2 Temeseo 2 - Baibuli I Leb Kumam 2013

Sirikale Awor me ka Kirisito Yesu

¹ Pi mano, in atin na, bed di itek pi kisa kame tie i Kirisito Yesu.

² Doko gikame iwinyo kibuta i nyim ijurak atot, mi but jo kame genere, kame bino gida karuno pwonyo jo icegun.

³ Nywak neno can kede jo icegun bala sirikale aber me ka Kirisito Yesu.

⁴ Likame tie sirikale moro kame tie i wang tic, kame doko mio kope ace apat bodo wie, pien mit mere tie pi yomo cuny ngadwong mere.

⁵ Likame tie ngaringo moro kame udo giamia me loc kwanyo di elubo iswilia me elagano.

⁶ Ngapur atek en kame poore cako udo iner me gikame kopuro.

⁷ Bed di itamo i kom gikame ango awaco, pien Rwot bino mini iniang gi dedede.

⁸ Yutuno kop i kom Yesu, akwar Daudi, ngat kame bin koyaruno kikom jo oto, bala kame tie i ejiri kame ango apwonyo.

⁹ Ejiri noni en kame ango atie neno can pire, di kotwea kede irikoi bala ngatur iswil. Do likame kotweo kop ka Rubanga.

¹⁰ Pi mano, ango akanyakino gi dedede pi jo kame Rubanga oyero, tetekeny gida kiud alako kame tie i Kirisito Yesu, kede deyo mere kame bedo nakanaka.

¹¹ Man kop me ateni kame waco be, “Ka wan otiekunu to karacel kede en, obinunu da kuo karacel kede en.

¹² Ka wan okanyakinunu, obinunu da pug karacel kede en. Ka wan odagenu, eda ebino dagi wa.

¹³ Ka wan likame ogenerenu, en gire edong di egenere kamanono, piento en likame ekaruno dagere kene.”

Ngatic kame Kopwoyo

¹⁴ Poi wi jo i gi nogi, doko kwenyaro gi i nyim Rubanga pi weko piem i kom kope mogo, gikame li kede kony moro, do kenekene edudubo jo kame tie winyo.

¹⁵ Tamakino kede teko ni dedede pi nyuto i nyim Rubanga be in ngatic kame en epwoyo, ngatic kame li kede gimoro kame lewic make iye, kame pwonyo kiber kop me ateni.

¹⁶ Kur idonyi i yamo mogo kame kony gi li, yamo kalikame nyuto wor but Rubanga, pien kibino mino jo meede ameda weko bedo kede wor but Rubanga.

¹⁷ Doko yamo gi nogo cal bala adola kame wange nyai. Kumenayo kede Pileto obedo jo are kikom jo kame pwonyo akodi gi nogi.

¹⁸ Gin kipwonyo be iyarun otieko timere; man omio gin kiparao tenge kiweko ateni. Gin kitie totolo yei me jo mogo.

¹⁹ Do acakini atek kame Rubanga osipo tie cungo, di etie kede iwandik kame waco be, “Rwot ngeo jo mege,” kede be, “Mito ngat acelacel kame lwongo nying Rwot wek tim areco.”

²⁰ I ot adwong, likame iudo iye ikopon kede bakulin kame kotimo kede saabu kede siliba kenekene, do iudo iye mogo kobedo yen kame kopao, kede apat me elupe da; mogo kotio kede gi i ceng kame pirgi tek, kede mogo kotio kede gi i ceng atatai.

²¹ Jo dedede kame lonyere ki gikame ango awaco nogi, gin kibino doko bala bakulin kede ikopon kame kotio kede gi i ceng kame pirgi tek, jo kame kony gi tie, jo kame omire but Rubanga, en Won ot; gin jo kotieko iikere pi timo tice dedede kabeco.

²² Kur idonyi i mit me tino; do cane pi bedo ngat kopoore, pi bedo kede yei, amara, kede mulem, di itimo kamanoni karacel kede jo kame bako dog gi but Rwot di cuny gi cil.

²³ Bed bor ki piem me mingomingo me kwina piny; in ingeo be magonogo kelo lok.

²⁴ Doko ngatic ka Rwot likame poore bedo ngalok, do epoore bedo ngat kame mwol kede jo dedede, ngapwony aber kame dire,

²⁵ kame rieo niang me jo kame piemo kede en, do di etimo kamanono kede cuny me mwolo. Pien cengemogo Rubanga bino mino gi kare me swilaro, di kiko ngeno ateni.

²⁶ Di do kiko bino bwot ki owic ka Sitani, ingei en mako gi bala mabus pi timo gikame en emito.