2 Samuel 9 - Baibuli I Leb Kumam 2013

Daudi kede Mepiboset

¹ Ceng moro acel Daudi oko penyere be, “Benyo, tie dano moro kame odong ki ot ka Saulo kame ango akaruno timo ne mwolo pir Jonasan?”

² Oudo tie ngatic me ot ka Saulo anyinge Siba, di bin oko lwonge pi bino but Daudi. Abaka di oko penye be, “Mam in Siba?” En di eko gamo be, “Ebo, ango ngatic ni!”

³ Abaka oko penye be, “Benyo, tie dano moro kame odong ki ot ka Saulo kame ango akaruno nyuto mwolo ka Rubanga bute?” Siba oko waco ne abaka be, “Wot ka Jonasan tie odong; en tiene dedede ongwalo.”

⁴ Abaka oko penye be, “En etie tuai?” Siba oko waco ne abaka be, “En etie i paco ka Makir wot ka Amiel, i bomba me Lodebar.”

⁵ Di do Abaka Daudi oko cwano dano ot ome.

⁶ Kakame Mepiboset wot ka Jonasan, akwar Saulo oko tuno kede but Daudi, en eko riebere piny di eko mine wor. Daudi oko lwonge be, “Mepiboset!” En di eko gamo be, “Ango ngatic ni ine.”

⁷ Daudi oko waco ne be, “Kur ibed kede lworo, pien ango abino timo ni mwolo pi papa ni Jonasan; ango ayaro dwoko ni lobo ka kwaru ni Saulo dedede, doko in ibino cam keda i emesa acel ceng dedede.”

⁸ Mepiboset bobo oko riebere piny mine wor di eko waco be, “Kara ango abedo nyo en kamio in iparo pira, ango ngat kame arom aroma kede ogwok oto?”

⁹ Di do abaka bobo oko lwongo Siba ngatic ka Saulo, di eko waco ne be, “Jamini dedede kame oudo obedo me ka Saulo kede me jo me ode ango atieko mino but akware.

¹⁰ In kede awobe ni karacel kede jotic ni ibinunu puro lobo nono ne en, di ikounu bino kelo ne cam kame cek kiye, tetekeny jo me ot ka ngadwong ni bed tie kede giacama; do Mepiboset, akwar ngadwong ni bino bedo cam keda i emesa acel ceng dedede.” Siba oudo tie kede awobe tomon kiwie kany kede jotic ot are.

¹¹ Di Siba oko gamo dog abaka be, “Gi dedede kame in abaka rwot na iciko, ango ngatic ni abino timo kamanono.” Mepiboset bin oko donyo cam kede Daudi i emesa acel ineno bala eda oudo ebedo wot ka Abaka.

¹² Mepiboset oudo tie kede atin awobi katitidi anyinge Mikaa. Jo dedede kame bin bedo i ot ka Siba oko doko jotic ka Mepiboset.

¹³ Aso, Mepiboset ngat kame oudo tiene dedede ongwalo, bin oko donyo bedo Yerusalem di ecamo i emesa me abaka.