2 Samuel 6 - Baibuli I Leb Kumam 2013

Kotero Sanduku me Isikan Yerusalem

¹ Daudi bobo oko coko isirikalen me Isirael tutumia ot adek (30,000), kame koyero ayera.

² Daudi kede isirikalen dedede kame oudo en etie kede oko yai di kiko ot Baale kame oudo tie Yuda, pi omo Sanduku me Isikan ka Rubanga, sanduku kame kolwongo kede nying Rwot me jo yi, ngat kame bedo i ngei cerubim.

³ Gin kiko kwanye ki ot ka Abinadab, kame oudo tie i wi emukura, di kiko kete i cabala anyen. Usa kede Akio, awobe ka Abinadab, en kame oudo kolo cabala anyen nono.

⁴ Akio oudo oto i anyim di cabala lube ki cen kede Sanduku me Isikan.

⁵ Daudi kede jo dedede me Isirael oko wer di kimielo i nyim Rwot kede teko gi dedede, di kigoo arigirigin kede adungun kede bule, ayekeyeken kede suanin abatal me goc.

⁶ Kakame gin bin kiko tuno kede i laru me canyo ka Nakon, twonin oudo oko riangar, Usa oko cwano cinge di eko mako Sanduku me Isikan ka Rubanga.

⁷ Gikame Usa otimo nono oko wango cuny Rwot, di Rubanga oko neke i nget Sanduku me Isikan kanono.

⁸ Cuny Daudi oko wang pien Rwot oudo oko neko Usa pi wangcuny; manono oko mino oko lwongo kabedo nono be Peresi Usa tuno tin.

⁹ Cenge nono Daudi oko bedo kede lworo i kom Rwot; en ewaco be, “Benyo, benyo kame ango akaruno doko kede ngat kame gwoko Sanduku me Isikan ka Rwot?”

¹⁰ Aso, Daudi likame oko yei tero Sanduku me Isikan ka Rwot i bomba mere, pi en koto gwoke i kuno; do en eko lokere tere i ot ka Obed Edom dano me bomba me Gat.

¹¹ Sanduku nono oko bedo kuno pi dwete adek; di Rwot oko mino Obed Edom winyo, karacel kede jo me ode dedede.

¹² Bin oko waco ne Abaka Daudi be, “Rwot otieko mino winyo but jo me ot ka Obed Edom kede jamini mege dedede pi Sanduku me Isikan ka Rubanga.” Manono oko mino Daudi oko ot di eko omo Sanduku me Isikan ka Rubanga ki ot ka Obed Edom di eko tere i bomba mere kede kilel kadwong.

¹³ Kakame bin jo kame oudo oko yeno sanduku ka Rwot oko cako kede ot, di pwodi oudo kilato tien gi tien kanyape kenekene, Daudi oko mino gin kicungo di en eko mino giayala me twon kede roya kocwe but Rwot.

¹⁴ Daudi oko miel i nyim Rwot kede teko mere lung; en oudo engapo epod kame kotimo kede egoe acil kame meny i piere.

¹⁵ Epone no en kame Daudi karacel kede jo me Isirael dedede oko tero kede Sanduku me Isikan ka Rwot Yerusalem kede ilelem me kilel, kede di okuto agwara.

¹⁶ Di do oudo kotie donyo kede Sanduku me Isikan ka Rwot i Bomba ka Daudi, Mikal nyar ka Saulo oko ngoloro ki dirisa, di eko neno Abaka Daudi di tie sosomo di emielo i nyim Rwot; di eko bedo kede acae i kom Daudi.

¹⁷ Gin kiko tero Sanduku me Isikan ka Rwot di kiko kete kabedo mere, i yi eema kame Daudi oudo ogero ne; di Daudi oko mino Rwot giayala awanga kede giamia me nywak.

¹⁸ Kakame Daudi oko tieko kede mino giayala awanga kede giamia me nywak, en eko lamo ne jo winyo i nying Rwot me jo yi,

¹⁹ di eko poko ne gin dedede cam. En epoko cam ne jo dedede me Isirael, cuo kede mon, di emio ngat acelacel mugati, angol me ringo, kede olok kotuo. Di do jo dedede oko dok i miere gi.

²⁰ Kakame Daudi oko dok kede paco pi moto jo me ode, Mikal nyar ka Saulo oko wok ooko pi riamo kede. Mikal oko waco ne be, “Abaka me Isirael tin oko mino kome kene dwongo ba! Tin en egonyo igoen ki kome i nyim mon atio ne jotic mege, bala kame ngamingo moroni kenekene karuno timo abongo lewic!”

²¹ Daudi oko waco ne Mikal be, “Ango oudo atie miel i nyim Rwot, ngat koyera kawang papa ni kede jo me ode dedede, pi bedo ngatel me jo mege me Isirael. Ango abino meede miel i nyim Rwot.

²² Ango abino dwoko dwongo na piny kalamo kano, doko abino bedo dano kame kony mere li kibut in; do kibut mon kame in iwaco nogo, ango abino bedo dano me awora.”

²³ Mikal nyar ka Saulo likame bin oko nywalo atin moro tuno en to.