2 Samuel 4 - Baibuli I Leb Kumam 2013

Koneko Isiboset

¹ Kakame Isiboset wot ka Saulo oko winyo kede be oudo koneko Abuneri i Keburon, teko oko tiek ki kome, di lworo atek oko mako jo me Isirael dedede.

² Isiboset oudo bin tie kede jotel are me isirikalen kame oudo tic gi en telo ikodeta kame oto yak; nying ngat acel oudo Bana, kede nying ngat ocelu oudo obedo Rekab. Gin oudo awobe ka Rimon dano me ekeko ka Benjamin kowok i adul me Berot. (Berot oudo komaro be obedo adul me jo me ekeko ka Benjamin.

³ Jo kame bin ogeo bedo kunono oudo oringo i bomba me Gitaim, kakame gin kiko donyo bedo iye bala jokumbor cako i kare nono.)

⁴ Jonasan wot ka Saulo bin tie kede atin awobi anyinge Mepiboset. En oudo tiene dedede ongwalo di pwodi etitidi. I kare kame bin koneko kede Saulo kede Jonasan, mwakini mege me dongo oudo oromo kany. Kakame bin kokelo kede rwonge me to gin ki bomba me Jeserel, ngapidi mere oko tinge di eko ringo kede; do pi ringo me awakawaka kede mielkom, en eko poto piny di eko udo angwal.

⁵ Rekab kede Bana, awobe ka Rimon dano me Berot, oko yai ot paco ka Isiboset, di kiko tuno i dier i ceng kiko ude etie buto wei me i ceng.

⁶ Dako kame bin daro ekeko oudo tie bedo i ekeko di eyero engano, di nino oko make eko nino; Rekab kede Bana oko lwidar donyo i ot.

⁷ Kakame oudo kitie kede i ot, kiko udo Isiboset oudo tie buto i apien mere i agola mere me buto; gin kiko neke, di kiko ngolo wie tenge. Di do gin kiko kwanyo wie kitero, kiko ot iwor kiakia di kibeo i aditot me Yorodan.

⁸ Gin kiko tero wi Isiboset Keburon but Daudi di kiko waco ne abaka be, “Wi Isiboset wot ka Saulo ngakwor ni kame oudo mito neki ine; tin Rwot otieko timo onyanga i kom Saulo kede i kom ikwae mege, adwong wa me awora.”

⁹ Daudi oko waco ne Rekab kede omin mere Bana be, “Ango alairo i nying Rwot kakuo, en ngat kame oudo elako kuo na ki peko dedede, ango abino waco ne wu kop me ateni.

¹⁰ Kakame dano moro owaco na kede i Sikilag be, ‘Neningo, Saulo oto,’ di en oudo eparo be etie kelo na rwonge aber, ango bin ako make di ako neke. Manono en oudo giamia me pwone pi rwonge mere aber kame ekelo.

¹¹ Ebino do bedo rac kalamo benyo ne jo areco kame otieko neko dano kopoore di etie buto i ode! Nataman iparunu be kur ango atim onyanga i komu pi neke, di ako kisaro wu ki wi lobo kan?”

¹² Daudi oko mino jo mege cik di gin kiko neko Rekab kede Bana; gin kingongolo cing gi kede tien gi, di kiko liero kom gi i nget atapar me Keburon. Do wi Isiboset gin kiko tero di kiko yike i limbo ka Abuneri kame bin tie Keburon.