Abakuk 3 - Baibuli I Leb Kumam 2013

Ilega ka Abakuk

¹ Manoni en ilega kame enabi Abakuk oko lego:

² Okwe Rwot, ango atieko winyo kop i kom gikame in itieko timo. Ango atie kede lworo atek i kom tice nin. Nataman med timo i kare wada; jamini adongodongo kame in bin ibedo timo. Ka iko lilo, yutuno cuny me kisa ni.

³ Rubanga tie bino ki Teman; Ngat Kacil tie bino ki wi imukuran me Paran. Meny me deyo mere oumo malo; jo me wi lobo lung pake.

⁴ En ebino kede meny kame cal bala meny me kot; asara yai ki cinge, kanono kakame en ekano iye teko mere.

⁵ En ecwao tuwo telo ne yongayo di aumpuli ko lubo ki cen.

⁶ Ka en ecungo, lobo yangere; ka en engoloro jo, kom atekerin miel. Mori kobedo tie cako riki sek ko bebelun; imukuran koudo tie cako i kare kasek ko lwiny piny, i yote kame en bin elubo i kare kasek.

⁷ Ango ako neno jo Kusan di kitie neno can, kede jo Midian di kom gi tie miel.

⁸ Okwe Rwot, benyo, icileta en kame bin oko wango cunyi? Benyo, nam adwong en komio in bin iko doko ger? In bin iringo kede idoun ineno bala itie ringo kede cabalan, di iko mino jo ni obwono jokwor gi.

⁹ In oudo itieko iikere pi gweno emal ni. In bin imio icileta opoko lobo.

¹⁰ Mori bin oneni di kiko yangere; twon pii oko bwote ki idoun. Pii me nam oko mor, di ebuka gi oko tingere malo.

¹¹ Ceng kede duwe oko cungo kargi, pi meny me emal nin kame igweo tie ringo, kede pi milimilun me tongini nin.

¹² In iko beo i wi lobo di ililo; di iko nyonyono atekerin kede gero.

¹³ In oudo ibino pi lako jo ni, ibino pi lako ateker ni kame iyero. In iko neko ngatel me jo areco, di iko muducaro atwal jo kame bin lube.

¹⁴ In bin icocobo ngatel me isirikalen mege kede imalia mege, kakame gin kibino kede bala apipiru pi sasaro wan, di kilelo bala kimito nyinyilo jocan kame tie pwono.

¹⁵ In iko beo i nam kede asigiran ni, di twon pii nono oko rubere.

¹⁶ Ango awinyo mor noni di koma ko donyo miel; del doga da ko donyo miel pi lworo. Koma ko keto nyonyok, di tiena ko mamanyun. Ango abino bedo mot di akuro ceng kame peko bino poto kede i kom jo kame suro wa.

¹⁷ Akadi bed bala yen me epigi likame oko tuuro, di olok da likame oko nyak; akadi bed bala kodi me olibeti likame ko nyak, di poti likame ko woto cam moro; akadi bed bala romini di oko to dedede, di likame tie diang moro oko dong i awi,

¹⁸ ango gira pwodi abino ilel pi Rwot; ango abino ilel pi Rubanga ngalak na.

¹⁹ Rwot Rubanga en kame mia teko. En emio tiena bedo tek bala me atil, emia aringo i wi moru abongo gete.