2 Samuel 23 - Baibuli I Leb Kumam 2013

Kope ka Daudi me Ajikini

¹ Daudi wot ka Yese oudo obedo icuo kame Rubanga omio dwongo, ngat kame Rubanga ka Yakobo oyero pi bedo abaka, ngatet were amit i Isirael. Magi en kope mege me ajikini:

² Tipo ka Rwot yamo kibuta, kop mere tie i leba.

³ Rubanga me Isirael otieko yamo; ngat kame obedo Lela me Isirael owaco na be, “Abaka kame pugo jo mege i yore aber, kame pugo di etie kede wor i kom Rubanga,

⁴ en ecal bala lero me piny aru, ecal bala ceng kame wok odiko di piny wiliwil, ecal bala ceng kame mio lum meny kame kot ocwei.”

⁵ Manono en gikame Rubanga bino timo ne oda, piento en etieko timo isikan kame bedo nakanaka keda, cikere atie odocon kalikame kobino turo. Rubanga bino mino manoni timere, en ebino konya; manoni en gikame cunya mito.

⁶ Do jo kalikame paro pi Rubanga cal bala okuto kame kouco; pien likame tie dano kame twero kwanyo gi kede cinge.

⁷ Pi kwanyo gi miero iti kede lilim abor arabo tir me tong; gin kobino wango gi i mac dopodop.

Isirikalen ka Daudi Atek Yi

⁸ Magi en nying isirikalen kame Daudi oudo tie kede: Yoseb Basebet dano me Takemon; en oudo ebedo ngatel me “Jo Adek”; en bin eyi kede tong mere di eko neko jo tol kanyauni (800) i yi acel.

⁹ Ngat kame oudo lube kikom jo yi adek nogo oudo obedo Eleasar wot ka Dodo, wot ka Akoki. Ceng moro acel en kede Daudi kicungo wi jo me Pilistia kame oudo ocokere pi yi. Jo apat me Isirael olokere odok cen,

¹⁰ do en eko guro di eko yi kede jo me Pilistia paka cinge oko sokoko likame bobo etwero gweno emal, bed bala cinge oudo olido emal. I ceng nono Rwot oko mino kobwono jo me Pilistia adikinicel. Di do jo me Isirael oko dok kakame Eleasar oudo tie iye di kiko donyo tako jame me yi ki kom jo kame koneko.

¹¹ Dano me adek mere en oudo Sama wot ka Age, dano me Karar. Jo me Pilistia oudo bin ocokere Leki kakame poto me ngor oudo tie iye, di isirikalen me Isirael oko ringo jo me Pilistia.

¹² Do Sama oko cungo i dier poto di eko yi pi riamo jo kiye, di eko neko jo me Pilistia. Rwot oko mine ebwono jo me Pilistia atwal atwala.

¹³ Di bin kare me kac oyapuno tuno, jo adek kikom ijakai “Ot Adek” oko yai pi ot but Daudi i abo me Adulam, di ekodet me jo me Pilistia oudo ogero kimere gi i aditot me Repaim.

¹⁴ Daudi oudo tie kagwokere mere atek, do isirikalen me Pilistia oudo tie Betelem.

¹⁵ Daudi oudo tie kede imue adwong i cunye, omio eko waco be, “Okwe koto ngatamoro okelo na pii me amata ki atan kame tie i nget erute me Betelem!”

¹⁶ Di jo yi adek nogo oko belo ki kimere me isirikalen me Pilistia, kiko ot twomo pii ki atan kame oudo tie i nget erute me Betelem, di kiko tero ne Daudi. Do Daudi likame oko mato pii nono da, do en eko onye piny bala giamia but Rwot.

¹⁷ Piento en ewaco be, “Rwot likame yei nango mato pii noni! Pien erom aroma bala mato remo me cuo koudo ojalo kuo gi nogi.” En eko dagi mato pii nono. Jo yi adek nogo otimo gi nogi.

¹⁸ Abisai wot ka Seruya, omin me Joab, oudo obedo ngadwong me “Jo Ot Adek”. En eyi kede jo tol adek kede tong mere di eko neko gi, di nyinge oko doko iruo kikom “Jo Ot Adek”.

¹⁹ En eko doko dano angere kalamo kikom “Jo Ot Adek” di eko doko ngatel gi, do oudo likame engere twatwal bala “Jo Adek”.

²⁰ Benaya wot ka Yekoyada dano me Kabusel oudo obedo ngayi kame nyinge ngere; en etimo gikame dongodongo. En eneko awobe are ka Ariel me Moab. I ceng moro da bin eoto di eko neko engu i bur, i ceng kame akako ocwei kede.

²¹ Doko da eneko dano me Misiri, icuo acil adikinicel. Icuo nono oudo tie kede tong i cinge, do Benaya oko mako ebela eko ot yi kede. En eko wariso tong ki cing icuo me Misiri nono, di eko lokere neke kede tong mere nono.

²² Magonogi en gikame Benaya wot ka Yekoyada otimo, eda ngat acel kikom “Jo Ot Adek”.

²³ Eda oudo engere twatwal i diere gi, do likame oudo nyinge iruo bala Jo Adek. Daudi oko mine ebedo ngadwong me isirikalen adare.

²⁴ Kikom “Jo Ot Adek” oudo tie iye Asakel omin me Joab; Elikanan wot ka Dodo me Betelem;

²⁵ Sama me Karod; Elika me Karod;

²⁶ Keles me Pelet; Ira wot ka Ikes me Tekoa;

²⁷ Abieser me Anatot; Mebunai me Kusa;

²⁸ Salmon me Ako; Makarai me Netopa;

²⁹ Keleb wot ka Bana me Netopa; Itai wot ka Ribai me Gibea i lobo ka jo Benjamin;

³⁰ Benaya me Piraton; Kidai me aditot kame tie i nget Gas;

³¹ Abialbon me Araba; Asimabet me Bakurim;

³² Eliaba me Salabon; awobe ka Yasen, Jonasan wot ka

³³ Sama me Karar; Akiam wot ka Sarar me Karar;

³⁴ Elipelet wot ka Akasabai me Maca; Eliam wot ka Akitopel me Gilo;

³⁵ Kesiro me Kamel; Parai me Araba;

³⁶ Igal wot ka Natan me Soba; Bani me Gad;

³⁷ Selek me Amon; Nakarai me Berot, en ngat koudo mako jamini me yi ka Joab wot ka Seruya;

³⁸ Ira kede Gareb jo me Yatir;

³⁹ Uria Ngakiti. Gin dedede oudo kitie isirikalen ot adek kiwie kanyaare kame nying gi iruo.