2 Samuel 24 - Baibuli I Leb Kumam 2013

Daudi Omaro Wel me Jo

¹ Cuny Rwot bobo oko wang kede jo me Isirael, di eko supo Daudi i kom gi di ewaco be, “Oti imar wel me jo me Isirael kede me Yuda.”

² Aso abaka oko waco ne Joab kede jodongo apat me isirikalen kame oudo tie kede be, “Otunu ibebeunu but jo me atekerin dedede me Isirael, cako ki Dan tuno Beereseba, di imarunu wel me jo, tetekeny ango abin angei wel me jo atie.”

³ Do Joab oko waco be, “Adwong, akwao Rwot Rubanga ni emi wel me jo ni me Isirael meede tien tol acel kalamo rom gi nan, di eko mini inen manono kede wangi di pwodi ikuo. Adwong, do pinyo komio in itie mito maro jo?”

⁴ Do abaka oko dino Joab kede jodongo mege me isirikalen pi timo gikame en emito. Aso Joab kede jodongo mege me isirikalen oko yai ki wang abaka di kiko ot maro wel me jo me Isirael.

⁵ Gin kiko ngolo ecilet me Yorodan, di kiko cako tic i Aroer kede ki bomba kame tie i dier aditot, di kiko dok tetu Gad kato tetu Yaser.

⁶ Di do kiko tuno Gilead kede Kades i lobo me jo Kiti; di kiko tuno Dan, kiko yai ki Dan di kiko manaro tuno Sidon.

⁷ Di do kiko dok tetu piny, tuno i bomba me Taya kame koluko kede apama, di kiko kato paka i bomban me jo Kibi kede jo Kanan, di do me ajikini kiko ot Negeb, bomba kame tie Beereseba tetu piny me Yuda.

⁸ Aso ingei mamano lobo nono lung pi dwete kanyangon kede ceng ot are, gin kiko dok Yerusalem.

⁹ Joab oko ot waco ne abaka wel me jo kame kimaro. I lobo me Isirael oudo tie iye cuo tutumia tol kanyauni (800,000) kame twero yi, do i Yuda oudo tie iye cuo tutumia tol kany (500,000) kame twero yi.

¹⁰ Do ingei Daudi tieko maro jo, cunye oko cako poto, di eko waco ne Rwot be, “Atieko timo dub adwong twatwal pi maro wel me jo! Do nan akwai, Okwe Rwot, sasiro ango, pien atimo tim me mingo.”

^11-12 Rwot oko waco ne Gad, en enabi ka Daudi be, “Oti iwace Daudi be ango atie mine kope adek me ayera. En eyer kop acel di ango ako bino timo ne gi nono.” Odiko di Daudi ocei,

¹³ Gad oko ot bute di oko waco ne gikame Rwot owaco; Gad oko penye be, “In iyero mene kikom magi: mwakini adek me kec, arabo dwete adek me ringo tenge kibut jokwor ni, amoto ceng adek me aumpuli i lobo kame in ipugo? Nan in kong par kope go di iko mina kop kame abino dwoko ne ngat oora.”

¹⁴ Daudi oko waco ne Gad be, “Ango nan atie i lieto! Do likame amito be dano en kame mia alola, do poore Rwot en kame mia alola, piento en etie kede cuny me kisa.”

¹⁵ Aso Rwot oko cwano aumpuli i lobo me Isirael cako odiko nono tuni i ceng kame oudo en eciko. Jo tutumia ot kanyaare (70,000) oko to cako ki Dan tuno Beereseba.

¹⁶ Do kakame malaika oudo mito cako timo kede nek i Yerusalem, Rwot oko loko tam mere me mino jo alola, di eko waco ne malaika kame oudo tie neko jo be, “Mano do romo; wek do.” Malaika oudo do tie i nget laru me canyo ka Arauna dano me Yebu.

¹⁷ Kakame Daudi oneno kede malaika kame oudo tie neko jo, en eko waco ne Rwot be, “Ango kena en kame adubo, ango kena en kame atimo gikarac; do jogo kame cal acala bala romini na, gin kitimo nyo? Ango atie kwani be, ango en kame ipoore mina alola kede jo me oda.”

¹⁸ I ceng acel nono Gad oko ot but Daudi di eko waco ne be, “Oti malo kuca iko gero ne Rwot alutari i diakal me canyo ka Arauna dano me Yebu.”

¹⁹ Daudi oko yei winyo dwan Rwot di eko ot bala kame Gad oudo owaco ne.

²⁰ Arauna oko ngoloro piny di eko neno abaka kede jotic mege di kitie ot malo tetu bute; en eko ot siramo gi di eko riebere piny i nyim abaka,

²¹ di eko penye be, “Adwong, pinyo komio ibino buta.” Daudi oko dwoko be, “Abino pi wilo diakal me canyo kibuti di ako gero iye alutari ne Rwot, tetekeny aumpuli jiki.”

²² Arauna oko dwoko be, “Adwong na, in tere di iko yalo gikame cunyi mito. Twonin da ige me giayala awanga, doko ikongio me canyo kede ayokoi me twonin da ige me moko mac.”

²³ Arauna omio magonogi dedede but abaka di eko waco ne be, “Akwao Rwot Rubanga ni egami kede yomcuny.”

²⁴ Do abaka oko waco ne Arauna be, “Likame kamano, do ango abino wilo gi kibuti awila; ango likame abino mino giayala awanga kalikame aculo iye gimoro but Rwot Rubanga na.” Aso Daudi oko wilo diakal me canyo kede twonin pi sente akaya ot kany me siliba.

²⁵ Daudi oko gero ne Rwot alutari kuno, di eko mino giayala awanga kede giayala me nywak. Rwot oko gamo kwac mere pi lobo me Isirael di aumpuli kame oudo tie kuno oko jik.