2 Samuel 5 - Baibuli I Leb Kumam 2013

Daudi Odoko Abaka me Isirael Lung

¹ Jo me ikekon dedede me Isirael oko bino Keburon but Daudi, di kiko waco ne be, “Neningo, wan obedo jo acel kedi.

² I kare moro kokato, di pwodi Saulo en oudo obedo abaka wa, in en kame oudo ibedo telo jo me Isirael ot yi. Rwot bin oko waco ni be, ‘In ibino bedo ngakwat me jo na me Isirael, doko in ibino pugo gi.’ ”

³ Aso, kop nono en oko mino joadongo me Isirael oko bino Keburon but abaka; di Abaka Daudi oko timo kede gi isikan i nyim Rwot i Keburon, di gin kiko wiro Daudi pi bedo abaka me Isirael.

⁴ Mwakini me dongo ka Daudi oudo oromo ot adek i kare kame en edoko kede abaka, di eko pug pi mwakini ot ongwon.

⁵ En bin epugo Yuda i Keburon pi mwakini kanyaare kede duwete kanyape; di eko pugo Isirael lung kiton Yuda i Yerusalem pi mwakini ot adek kiwie adek.

⁶ Abaka Daudi bin oko yai kede jo mege pi ot suro Yerusalem. Jo Yebu kame bin bedo i adul nono oudo paro be Daudi likame karuno bwono gi, omio gin di kiko waco ne be, “In likame iyaro donyo kan; akadi imuduka kede ingwalasa da karuno bwoni.”

⁷ Akadi kamanono da, Daudi bin oko mano Sion kakame oudo kocelo di tek, kame nataman kolwongo be Bomba ka Daudi.

⁸ Cenge nono Daudi oudo oko waco ne jo mege be, “Ngatamoroni kikom wu koyaro neko jo Yebu, miero en elub puleju me pii di eko ot suro ingwalasa kede imuduka, jo kame cunya dagi.” Manono en komio jo waco be, “Imuduka kede ingwalasa likame bino donyo i ot ka Rwot.”

⁹ Daudi bin oko donyo bedo i kabedo kame oudo kocelo di tek nono, di en eko cako nyinge be Bomba ka Daudi. En bin eko meede gero bomba rimaro en, cako ki kakame kotoro kame oudo tie tetu kide mere.

¹⁰ Di Daudi oko meede ameda doko dano kame tek, pien Rwot Rubanga me jo yi oudo tie kede.

¹¹ Abaka Kiram me Taya bin oko cwano jo but Daudi; en ecwao gi kitero ne yen seda kede jogedo pi ot gero ne abaka ot.

¹² Di do Daudi oko niang be Rwot oudo otieko kete bedo abaka me Isirael, doko da Rwot en kame oudo omio ajakanut mere odongo pi jo mege me Isirael.

¹³ Di bin en etieko dak ki Keburon eoto Yerusalem, Daudi bobo oko kelo mon ace kame oudo en ebedo kede gi abeda kede kame enyomo, di eko nywalo kede gi idwe awobe kede idwe anyira ace.

¹⁴ Nying idwe kame bin en enywalo di oudo etie Yerusalem ige: Samua, Sobab, Natan, Sulumani,

¹⁵ Ibar, Elisua, Nepeg, Yapia,

¹⁶ Elisama, Eliada, kede Elipelet.

Daudi Obwono Jo Pilistia

¹⁷ Kakame jo Pilistia oko winyo kede be oudo kowiro Daudi pi bedo abaka me Isirael, isirikalen me Pilistia dedede oko ot mono Daudi pi make; do Daudi oko winyo di en eko ot kakame oudo kocelo di tek.

¹⁸ Isirikalen me Pilistia oudo obino di kiko sarakin i aditot me Repaim.

¹⁹ Daudi oko penyo Rwot be, “Benyo, aot di ako suro jo Pilistia? Ibino mino gi i cinga?” Rwot oko waco ne Daudi be, “Oti; pien ateteni ango abino mino jo Pilistia i cingi.”

²⁰ Aso, Daudi oko ot Baal Perasim, di eko bwono gi ki kuno. En ewaco be, “Rwot otieko nyano diere me jokwor na bala alele kame dipere.” Pi mano, oko do lwongo kabedo nono be Baal Perasim.

²¹ Jo Pilistia oko ringo kiweko cal jwogi gi kunono, di Daudi kede jo mege oko tero gi.

²² Di bobo jo Pilistia oko dok di kiko asarakin i aditot me Repaim.

²³ Daudi bobo oko penyo Rwot di Rwot oko waco ne be, “Kur iot suro gi i nyim gi; do manaro cen ngei gi, di iko suro gi ki kuno, tetu nget yen kame kolwongo be balsam.

²⁴ Ka iwinyunu tien jo aoto mor di winyere i wi yen balsam, bedunu do di ikapakina, pien udo ango atieko telo ne wu yongayo me bwono isirikalen me Pilistia.”

²⁵ Daudi bin oko timo bala kame Rwot oudo ociko ne; di eko bwono jo Pilistia cako ki Geba tuno Geser.