2 Samuel 7 - Baibuli I Leb Kumam 2013

Kop kame Rwot Owaco ne Daudi

¹ Di bin Abaka Daudi odonyo bedo i paco mere me abaka, di do oudo Rwot otieko mine wei ki cing jokwor mege dedede kame oudo oluke,

² abaka oko waco ne enabi Natan be, “Neni, nataman ango atie bedo i ot kame kogero kede yen seda, do Sanduku me Isikan ka Rubanga tie bedo i eema!”

³ Natan oko waco ne abaka be, “In tim gikame cunyi winyo timo; pien Rwot tie kedi.”

⁴ Do iwor nono Rwot oko waco ne Natan be,

⁵ “Ot di iko waco ne ngatic na Daudi be ango awaco be, ‘In en kalikame iyaro gero nango ot kame abino bedo iye.

⁶ Ango pwodi likame abedo i ot cako i kare kame alako kede jo me Isirael ki Misiri tuno tin, do abedo ot di abedo i eema kede i taberenakol.

⁷ I kabedere dedede kame ango abedo ot iye kede jo me Isirael, likame tie ceng moro acel kame ango atieko penyo kede jotel kame ango bin aciko pi gwoko jo na me Isirael, di apenyo gi pinyo komio gin likame kiko gero na ot me ebao me seda.’

⁸ “Aso, nataman in ibino waco ne ngatic na Daudi be Rwot me jo yi owaco be, ‘Ango en kame bin akwanyi ki kakwat, ki kuo me lubo romini di ako keti bedo ngatel me jo na me Isirael.

⁹ Ango abedo tie kedi i kabedere dedede kame in oudo ioto iye, di ako muducaro jokwor ni dedede i nyimi. Ango abino mino nyingi bedo iruo, bala nying jo kame pirgi tek ki wi lobo.

¹⁰ Ango abino yero kabedo ne jo na me Isirael di ako cibo gi iye, tetekeny kibed kabedo kame mako gi, di likame bobo tie ngatamoro kame lolo gi iye. Jo areco likame bobo bino tidilo gi, bala bin i kare kasek.

¹¹ Cako i kare kame ango bin aketo kede jongolkop pi telo jo na me Isirael, jo areco oko bedo tidilo gi, do nataman abino mino gi kiwei ki cing jokwor gi. Medo i wi manono, Rwot owaco ni be en kikome ebino mini ikwae.

¹² Kame kare me kuo nin otiek di oko yiki karacel kede joakwari ni, ango abino keto atin ni kame in inywalo eko lunyo wangi, di ango ako bino mino ajakanut mere cungo di tek.

¹³ En ebino gero nango ot, di ango ako bino mino ajakanut mere bedo nakanaka.

¹⁴ Ango abino bedo papa mere, di en eko bino bedo woda. Ka en etimo dub, ango abino mine alola me adao kede ebela bala kame jo timo, abino bunge bala kame jo timo.

¹⁵ Do likame abino kwanyo amara na kalikame lokere kibute, bala kame bin akwanyo kede kibut Saulo, ngat kame bin ango akwanyo tenge tetekeny in idok abaka.

¹⁶ Ibino bedo tie kede ikwae nakanaka doko ajakanut ni bino bedo ikar kede ikar.’ ”

¹⁷ Natan oko waco ne Daudi kope nogi dedede bala kame oudo Rubanga onyuto ne kede.

Ilega ka Daudi me Mino Pwoc

¹⁸ Di do Abaka Daudi oko donyo i yi eema di eko bedo i nyim Rwot, eko lego be, “Okwe Rwot Rubanga, ango en ngai, doko jo me ekeko na da obedo alu kibuti, en komio in imia akodi kuo kame nataman atie iye noni?

¹⁹ Aso di i wangi manoni oudo obedo gi katitidi, Okwe Rwot. Medo i wi manono, in itieko da cikere i kom kop amako ekeko me ngatic ni i kare me anyim. Benyo, manoni en gikame in itimo ne jo, Okwe Rwot Rubanga?

²⁰ Nyo bobo kame ango akaruno waco ni? Pien in ingeo ngatic ni, Okwe Rwot Rubanga!

²¹ Pi cikere nin, kede pi mit me cunyi, in itieko timo gi apire tek noni di iko nyuto ne ngatic nin.

²² Ateteni in idwong, Okwe Rwot Rubanga; pien likame tie ngatamoro kame cal bala in, doko likame tie Rubanga ace kwanyo in, bala kame wan otieko winyo kede yit wa.

²³ Ateker mene en kame cal bala jo ni me Isirael? Benyo, tie ateker moro ace i wi lobo kame in Rubanga iko ot lako pi bedo jo ni? In bin imio nyingi oko bedo iruo pi jamini adongodongo me aura, kame in bin itimo ne jo ni di iriamo tenge atekerin karacel kede rubangan gi.

²⁴ In itieko mino jo ni me Isirael odoko megi atwal; doko in Rwot itieko doko Rubanga gin.

²⁵ Nataman do, Okwe Rwot Rubanga, in mok atwal kop kame in iwaco i kom ngatic ni, kede i kom jo me ekeko mere; tim gikame in icikere iye.

²⁶ Manono bino mino jo pako nyingi nakanaka di kiwaco be, ‘Rwot me jo yi en Rubanga kame pugo Isirael’; di jo me ekeko ka Daudi ngatic ni ko bino bedo pug nakanaka.

²⁷ Pien in, Okwe Rwot me jo yi, Rubanga me Isirael, imio ngatic ni ongeo kop noni di iwaco ne be, ‘Ango abino mino jo me ekeko ni ajakanut’; en komio ngatic ni oudo nwangcuny me lego buti kamanoni.

²⁸ Aso, nataman Okwe Rwot Rubanga, in ibedo Rubanga, doko kope nin obedo me ateni, in itieko cikere pi timo ne ngatic ni gikame ber noni;

²⁹ pi mano, ango akwai imi winyo but jo me ekeko me ngatic ni, tetekeny ajakanut gi meede i nyimi nakanaka; pien in, Okwe Rwot Rubanga, itieko yamo, doko pi winyo kame in ibino mino, jo me ekeko me ngatic ni bino bedo kede winyo nakanaka.”