2 Samuel 3 - Baibuli I Leb Kumam 2013

¹ Yi bin oko bedo tie i dierediere me jo me ot ka Saulo kede ot ka Daudi tieko kare alac; Daudi bin oko meede ameda doko tek, di jo me ot ka Saulo meede ameda doko goro.

Awobe ka Daudi

² Daudi bin oko nywalo idwe awobe i Keburon: Wode kao oudo obedo Aminon, kame Akinoam me Jeserel onywalo ne;

³ wode me are oudo nyinge Kileab, kame Abigail apuserut ka Nabal me Kamel onywalo; me adek obedo Abisolom wot ka Maka, nyar ka Abaka Talamai me Gesur;

⁴ me ongwon obedo Adoniya wot ka Kagit; me kany obedo Sepatia wot ka Abital;

⁵ me kanyape oko bedo Itiream, kame toto mere oudo nyinge Egela. Awobe nogi dedede Daudi onywalo i Keburon.

Abuneri Olokere but Daudi

⁶ I kare kame oudo yi tie kede i dierediere me jo me ot ka Saulo kede jo me ot ka Daudi, Abuneri oudo oko doko dano kame pire tek kikom jo me ot ka Saulo.

⁷ Bin Saulo tie kede dako atidi kame nyinge Risipa, nyar ka Aya. Di Isiboset oko penyo Abuneri be, “Pinyo komio in ibuto kede dako kame oudo papa na bedo kede?”

⁸ Peny ka Isiboset oko wango cuny Abuneri twatwal; di eko waco ne be, “Iparo be ango abedo ogwok kame lubo jo me ot ka Yuda? Ceng me tin noni ango abedo nyuto genere na but jo me ot ka papa ni Saulo, but imiegu mege, kede but adiereson mege, doko ango likame amii i cing Daudi; do in nataman itie kelo kop i koma pi dako noni.

⁹ Ango akwao Rubanga emia alola, ka ango likame ako mino gikame en ekwongere iye but Daudi ocobere.

¹⁰ Ango abino kwanyo ajakanut ki ot ka Saulo di ako mino Daudi doko abaka me Isirael kede Yuda, cako ki Dan tuno Beereseba.”

¹¹ Di Isiboset likame bobo oko karuno waco ne Abuneri kop moro akadi acel, pien oudo elwore.

¹² Abuneri oko ooro jo Keburon but Daudi, di epenye be, “Ngai kame bino pugo lobo noni? Tim isikan keda di ango ako bino konyi kelo jo me Isirael dedede buti.”

¹³ Daudi oko dwoko be, “Mano ber; ango ayaro timo isikan kedi. Do gi acel kame ango amito be in itimi en ine be, in likame ibino tuno i nyima kwanyo di ikelo Mikal nyar ka Saulo i kare kame in ibino kede pi nena.”

¹⁴ Di do Daudi oko cwano jo but Isiboset wot ka Saulo di ewaco ne be, “Mia dako na Mikal, kame bin ango anyomo kede del me wi kom cuo me Pilistia tol acel.”

¹⁵ Isiboset oko cwano jo di oko kwanyo Mikal kibut cware Palatiel wot ka Lais.

¹⁶ Do Paliti oko upere kede Mikal; en elube ki cen di ekok kiton tuno Bakurim. Di do Abuneri oko waco ne be, “Dok paco!” Di en eko dok paco.

¹⁷ Abuneri oko ot but joadongo me Isirael di en eko waco negi be, “Cako sek wun ibedunu mito be Daudi bed abaka wu.

¹⁸ Nataman do timunu kamanono; pien Rwot otieko cikere but Daudi be, ‘Abino mino ngatic na Daudi en kame lako jo na me Isirael ki cing jo me Pilistia, kede kibut jokwor gi dedede.’ ”

¹⁹ Abuneri oko yamo da kede jo me ot ka Benjamin, di eko ot Keburon pi waco ne Daudi gikame jo me Isirael kede jo dedede me ot ka Benjamin oudo otieko iikere pi timo.

²⁰ Kakame Abuneri otuno kede but Daudi i Keburon, en kede jo ot are kame oudo eupere kede, Daudi oko tedo negi ebaga.

²¹ Abuneri oko waco ne Daudi be, “Wek ango kong aoti di ako loko tam me jo dedede me Isirael buti, in adwong na me awora, tetekeny gin kitim isikan kedi, di in iko bino bedo abaka me lobo noni lung bala kame cunyi mito.” Aso, Daudi oko peruno Abuneri di Abuneri oko ot kede mulem.

Joab Oneko Abuneri

²² Inonono inonono di Abuneri oudo otieko yai, jotic ka Daudi kede Joab, kame oudo ooto yak di tuno, kede jamini atot twatwal kame oudo kiyako. Do Abuneri do oudo otieko yai kibut Daudi i Keburon, pien Daudi oudo otieko peruno en, di eko yai eoto kede mulem.

²³ Kakame Joab kede isirikalen kame bin tie kede en oko tuno kede, ngatamoro oko waco ne Joab be, “Abuneri wot ka Ner oudo obino but abaka, di abaka oko peruno en eoto kede mulem.”

²⁴ Di Joab oko ot but abaka di eko penye be, “Nyo kame in itimo? Abuneri oudo obino buti; pinyo komio in iko weke eoto?

²⁵ In ingeo be Abuneri wot ka Ner oudo obino buti pi ngali, kede pi ngeno gi dedede kame in itie timo.”

²⁶ Kakame Joab oko wok kede kibut Daudi, eko cwano jo ooto wapo Abuneri, di gin kiko ude etuno i kulo me Sira di kiko dwoke; do Daudi oudo likame ngeo gimoro iye.

²⁷ Kakame Abuneri oko tuno kede Keburon, Joab oko tere tenge i nget erute di ineno bala oudo en emito yamo kede i mung, eko cobe i yie i kuno. Aso, bin Joab oko neko Abuneri pi culo kwor ka omin mere Asakel.

²⁸ Kakame Daudi oko winyo kede kop me nek nono, en eko waco be, “Ango kede jo atie i apugan na likame obino bedo kede raco moro i nyim Rwot pi kare lung, pi remo ka Abuneri wot ka Ner.

²⁹ Ango akwao be remo ka Abuneri bed i wi Joab, kede jo me ot ka papa mere dedede; doko akwao be jo me ot ka Joab kur bed abongo ngatamoro kame tie kede ecalo, arabo kame tie kede dobo, amoto kame obedo abwocit, arabo kame koneko kede epima, amoto kame ngakec!”

³⁰ Aso, Joab kede omin mere Abisai bin oko neko Abuneri piento en oudo eneko omin gi Asakel i yi kame oudo obedo Gibeon.

³¹ Di Daudi oko waco ne Joab kede jo dedede kame bin etie kede be, “Nyinyilunu igoen wu ikounu ngapo igoen me iturur di ikounu koko Abuneri.” Abaka Daudi oko lubo kom liel ki cen di otie ot yike.

³² Gin di kiko yiko Abuneri Keburon. Abaka di oko koko kede dwan amalo i kayiko Abuneri, di jo dedede da oko donyo koko.

³³ Abaka oko wero wer me koko Abuneri be, “Pinyo komio Abuneri oko to bala ngamingo?

³⁴ Cingi oudo likame kotweo, doko tieni da oudo likame kotweo kede eriko; in iko to bala dano kame jonek oneko.” Jo di bobo oko donyo koke.

³⁵ Di do jo dedede oko bino pi tamo ngangao Daudi be amotoko ecam gimoro di pwodi piny ler; do Daudi oko kwongere di ewaco be, “Ango akwao Rubanga, emia alola ka ango ako bilo kwon arabo gimoro ace di pwodi ceng likame odonyo!”

³⁶ Jo dedede oko winyo kop nono di cuny gi oko doko yom. Ateteni cuny jo oko bedo yom pi gi dedede kame abaka oko timo.

³⁷ Aso, jo ka Daudi dedede kede jo me Isirael oko niang cenge nono be abaka oudo li i kop me neko Abuneri wot ka Ner.

³⁸ Abaka di oko waco ne jotic mege be, “Benyo, wun likame ingeunu be tin ngatel kame pire tek i Isirael otieko to?

³⁹ Ango tin ali kede teko, akadi di ango atie abaka kame kowiro; cuo gi, awobe ka Seruya, ger gero kalikame ango atwero. Ango akwao Rwot ecul dano kotimo gikarac noni bala kame poore kede ne!”