Abakuk 2 - Baibuli I Leb Kumam 2013

Kop kame Rwot Odwoko ne Abakuk

¹ Ango abino cungo i gedo na abor malo me kino piny, di ako kuro winyo gikame Rwot bino waco na, kede gikame en ebino dwoko i kom koko na bute.

² Rwot oko waco na be, “Wandiko gikame ango abino nyuto ni, wandiko en kiber i kom kide abatal, tetekeny some bed yoyot.

³ Wandiko en, pien kare mere me cobere pwodi. Do kare nono tie bino oyotoyot, di gikame ango anyuto ni noni ko bino timere. In itwero neno bala kare nono tie gal, do kure; pien ateteni gi noni bino timere abongo gal.

⁴ Neningo joewaka! Gin likame cuny gi opoore, pi mano gin likame kibino bwot, do jo kopoore bino bedo kuo pi genere gi but Rubanga.”

Jo kalikame Opoore bino beo i Can

⁵ Abar likame genere, doko joewaka likame bedo mot. Gin kibedo jo kowor bala kabedo me jo oto; kical bala to, gin likame tie gimoro kame romo gi. Manono en komio gin kicoko atekerin dedede but gi di kiko mino jo nogo doko mergi.

⁶ Jo kame gin kimako nogo bino lokere golao gi kede yamo kame waco be, “Itienu i can, wun jo kame icokunu jamini kalikame obedo megu!” Kara ibinunu tero kare kame rom kamene di icokunu piru abar me jamini kame imakunu pi banyi?

⁷ Do abongo mino ikwenyar, jo kame wun itienu kede banyi gi bino bino di kiko mito be iculunu gi. Kom wu bino miel teltel di gin kiyako wu.

⁸ Wun itiekunu yako jo me atekerin atot, do nataman jo kodong kuo kikom gi bino yako wuda pi nek kame wun ibedunu timo, kede pi tim me gero kame wun itimunu i kom jo me wi lobo kede bomban gi.

⁹ Itienu i can wun jo kame imiunu jo me ude wu oudo abar i yore arac. Wun itamunu gero miere wu kakame gimoro arac likame romo tuno iye, bala winyo kame gero ode malo!

¹⁰ Do iik wu nono otieko kelo lewic ne jo me ude wu. Wun itiekunu kelo peko i komu kenu pi muducaro atekerin atot.

¹¹ Akadi kide me kor apama me miere wu bino kok ki kor apama di kipido wu, di atekai me wi ude da ko bino gamo koko gi.

¹² Itienu i can! Wun igerunu bomba kede onyo remo me jo, kede tim me gero.

¹³ Jo me atekerin kame wun imakunu obedo cane timo tic nono, pien gi dedede kame gin kigero bino wang i mac. Rwot me jo yi en kotimo manoni.

¹⁴ Do lobo bino pong kede ngec i kom deyo ka Rwot, bala kame pii opongo kede nam adwong.

¹⁵ Itienu i can, wun jo kame imiunu jo me atekerin me kio wu mato gero wu tuno gin doko cal bala jo komer, pi wun mito neno gin di kitie nono!

¹⁶ Wuda kobino mino lewic pong i wi wu akaka wor. Ikopo me alola kame Rwot mako i cinge tetu cam kobino mino butu. Wun kikomu ibinunu mato ki ikopo nono. Ibinunu mer di jo ko bino neno wu di itienu nono. Lewic bino mako wu akaka wor kame koto jo mio wu.

¹⁷ Wun itongunu piny yen me abum me Lebanon; nataman wuda kobino tongo wu piny. Wun inenekunu leini mege; nataman leini bino kelo ne wu lworo atek. Manoni bino timere pi nek kame wun itimunu, kede pi tim me gero kame wun itimunu i kom jo me wi lobo kede bomban gi.

¹⁸ Caljwogi kony mere nyo? En kenekene etie gikame dano en kotimo, doko likame tie gimoro kame en ewaco ni, kwanyo kenekene kope me angalo. Kony nyo me wone ngat kotime keto gen mere i kome di en ebedo rubanga kalikame karuno akadi yamo!

¹⁹ Itienu i can wun jo kame iwacunu ne ebao be, “Cei!” Arabo ne kidi be, “Yai malo!” Benyo, iparunu be caljwogi karuno pwonyo wu? Neningo, en komwono kome kede saabu kede siliba, do likame etie kede wei me kuo.

²⁰ Rwot tie i tempulo mere kacil; mito jo dedede me wi lobo ling titi i nyime.