udo lita tol acel (100) me bwini, lita ot ongwon kenekene en kame oudo eudo.

¹⁷ Ango bin acwao yamo aliet kede akako, di ako mino kodere kame oudo ipurunu omwato, do wun pwodi likame ikounu swilaro.

¹⁸ Tin obedo buto duwe ot are kiwie ongwon me duwe me kanyangon, ceng kame kotieko gero kede acakini me tempulo. Kong nenunu gikame bino timere cako nataman.

¹⁹ Bed bala likame tie engano moro kodong i dero, doko olok, epigi, pomagurunet kede olibeti pwodi likame onyako gimoro, do cako nataman ango abino mino wu winyo.”

Cikere ka Rwot but Serubabel

²⁰ Ceng acel nono, me buto duwe ot are kiwie ongwon, Rwot bobo oko waco ne Agai be

²¹ poore ewace Serubabel, ngapug me Yuda kaman: “Ango ayapuno yayango malo kede piny

²² di ako rereto ajakanuto di ako jiko teko gi. Abino rereto cabalan kede jo kame ringo kede gi; asigiran bino to, di jo kame ringo kede gi ko lokere nekere ken gi ken gi.

²³ Cenge nono ango abino kwanyo in Serubabel, ngatic na, di ako cibi pi pug i nyinga. Ango atieko yeri. Ango Rwot me jo yi en awaco.”