2 Temeseo 1 - Baibuli I Leb Kumam 2013

Amot

¹ Baluwa kowok kibut Paulo, kame odoko ngaor ka Kirisito Yesu pi mit ka Rubanga, pi kop me cikere me kuo kame tie i Kirisito Yesu.

² But Temeseo atin na kame amaro. Kisa, mwolo, kede mulem ka Rubanga Papa kede Rwot wa Kirisito Yesu bed buti.

Pwoc kede Supocuny

³ Ango apwoyo Rubanga ngat kame ango atimo ne tic kede ngec aber me cunya, bala kame bin joakwari na da otimo kede. Ango apwoye di ayutuno in nakanaka kame atie ilega iwor kede iceng.

⁴ Kame ayutuno koko ni, aparo neni tetekeny cunya pong kede kilel.

⁵ Manoni mia ayutuno yei me ateni kame in itie kede, akodi yei kame da ni Loisi kede toto ni Yunia oudo tie kede, en kame ango angeo kiber be ida nan itie kede.

⁶ Pi mano, ango apoo wi be, cei giamia ka Rubanga kame emi i kare kame bin ango adokakino kede cinga i wi.

⁷ Pien likame Rubanga omio wa Tipo kame mio wa lworo, do emio wa Tipo kame mio wa twer, amara, kede dino mit me kom.

⁸ Pi mano, kur lewic maki mino ijura i kom Rwot wa, arabo i kom ango ngat kame adoko mabus pire. Do nywak keda neno can pi ejiri, di icungo i twer ka Rubanga.

⁹ En elako wa di eko lwongo wa pi bedo jo mege kacil, likame pi tice wa, do pi iik kede kisa mere. En emio wa kisa noni i Kirisito Yesu di likame pwodi ikar ogere,

¹⁰ do nataman eko nyute but wa i bino me Ngalak wa Kirisito Yesu, ngat kotieko kwanyaro twer me to, di eko kelo kuo kame bedo nakanaka pi ejiri.

¹¹ Rubanga oyera pi bedo ngat kame tuco kop mere, ngaor kede ngapwony me ejiri noni;

¹² doko kop noni en komio ango atie neno can kaman. Do ango lewic likame maka, pien ango angeo ngat kame atieko keto gen na i kome, doko ango angeo kiber be en ekaruno gwoko gikame etieko gena kede paka tuno i Ceng nono.

¹³ Mok i kom pwony me ateni kame itieko winyo kibuta, di iko dong i yei kede amara kame tie i Kirisito Yesu.

¹⁴ Gwok jamini kabeco kame kotieko geni kede pi kony me Tipo Kacil kame wan otie kede.

¹⁵ In ingeo be jo dedede kame tie Esia, ribo kiton Pugelo kede Keremugene otieko jala.

¹⁶ Akwao Rwot pi timo kisa ne jo me ot ka Onesiporu, piento en oudo esingo dwoko cunya, doko lewic oudo likame make pi kite kame kotwea kede i otkol;

¹⁷ do kakame en etuno kede Roma, emoa kede teko di eko wuda.

¹⁸ Akwao Rwot pi timo ne kisa i Ceng nono! Doko in ingeo kiber tice dedede kame en etimo i Epeso.