2 Temeseo 3 - Baibuli I Leb Kumam 2013

Kare me Ajikini

¹ Ngei be, peko bino bedo tie i kare me ajikini.

² Pien jo bino paro pirgi kenekene, kibino bedo jo kame cuny gi maro sente, joewaka, joadeng, joayet, jo kalikame winyo jonywal gi, jo kalikame tie kede pwoc, jo kalikame paro pi Rubanga,

³ kibino bedo jo kalikame paro jo, jo kalikame mito dok i nywak kede jo apat, jo kame dubo nying jo, jo kame cuny gi rep, jogero, jo kame dagi gikaber,

⁴ joerupe, jo kalikame paro piny, jo kame tingere nono, jo kame maro yomcuny akaka maro Rubanga,

⁵ jo kame nyutere bala kiworo Rubanga, do di i ateni kidagi twer mere. Kur ibedo kede akodi jo nogo.

⁶ Pien tie mogo kikom gi kame lwidar donyo i ude di kiko bwono tam me mon amiming, mon kame dub otieko bwono teko gi kede kame mit me epone dedede pugo,

⁷ gin mon kame kopwonyo nakanaka do likame kikaruno pi bedo kede ngec me ateni.

⁸ Bala kame bin Yane kede Yambure opiemo kede tam ka Musa, kamanono jo nogi da kame li kede tam, jo kame yei gi otieko poto, gida kipiemo kede ateni.

⁹ Do gin likame kibino kato kakabor, pien mingo gi bino neno kakaler but jo dedede, bala me ka Yane kede Yambure.

Acora me Ajikini

¹⁰ Do in itieko lubo i yore i yore pwony na, ekite na, gikame ango amito cobo i kuo na, yei na, dire na, amara na, ikanyakin na,

¹¹ itidil kame komia kede can kame aneno i Antiokia, Ikoniam, kede i Lisitura, itidil alit kame akanyakino! Do Rwot oko laka ki kom gi nogi dedede.

¹² Ateteni, kobino tidilo jo dedede kame mito bedo kede kuo me woro Rubanga i Kirisito Yesu.

¹³ Do jo areco kede joangalo bino meede ameda dubere, di kingalo jo, doko di kongalo gida.

¹⁴ Do in meede kitek i gikame itieko pwonyere iye kede kame itieko yei. Pien in ingeo ngat kame opwonyi ginogo,

¹⁵ kede epone kame in itieko ngeno kede iwandik kacil, kame karuno mini rieko kame kelo ni alako pi yei Kirisito Yesu cako di in pwodi atin.

¹⁶ Iwandik kacil dedede owok kibut Rubanga, doko kibeco me pwonyo jo, me bunano jo, me rieno jo, kede me pwonyo jo bedo di kipoore,

¹⁷ tetekeny ngat acelacel kame obedo dano ka Rubanga miero bed dano kocwiny kiber, kame otieko iikere pi timo tice dedede kabeco.